Isaías 64

₁Qaq no'on taxa, da 'aucolaxata'ague na piguem nache 'aunotec,

nache ana qasoxonaxapi cholaxan souaxat da 'arviraxac,

₂'eeta'am ca norec da ỹavigaxat aca qo'oipaq,

huo'otaq da nacham naqa'en ca 'etaxat.

Qaq huaña taxa nache na 'ampa'aguenaxauapi ỹauatton da 'are'enaxat,

qataq na ỹotta'a't shiỹaxauapi iviloxol taxa souaxat da 'arviraxac.

₃Co'ollaq 'auo'ot nam huo'o da lchec

maye saishet da sepetaqtega da 'auo'ot,

qataq co'ollaq 'aunotec nache ana qasoxonaxapi

cholaxan souaxat da 'arviraxac.

₄Qaq ỹataqta saỹauanego' da qaỹa'axaỹa

huo'otaq da qaỹauaachigui da huo'o ca lỹa atamnaxala'

da ỹo'ot cam 'eeta'am nam 'auo'otpi,

da talec naqa'en cam pe'etega camaye.

₅'Am 'auaỹamaxareeta

cam machiguiñi da ỹo'otac

da nalochiguiñi lataxac

qataq cam iuennatega da ỹo'ot cam qonetapeguec.

'Am huo'o da 'aralemataic

cha'aye huo'o da qarasouaxashet,

qaq mashe qaỹoqtegue da 'am senogoqchetaqtac.

₆'Enauac da shenaqta, shenaqta'am ca ỹale maye nshepaxan da lataxac,

qataq 'enauac nam no'on qaro'onatacpi 'eeta'am ca hualoxolaỹi maye ỹataqta nshepaxan,

'enauac da sanataxañi shenaqta'am aca qo'oipaq laue maye deqaqta,

qataq da qaralaataxanaxac qomi' ỹauogoleeta'ape 'eeta'am ca la'at.

₇Qaq mashe qaica ca iỹaxaatega da 'are'enaxat

huo'otaq da na'añaxat da yaqto' 'am ỹe'eguenot.

Qaq ỹoqo'oye qomi' 'anqañoxocheesopa

qataq qomi' 'auala't souaxat nam qauem maye so'otaqpi.

₈Qalaxaye 'am Nataxala', nache 'am maye 'Am qarta'a,

qomi' qalaq shenaqta'am ca nshaxa,

qaq 'Am qalaq nache 'Am maye 'auo'ot da qarataxac,

qaq 'enauac da shenaqta, qomi' lo'onataqa naua 'arhuaxaye.

₉'Am Nataxala' saishet qome da ỹapacauec da 'aralemataic,

qataq saishet da qome da nache 'eetai' da 'auennatega dam qaralaataxanaxac.

¡Ñaq 'auloigui da 'enauac qomi' nhuo' le'ecpi maiche qomi' 'aralamaxatpi!

₁₀Nam 'aralamaxatpi qui'itta huaqta'a't nỹecpi

maye ỹotta'a't naua nañalo namayepi ỹataqta toolec,

na Jerusalén qalaq nlachiguiñi qataq dolachigui.

₁₁Asom huo'o da llo'oxoyec qanatamnaxaqui

maye netaigui naxa so qarta'alpi da 'Am ỹo'oxoreetac

qalaq nlachiguiñi, souaxat so norec.

¡Som ỹataqta qarauotaxatpi qalaq 'enauac da nlachiguiñi!

₁₂Qaq da 'aumeteetac 'enauac de'era 'Am Nataxala',

qalaq ¿peta'a saishet qome da huo'o ca 'auo'ot?

¿qataq peta'a nache queta qome da 'añe'emaxat,

da qaica ca qara'amaqchec 'anqa'en?