Jueces 18

₁Qaq se'eso na'a'q ñaq saxanaxa co'ollaxa da huo'o ca nta'a ye Israel. Nache se'eso nhuo' le'ecpi maye chegoxoguetpi so Dan saxanaxa co'ollaxa da qoỹanem ca lalamaxat na'alhua, ỹoqo'oye somayepi nmittaique cam naña da yaqto' ỹacona da ỹo'ot lalamaxat. ₂Qaq ỹoqo'oye so chegoxoguetpi so Dan, lca'aua'alo soua cinco maye ỹataqta 'añaxaiqa se'eso nalleppi da yaqto' demeenaxara, qataq naloqte'n ca 'eetec yi'iye 'alhua. Nache se'esoua ỹale't co'ollaq ivita aye qasoxonaxapi ye Efraín, nache tareua'a so lma' so Micaía, nache huera'a da lo'ochaqa't se'eso pe. ₃Qaq co'ollaq mashe nayeetraua'a ye lma' so Micaía, nache hua'aqtrega naua ltaxaỹaxaco so nsoqolec leviita, nache ỹauatto'n naua la'aqtaqa, nache nqo'onalo da ina't, 'eeta':

¿Negue't co'ollaxa ca 'am nauega ne'ena? ¿Negue't cam 'auo'ottac da qoneta'a ne'ena? Qataq ¿negue't ca 'aulotaique ne'ena?

₄Nache se'eso leviita da'aqataxanema soomaye da 'eetec so Micaía, qataq da isheeten da yaqto' ltaxaỹaxanaxanec somaye.

₅Nache soomaye 'enapegalo somaye, 'eeta':

Ña 'aunat qome Ñim Lo'onatac 'Enauacna, cha'aye sauoqtaique da saỹatenaq da 'onaxaic da qoyecỹaxac.

₆Nache se'eso ntaxaỹaxanaxanec, 'eeta':

Qauesomiỹa, qataq qaica ca qayi'iitaique, cha'aye Ñim Nataxala' npaxattalec da qoyecỹaxaqui.

₇Nache je'c se'esoua cinco nmeenaxanaxanaqa nache ivilda'a ye Lais, yem huaña da iloralec som shiỹaxauapi maye maiche lma' se'eso huaqta'a't nỹecpi da ỹataqta qaica ca ndaqtaique, 'eeta'am da lataxac so sidoniopi ỹe'emaqtac, cha'aye qaica ca sa ỹalemaxat, qataq qaica ca iueetaique. Qalaxaye qaỹoqta yem naña som sidoniopi, qataq somayepi saishet da huo'o ca naỹamaxate'. ₈Nache se'esoua cinco nmeenaxanaxanaqa ỹe'eguelaxara ye Sorá qataq ye Estaol, yem hueta'a som laỹepi. Nache somayepi inatta'ape, soomaye, 'eeta':

¿'Eetec dam qoyecỹaxaqui?

Qaq soomaye, 'ena'apo':

₉¡Qomye nache qolaq nagui da seloquiaxanaq yemayepi! Cha'aye qomi' seconnaqtapeguelec yi'iye 'alhua, nache selaqalec da ỹataqta 'onaxaic! Qaq ¿ca 'eeteco' da choche qoviita'a ne'ena da qaica ca qauo'oche? ¡Nache qolaq nagui, ñeqo'onaxa da seuotaxanaxac yi'iye 'alhua! ₁₀Qom qavichiỹa yemaye, nache qauloỹalec ye shiỹaxauapi da qaica ca ndaqtaique, qataq ỹataqta qalochiguiñi ye na'alhua, nache qaica ca iueetaique. Qaq Ñim Lo'onatac 'Enauacna qomi' ỹanema qome yemaye da sonaqalec.

₁₁Huaña nache so seiscientos ỹalleppi som maiche nhuo' le'ecpi maye chegoxoguetpi so Dan, chegoqchiguiña ye Sorá qataq ye Estaol, da jec da nalat nache ỹataqta na'atchigui so lo'ogoxonaxatpi. ₁₂Qaq co'ollaq ivitta'a so lalamaxat na'alhua so chegoxoguetpi so Judá, nache ỹanaña so lpe'lpi, som pa'aỹa'ague da avit ye Quiriat Yearin. Qaq ỹoqo'oye nache ivitta'a nagui da le'enaxat «Lanataqa' so Dan le'ecpi.» ₁₃Qaq nache chegoqchiguiña yemaye da jec, taalec ye 'alhua maye huaña ana qasoxonaxapi ye Efraín, nache ivitta'a ye lma' so Micaía. ₁₄Nache se'esoua cinco nmeenaxanaxanaqa maye imeteetrac co'ollaxa ye 'alhua Lais, 'enapego' som laỹepi, 'eeta':

Maxatchaxa qome da huo'o ca qansheetaique da qauo'oche, cha'aye ne'ena nỹec netaigui ñi ntogue lapoxot, qataq na atamnaxala'piolec, qataq ñi ne'enaqtac 'epaq maye qaỹo'oxoolec na lcat plata.

