Na Israel le'ecpi qaisouec
1Qaq que'eca na'a'q Ñim Nataxala' iuaxan qome so Leviatán,
som na'araxanaq maye ỹataqta huegaqaic,
som na'araxanaq maye ỹataqta saqanapot,
irolec ca lainec maye qaramta, lta'araic qataq 'añaxaic,
qataq ỹalauat qome so shiguiỹac le'enaxat dragón
maye huetangui aso auaxai.
2Qaq que'eca na'a'q, Ñim Nataxala' 'enapec qome:
«Qauo'onaxañeelec ana nañiguishe maye ỹataqta 'onaxaic da lamaic.
3Aỹem Nataxala', nache aỹem maye ñeteltega,
qataq saishet da she'emaxat da secottalec.
Ñepaxattalec ye na'a'q qataq ye pe,
da yaqto' saishet da qaỹo'otec qauem.
4Aỹem saishet da senotac,
qalaxaye da huo'o aca ỹaxat qataq ca ato',
nache aỹem ashec da selogui',
nache ỹataqta imauec da savigaxat.
5Qaq da ỹauotaique da ñepaxattalec
nache iuen da aỹem nmane'.
Aja', iuen da aỹem nmane'.»
6Qaq ñaq natrauo caua na'axa'te da so Jacob
ỹa'alyiñi qome caua lpa'aye,
qaq na Israel le'ecpi qalaq ñaxatec qome
qataq huo'o aca lauoxo nache nlaqtelec qome ana 'alhua aca alapi.
7Ñim Lo'onatac 'Enauacna saishet da iuaxan na Israel le'ecpi,
da 'eeta'am co'ollaq iuaxan som ique'emaqchet namayepi,
qataq saishet da ỹalauat na Israel le'ecpi,
da 'eeta'am co'ollaq ỹalauat som ỹalauattac namayepi.
8Ñim Lo'onatac 'Enauacna iuaxan co'ollaxa
nam lalamaxat nhuo' le'ecpi,
qataq ỹo'orauec ca'ai naqa'en na na'alhua,
ỹo'orauec irolec som ỹataqta chaqaic la'atchiỹaxac Ñimaye,
maye 'eeta'am da nasheeresheguem na la'at
maye chegaqa'ague da nala' lliguisheguem.
9Qalaxaye ỹapalaxat qome na lasouaxashetpi so Jacob,
qaq da lataxac da ỹapalaxat na lasouaxashetpi, damaye 'eeta':
Iuen da ilaxachigui iviraxata'a da nda'a't naqa'en
na lsoche ana saq'en lca'atoxonaxalatepi,
'eeta'am da qailaxachigui na coma' nache nda'a't lsoche,
qataq saishet da huo'o aca no'onañi naqa'en
anam huetalec na lqui'ipi aso Asera,
qataq anam nca'atoxonaxalatepi da qaỹavigaxat
na nchenaxanaxat da qaỹo'oxoren nam atamnaxala'pi.
10Qaq yem huaqta'a't nỹecpi maye qampaxattaua'a
qalaq ỹataqta nlachiguiñi qome, 'eeta'am ca nỹec da qanayeca'ai,
qataq 'eeta'am ca toolec 'alhua maye qaica ca hueta'a shiỹaxauapi.
Nache lquia'aqa' qome na shiguiỹacpi,
yem huaña da chectac ana lcoue ana 'epaq, qataq huaña da nmatec.
11Qaq da deqaqa ana lcoue ana 'epaq nache huacac,
huaña nache na 'alpi laỹona't nache dalonaxana da ỹo'ot ca l-le'.
Cha'aye ne'ena nhuo' le'ecpi qaica ca laỹaanataxanaxac.
Qaq ỹoqo'oye Ñim Lo'onatac namayepi saishet qome da ichoxoren,
qataq saishet da ỹasaxalec da lchoxonnataxanaxa.
12Qaq que'eca na'a'q Ñim Nataxala' do'onataxan qome,
chegoqchiguiña ye tala Éufrates nache ivitta'a so tala ye Egipto,
'eeta'am ca ichegoqtac ana ala ca nañiguishec,
qalaxaye qami' Israel le'ecpi qami' qalaỹona't qome,
qalaq qaỹacootaua'a ñi 'oonolec da qoñiita.
13Qaq que'eca na'a'q qaỹashiiyigui qome aca nasheere,
nache anac qome yem qaỹauega co'ollaxa ye Asiria,
qataq yem qaỹauega co'ollaxa ye Egipto,
nache huaña qome añi qui'itta qasoxonaxa
maye naña ye Jerusalén da ỹo'oxoren Ñim Nataxala'.
