Da nhuaxanaguec ye Judá qataq na Jerusalén
1¡Ña qauloichigui de'era!
Ñim Nataxala' maye Qaica ca Ỹaqalanapec
nqateeguesop qome na Jerusalén qataq ye Judá,
'enauac da ntaunaguec qataq da qoỹaata'am
na nallec, qataq na 'etaxat.
2Ca 'añaxaic qataq ca alaataxaic,
qataq ca nmit ca nasouaxashet,
qataq ca na'aqtaxanaxanec,
qataq ca ilaviigui ca lỹa qataq ca nqueroxonec,
3ca nataxala', qataq ca ỹale 'amaqtaqaic,
qataq ca chegoqtecot na nqataxacpi,
qataq ca huo'o dam no'onataxac,
qataq ca pio'oxonaq,
4qalaq nsoxoppi qome naqa'en ca
lataxala'pi namayepi,
qataq ca lta'alpi namayepi nda'a't ca nsoxoppiolec.
5Nache na nhuo' le'ecpi qaica qome ca qairen,
ñi 'oonolec qalaq npa'aguene' ca maiche lỹa,
qataq ca lỹa npa'aguene' ca maiche nauochaxaua,
qataq ca nsoxoppi npa'aguene' ca ỹa'axaiquipi,
qataq cam no'otanecpi npa'aguene' ca 'amaqtaqaicpi.
6Qaq huo'o qome ca ỹacona na lhuaq ca lqaỹa,
nache 'enapega, 'eeta': «'Am maye ñaq huo'oi naua 'ogo,
qaq nache 'am qome da 'am qarataxala' da 'aulo'ogue
'enauac ne'ena lapoosheguem coma'pi
maye qailaxachigui co'ollaxa.»
7Qalaxaye camaye ỹan qome ca la'aqtac, 'eeta':
«Aỹem sa seshet qome da saỹamaxaañi na mashe qauem,
cha'aye ye ima' qaica ca anoq qataq cam ỹogoxot da saañi.
Qaq ỹoqo'oye saishet qome da aỹem
lataxala' qanqa'aiñi na shiỹaxauapi.»
8Cha'aye ỹoqta 'eesa da na Jerusalén hua'axañi qome,
qataq ye Judá nlachiguiñi qome,
cha'aye nache huaña yemaye nam ntaxaỹaxacpi
qataq na qaỹo'otpi da qaỹataỹa'aguet Ñim Nataxala',
da qaisheueetac da la'amaqchec Ñimaye.
9Cha'aye da maiche lashiguiỹaxac
nachera da ỹa'axat da lataxac namayepi,
qaq saishet da ỹoxooñi nam lasouaxashetpi
'eeta'am co'ollaxa so Sodoma da imauec
da ỹa'axat na lasouaxashetpi.
¡Qaq choxoraxaso' qome namayepi
cha'aye iqataxaatapigui' da maiche nhuaxanaguec!
10Qaq machiguiñi qome cam no'on da lataxac
cha'aye no'on qome da llecỹaxac,
qataq huo'o da ntonaxac cha'aye no'on da
alaỹaxac da lo'onataxanaxac.
11¡Qaq choxoraxaso' ca qauemaic!
Cha'aye ỹataqta qauem qome da llecỹaxac,
cha'aye Ñim Lo'onatac 'Enauacna isheeten qome,
ipacchigui naqa'en nam ỹo'otpi camaye.
12Qaq choxoraxaso' nam ỹalamaxat nhuo' le'ecpi,
souaxat da ñaq ñaqpiolec ca sa iyacnapec
qataq da 'alpi ca ilotague' qome namayepi.
Qami' ỹalamaxat nhuo' le'ecpi,
nam qarataxala'aipi qami' ỹatenache't
nache qami' ỹauecta'alo so qauem nqa'aic.
13Qaq Ñim Nataxala', mashe naỹamaxat da nmit namayepi,
da yaqto' nmit na lalamaxat nhuo' le'ecpi.
14Ñim Nataxala' anac qome da nmit na nqueroxonecpi
qataq na lataxala'pi nam lalamaxatpi nhuo' le'ecpi.
Nache 'enapega qome 'eeta':
«Qami' maye qanlaxacheetapiguiñi
co'ollaxa na ỹanaxanaqa' uva lma'pi,
qataq qaucacheetacot na choxoraqpi,
na qarcachaxache qalaq qaỹo'oxochiỹoiguilo naua qarma'achilli'.
15¿Negue't ca qami' ỹamaxaleguete
da qavi'iñiỹai' nam ỹalamaxat nhuo' le'ecpi,
qataq da sa qauyacñiỹapec na choxoraqpi?»
Qaq 'era da la'aqtac Ñim Nataxala'
maye Qaica ca Ỹaqalanapec.
Da nhuaxanaguec na 'alpi maye lma' na Jerusalén
16Ñim Nataxala' nataqa'en, 'eeta':
«Na 'alpi maye Jerusalén lashepi maye na'amqaanaxaipi,
da queuotapigui' qalaq ỹataqta nlotcheguem,
qataq ño'oxonnaxaic da lmeenaxanaxac,
qataq sa qaỹara'ache naua lqauaxaqui'
da ỹo'ot da l-lamaxa na llo'oxoraxatpi naua lapia'ate,
17Ñim Nataxala' ỹo'otec qome
da qui'it na lqaic anamayepi,
qataq ỹachaxan qome da huetauec anamayepi.»
18Qaq que'eca na'a'q, Ñim Nataxala' ỹo'ot qome da imeuo
'enauac na llo'oxoraxat naua napia'ate
qataq ana llo'oxoraqtepi na nqaic,
qataq ana llo'oxoraqtepi ana nqolapi,
19qataq ana nshetepi, nhuaxashecpi, qataq na nqaic lapoxotpi,
20qopaxa qataq na npaqtacpiolec lcat
maye llo'oxoraxat naua napia'ate,
qataq na saataxaquipi, qataq ana laỹe'piole na coraxat,
qataq na nqolacpi atamnaxala'pi,
21qataq ana chiguishaqtepi,
qataq ana llo'oxoraqte na nmic,
22qataq ana no'on npotopi,
qataq na npo'pi,
qataq na lapoxot naua nallaco,
qataq na noxoiquipi,
23qataq ana tannaxaipi, qataq na no'on hualoq laỹepi,
qataq na nqaic laxataxatpi,
qataq na npo'piolec.
24Qaq na coraxat qalaq nmeneguet qome ca ỹotta'a't nalolaxapi,
qaq na saataxaquipi qalaq nmeneguet ca nañecpi,
qaq na no'on qoue qalaq nmeneguet qome da qui'it na nqaic,
qaq ana no'on npotopi qalaq nmeneguet ca sansatta nogoxot,
qaq da lyac da no'ogoỹaxac
qalaq nmeneguet qome ca lque'emaxa
souaxat ca lcat dapaqa.
25Na 'analleppi qalaq huañi qome huaigui ca alaataxac,
qaq na 'ara'añaxanecpi qalaq ileu qome
huaigui ca loquiaxac.
26Qaq na huaqta'a't nỹecpi nỹen qome
da ỹo'ot ca lasouaxac,
nache ỹataqta imauec qome da qaỹalata'a't.