₁₅Nache se'esoua nmeenaxanaxanaqa co'ollaq tareua'a so lma' so Micaía, nache nquiitegueto so nsoqolec leviita. ₁₆Qaq som seiscientos alleppi daniitapi maye ỹataqta na'atchiguiñi na lo'ogoxonaxatpi, nache hueta'a co'ollaxa so ñegueuo da deuataxaatac, ₁₇qaq som ntaxaỹaxanaxanec co'ollaq huetaña som ñegueuo da na'aqtaxaatague' som seiscientos alleppi, nache soua cinco nmeenaxanaxanaqa nqo'ooreua'a so nỹec, nache ỹacona so ne'enaqtac 'epaq maye qaỹo'oxoolec na lcat plata, qataq so laỹepi atamnaxala'piolec, qataq so ntogue lapoxot. ₁₈Nache so ntaxaỹaxanaxanec co'ollaq ila'a da se'esoua nmeenaxanaxanaqa taroigui so nỹec maye lma' so Micaía, nache ina't, 'eeta':

¿Negue't nam qauo'ocheetac?

₁₉Nache soomaye 'ena'apo':

¡'Aue'enaxaatai', 'auapogui na 'ap! ¡Nache 'onaxaictaxa da qomi' 'auca'ateguelo yaqto' nache 'am ntaxaỹaxanaxanec, qataq da 'eco' 'am qarta'a ñaqa'enaq! Qataq ¿saq no'ono' peta'a da 'am ntaxaỹaxanaxanec da 'aulotague' na qalota maiche nalamaxat nhuo' Israel le'ecpi, qaq saq 'ena'am da 'aulotague' ca llalaqpi ca 'oonolec shiỹaxaua?

₂₀Qaq se'eso na'aqtaxanaxanec ỹaỹamaxareeta de'era naỹaanataxanaxac, nache ỹacona so ntogue lapoxot, qataq so atamnaxala'piolec qataq so ne'enaqtac 'epaq maye qaỹo'oxoolec na lcat plata, nache ca'ategue somayepi. ₂₁Ime, nache somayepi qaltaq jec, nache hua'auta naqa'en so llalaqpi, qataq so na'atetpi qataq som logoxoshetpi.

₂₂Qaq mashe qaỹoqtegue co'ollaxa somayepi, nache so Micaía huaxaiguet so lauoreuapi, nache jec da icaalec somayepi. ₂₃Qaq souaxat da ỹa'alaqtai' co'ollaxa som decanaxaatacpi, nache so daniitapi ỹe'eguelaxaguet somayepi, nache inat so Micaía, 'eeta':

¿Ca 'eetec 'am? ¿Ta'ainco' da 'alaỹona't na 'arhuoreuapi?

₂₄Nache so Micaía 'enapec:

Qami' qauotaxañic ca ñatamnaxala'pi maye maiche ỹo'onatacpi, qataq qanaviqui ca ntaxaỹaxanaxanec, nache ỹataqta qaica ca aỹem qano'onaxachiỹo'ot. Qalaq aỹem qaunachiitac, qoñiita': ¿Ta'ainco' 'am?

₂₅Qalaxaye so daniitapi, 'enapec:

¡Qanañaxañiiñi, saishet da qomi' qauqaqñiitegueto! Ten, qom huo'o ca nhuoxonasheguem ye lauel da shenaqta, nache 'am iloquiaxan, huaña nache ishet da 'am qaỹalauat qataq na 'aỹa'alaqpi.

₂₆Nache so Micaía co'ollaq ỹauatton da ỹataqta huo'o da la'añaxac somayepi, nache ỹe'eguelaxa so lma', nache so daniitapi qaltaq jec co'ollaxa.

₂₇Qaq 'era da 'eetec somayepi da ỹache so atamnaxala'pi maye lo'onatacpi so Micaía, qataq ỹauec so ntaxaỹaxanaxanec, nache ivitta'a ye Lais. Huaña nache ilalec da som shiỹaxauapi maye lma' yemaye ỹataqta qaica ca ndaqtaique, qataq ỹe'emaqtac nache so daniitapi ỹalauat somayepi, irota'a na ỹeelonec qataq ỹavigaxat se'eso huaqta'a't nỹecpi. ₂₈Nache qaica ca npaxaalec co'ollaxa somayepi, cha'aye som naña somayepi ỹataqta qaỹoqta ye Sidón, qataq qaica ca naỹamaxate' somayepi, cha'aye ye Lais naña so ca'amegue maye saqaỹapeque ye Bet Rejob. Nache so daniitapi qaltaq no'oxoosheguem co'ollaxa se'eso huaqta'a't nỹecpi da yaqto' nache netaña somaye. ₂₉Nache naralaxat da le'enaxat ye Lais, ỹanagui da le'enaxat Dan da yaqto' ỹauo'o da la'amaqchec so hua'au chegoxoguet somayepi, maye nachera da le'enaxat co'ollaxa so llalec so Israel. ₃₀Nache so daniitapi ỹanaña yemaye so lqolac ne'enaqtac 'epaq da yaqto' natamnot somayepi, nache ỹauo'o ntaxaỹaxanaxanec so Jonatán, som llalec so Guersón maye laual so Moisés. Qaq huaña co'ollaxa nache se'eso chegoxoguetpi somaye nache ntaxaỹaxanaxanecpi da ilotague' so chegoxoguetpi so Dan, nache ivitta'a co'ollaq noxonecpi somayepi. ₃₁Qaq somayepi nache neto'ot se'eso nqolac maye lo'onatac co'ollaxa so Micaía, maye netaigui co'ollaxa aso atamnaxaqui maye lalamaqte Ñim Nataxala' maye naña ye Silo.