Isaías 5

So ñauochaxaua huo'o co'ollaxa so

lanaxanaqa' uva lma',

maye huaña so ỹataqta no'on 'alhua.

₂Nqalagoxotsheguem so 'alhua

qataq nqateeguesop so coma'pi,

nache ỹaalec aso ỹataqta no'on nañiguishe ala,

qataq no'oxoosheguem aso nalloxolate

ỹanangui na laiñi so lanaxanaqa',

qataq ỹo'ot nataqa'en so no'onataqa' na lataxa.

Nache so ñauochaxaua iuatta'a

aca ỹataqta ama ala aso lañiguishe uva,

qalaxaye aso ala aso lañiguishe uva ỹataqta ñe'eua.

₃Qaq nagui, qami' maye qarmaye na Jerusalén,

qataq qami' ỹalleppi maye qarmaye na Judá,

ña qaua'axache nagui ¿negue't ca huo'o ca lasouaxashet?

Nam ỹanaxanaqa' qalqo' aỹem.

₄¿Negue't ca lỹa ishet da so'ot na ỹanaxanaqa' uva lma'?

¿Peta'a huo'o ca lỹa maye saxanaxa da so'otec namaye?

Aỹem seuatta'a co'ollaxa da huo'o aca ỹataqta ama ala ana uva,

qalaxaye ¿ta'ainco' da ỹataqta ñe'eua aso ala ana uva?

₅Qaq nagui qami' sa'aqtaxanema da iuennataxac

da so'otec na ỹanaxanaqa' uva lma':

Ñeqat qome na lpaqtaxat yaqto' qailaxachigui,

qataq samaxañi qome so lpaqtaxanaxat coma' yaqto' qaỹapetapigui.

₆Nache so'otec qome da qanayeca'ai,

qataq saishet da qaichec ana lcouepi ana uvapi,

qataq saishet da qaimettacot, nache ñaxaalec aca ỹaxat.

Qataq shenapega na lo'oc na piguem da saishet

da naañi naqa'en ca auot da talec yemaye.

₇Qaq som lanaxanaqa' uva lma' maye lauotaxat

Ñim Nataxala' maye Qaica ca Ỹaqalanapec,

nachena nam Israel le'ecpi,

qataq nam nhuo' le'ecpi maye lma' ye Judá.

Ñim Nataxala' iuatta'a co'ollaxa namayepi

da ỹalaxaguet na lqataxacpi Ñimaye,

qalaxaye nacherata da ilalec da nalaataxanaxac,

qataq iuatta'a da ỹo'ot da nalochiguiñi lataxac,

qalaxaye nacherata da hua'aqtega da na'alaxac souaxat da qui'ic.

₈¡Choxoraxaso' qome nam desheenaxatega na qalota lma'pi,

qataq nquigaxattauec na na'alhuapi,

nache qaica ca lma' naqa'en ca lỹa shiỹaxaua,

qaq 'eco' da nachaqnata namayepi da netalec na 'alhua!

₉Ñim Nataxala' maye Qaica ca Ỹaqalanapec

aỹem ỹanem da la'aqtac, 'eeta':

«Qalota na nỹecpi na nlachiguiñi qome,

qaq na'aictaxa da lta'araicpi qataq 'onaxaicpi na nỹecpi

qalaxaye qaica qome ca netaigui.

₁₀Cam qalochiguiñi 'alhua maye ñaxattalec ana uva,

da qanqat nache 'oonole acatai' nlaxachigui laỹe' ca lataxa,

qataq caua diez laỹe' ana ala aca nañiguishe

da qanqat nache 'oonolec ca nlaxachigui laỹe' na trigo.»

₁₁¡Choxoraxaso' nam no'ottasheguem ye nte'eta

da yaqto' no'otta'ai' da nỹomaxac na lataxa,

nache choche ivitta'a ye pe da nỹomtac

nache ivitta'a da ỹataqta taxaic.

₁₂Nam la'ashaxacpi qalaq nda'a't ana nviquepi arpapi,

salteriopi, qataquipi, qataq ana nasheerepi qataq na lataxa,

qalaxaye saishet da ila'a nam ỹo'otpi Ñim Nataxala',

qataq saishet da iuennata'a nam lo'onatacpi Ñimaye.

₁₃Qaq ỹoqo'oye na ỹalamaxat nhuo' le'ecpi

qaỹauega qome ca ỹaqa'a 'alhua

souaxat da saishet da aỹem ỹauatton,

'enauac na nhuo' le'ecpi qataq na lataxala'pi

ilem qome na lqouaxa qataq na laquip.

₁₄Qaq ỹoqo'oye aca huachiqui nquigaxatec qome na lauel,

qataq qaica ca loga't da ỹauattagui na alap

da yaqto' iuoxonañi na nhuo' le'ecpi qataq na lataxala'pi,

nam shiỹaxauapi maye ỹo'ottac na qauem qataq na la'ashaxacpi.

₁₅Na shiỹaxauapi ỹataqta qaica qome ca 'enec,

na ño'oxonnaxaicpi qalaq choche nloguiñi qome.

