So nataxala' le'enaxat Tola
1Qaq co'ollaq mashe qaica so Abimelec, nache huo'o so ỹale maye chegoxoguet so maiche lauo' le'ecpi so Isacar le'enaxat Tola, som llalec so Puá qataq laual so Dodo, somaye nachaañi co'ollaxa da yaqto' nca'alaxatec so Israel le'ecpi. Somaye naña co'ollaxa ye Samir, yem 'alhuapi maye huaña aye qasoxonaxapi ye Efraín. 2Nache somaye ilotague' co'ollaxa so Israel le'ecpi soua veintitrés vi'iye, ivitta'a da ileu. Nache qailareña ye Samir.
So nataxala' le'enaxat Yaír
3Ime co'ollaxa qataq nachaañi so Yaír, som galadiita, maye nataqa'en ivi' soua veintidós vi'iye da ilotague' so Israel le'ecpi. 4Qaq so Yaír, ivi' treinta so llalaqpi, qaq ñi 'oonolec somayepi nnotaxala' naxa na maiche lalamaxat 'ashena, qataq ñi 'oonolec somayepi ilotague' so maiche lalamaxat lma' maye huaigui ye Galaad. Qaq nache ivitta'a nagui yi'iye lma'pi da qaỹamata'ac da le'enaxat «Ye Lma'pi so Yaír.»
5Qaq co'ollaq ileu so Yaír, nache qailareña ye Camón.
So nataxala' le'enaxat Jefté
6Qaq so Israel le'ecpi qaltaq ỹe'eguelaxalec da ỹo'ot co'ollaxa nam ỹataqta sa ỹaỹamaxaren Ñim Nataxala', souaxat da ỹo'oxoreetac so ỹotta'a't ne'enaqtac lqui'ipi so Baal qataq aso Astarté, nataqa'en so natamnaxala'pi so siiriopi, Sidón le'ecpi, moabiitapi, 'amoniitapi qataq so filisteopi. Nache ca'ai Ñim Nataxala', qataq ỹaxaañi da natameetacot Ñimaye. 7Ỹoqo'oye Ñim Nataxala' ỹataqta dalemataỹa somayepi, nache ỹaneguet da la'añaxac so filisteopi qataq so 'amoniitapi. 8Huaña, nache ivi' dieciocho vi'iye da so filisteopi, qataq so 'amoniitapi da sa iyacnapec 'enauac so Israel le'ecpi maye netaña ye Galaad maye pa'aỹa'ague da nala' lliguisheguem so tala Jordán, ye lma' co'ollaxa so amorreopi. 9Qaq nataqa'en so 'amoniitapi ỹa'axasoxoolec so tala Jordán da yaqto' delogui' so maiche nhuo' le'ecpi maye chegoxoguetpi so Judá, Benjamín qataq so Efraín. Nache so Israel le'ecpi ỹataqta sa la'axaic da lhuogoxo. 10Huaña nache so Israel le'ecpi iỹaxanot Ñim Nataxala' da yaqto' itauan somayepi nache, 'eeta': «'Am Qanatamnaxala', qomi' huo'o da qarasouaxashet 'am hueto'ot, cha'aye 'am qolqa'ai, souaxat da so'onataxanaqtacot na ỹotta'a't ne'enaqtac lqui'ipi so Baal.»
11Nache Ñim Nataxala' 'enapeco': «Co'ollaq qami' sa iyacna'ape na Egipto le'ecpi, amorreopi, 'amoniitapi, filisteopi, 12Sidón le'ecpi, amaleciitapi qataq ye madianiitapi, nache naxa da aỹem qauỹaxañiỹot da qami' setaua'n. ¿Qaq peta'a saisheto' da qami' sesoueeguesopa namayepi? 13Qalaxaye nache 'ena'am Aỹem qoquiỹa'ai co'ollaxa, souaxat da qauo'onataxañiitacot na ỹaqa'a atamnaxala'pi. Qaq ỹoqo'oye saishet da she'eguelaxalec da qami' sesoueeguesopa namayepi. 14¡Qaq ỹoqo'oye qanqo'oñiỹa yi'iye atamnaxala'pi maye qarca'aguishiqui nache qauỹaxañiỹot, yaqto' qami' itaua'n nache qami' isoueeguesopa da qanque'eenaxaqui!»
15Qalaxaye so Israel le'ecpi 'enapeco':
«'Am Nataxala', 'eesa da huo'o da qarasouaxashet. Qaq maiche 'oiqueetac qome cam qomi' 'auataxaateugalo. Qalaxaye ña qomi' 'anqouagueque da qomi' 'ausorec nagui.» 16Huaña, nache so Israel le'ecpi ỹalat so ỹaqa'a atamnaxala'pi da yaqto' qaltaq do'onataxanot Ñim Nataxala'. Nache Ñimaye ỹataqta sa nalo'oguet da 'eeta souaxat da nque'eenaxac so Israel le'ecpi.
17Qaq so amoniitapi naỹamaxat da yaqto' nalat, nache ỹanaña so lpe'lpi ye Galaad. Qaq so Israel le'ecpi nataqa'en laỹona't co'ollaxa, nache ỹanaña so lpe'lpi ye Mispá. 18Qaq so nataxala'pi Israel le'ecpi, qataq som nañapi ye Galaad, somayepi nasara't co'ollaxa da qaỹatalec cam lataxala' 'enauac so netaña ye Galaad, da yaqto' qailogui' so amoniitapi.