₁₆Qalaxaye Ñim Nataxala' maye Qaica ca Ỹaqalanapec

ỹachaxan qome da la'amaqchec qom nmit na shiỹaxauapi,

Ñim Lo'onatac 'Enauacna maye qui'itta

ỹachaxan qome da qui'itta lataxac,

qom ỹo'ot ca nalochiguiñi lo'onataxanaxac.

₁₇Na huaqta'a't nỹecpi ỹataqta nlachiguiñi qome,

nache ana qaguetapi qataq ana quetaqpi lquia'aqa' qome namaye.

₁₈¡Choxoraxaso' nam nỹoqtala't na qauem,

souaxat da latenataxanaxac nache ỹauecta'aguet na lasouaxashetpi

'eeta'am ca ỹauecta'aguet aca naigona!

₁₉Qaq namayepi 'enapec naxa: «Ñim Lo'onatac 'Enauacna,

no'on da sa ỹaỹaloxon da ỹo'ot

nam lo'onatacpi yaqto' sauanaqchigui,

Ñim Qui'itta Natamnaxala' na Israel le'ecpi,

ña iỹalapegue' qome da ipacchigui naqa'en da ỹo'ot

nam lapaxañipi co'ollaxa yaqto' sauattonaq.»

₂₀¡Choxoraxaso' na 'eetega no'on na qauem,

qaq na qauem qalaq 'eetega no'on,

qaq na yo'oqchiguiñi qalaq nmeneguet naqa'en na napalaxa,

qaq na napalaxa qalaq nmeneguet naqa'en na yo'oqchiguiñi,

qaq na chem qalaq 'eetega ama,

qaq na ama qalaq 'eetega chem!

₂₁¡Choxoraxaso' nam 'eetega ỹaanaxanaxaicpi,

qataq nam 'eetega ỹaanataxanaxaicpi!

₂₂¡Choxoraxaso' nam qaica ca nauec da nỹomtapigui na lataxa,

qataq nam ỹalleppi maye 'añaxaicpi da ỹalecna't na lataxa!

₂₃Na nmitta'a da nmeela't da ỹo'ot

da qaica naqa'en ca lasouaxashet nam huo'o na lasouaxashet,

qataq saishet da ỹo'otec ca no'on nam no'on da lataxac.

₂₄Qaq ỹoqo'oye 'eeta'am qome ca norec

da ỹavicta naqa'en ca 'auaqpi deqaqta,

qataq na le'eraxa camaye da chepchiguiñi naqa'en

ana deqaqta laue ana qo'oipaq,

qaq nache 'eetec qome namayepi da imeuo,

'eeta'am aca qo'oipaq da lto na lpa'a'pi,

qataq ana lauoxo nlaguiñi nache nañigui namoxoỹaxa,

cha'aye sa ỹalaxagueta naua lapaxaguenataxanaxaco

qataq naua lamaxasoxonaxaco Ñim Nataxala'

maye Qaica ca Ỹaqalanapec,

Ñim Qui'itta Natamnaxala' na Israel le'ecpi.

₂₅Qaq ỹoqo'oye Ñim Nataxala' dalemataỹa

na lalamaxat nhuo' le'ecpi souaxat de'era,

nache nauaxaỹaxaasheguem qome na lhuaq da yaqto' iuaxan namayepi.

Qaq ana qasoxonaxapi qalaq cholaxan qome

qaq na leuaxaicpi qalaq 'eeta'am ca lasogoñi

da huetaiya' huetangui na nqa'aicpi.

Qalaxaye da layeloxo Ñim Nataxala' saishet qome da vi'iiguet,

nache queto'ot da lasauaqtaxanaxac.

₂₆Ñim Nataxala' nauaxaỹaxaasheguem qome aca la'anaxanaqte,

qataq yo'oxon qome da iỹaxana

ca nhuo' le'ecpi maye hueta'a ca ỹaqa'a 'alhua,

nache sa naỹaloxon naqa'en da nvi'.

₂₇Qaq camayepi qaica qome ca nasamtapiguiñi,

qataq qaica ca pogolaxaateguiñi,

qataq qaica ca do'ochetapigui'

qataq qaica ca sa ichiguiñi naqa'en ca nsaataxaqui,

qataq qaica ca dachepta'ape caua lque'ete caua lapela'ate.

₂₈Aca lchecnapi qalaq ỹataqta ỹaxaraipi,

qaq ca lchecnecpi qalaq ỹataqta ichegaxattelec.

Aca naro'opi ca lalopi caipi qalaq 'eeta'am na coma',

qaq naua lasaxanna acam laigonapi qalaq 'eeta'am ana daua'ache,

₂₉qaq da desoqo qalaq 'eeta'am ca llon

maye desoqtai' da huo'o ca loxonec,

qaq da ỹache cam loxonec camaye

nache qaica ca ishet da deuotaxanec.

₃₀Qaq que'eca nhuo' le'ecpi qom ivita cam na'a'q maye naloqnec,

nache da l-lamaxa dauaxan qome 'eeta'am aso auaxai,

qom dataỹa'aguet na Israel le'ecpi,

qaq da huo'o ca imeten ana 'alhua,

nache ila'a qome da imattalec ca napalaxa,

ca lo'oc na piguem qalaq ỹapo'oguet na yo'oqchiguiñi.