Qaỹaloqnaxana so nshaxa lo'o
1Ñim Nataxala', aỹem 'enapega, 'eeta': 2«'Anqo'ooña qome ye lma' ñi nshaxa lo'o, qaq huaña qome nache 'am sa'axatem ca ỹa'aqtac.» 3Qaq aỹem Jeremías, ñeqo'ooña yemaye, nache selalec so nshaxa lo'o da do'onataxaatac, ỹo'ottac na nshaxa ỹauota'a aso lo'onataxanaqte. 4Qaq naxa da saỹaỹamaxañi nam lo'onatac, nache qaltaq ỹe'eguelaxalec da ỹo'ot, nache do'onataxana se'eso nshaxa, nache ivitta'a da ỹataqta ipacchigui dam huotaique lataxac naqa'en.
5Huaña nache Ñim Nataxala', aỹem 'enapega, 'eeta': 6«¿Saishet peta'a nataqa'en da sañoxot da nache sheeteque qami' Israel le'ecpi, dam 'eetec ñim nshaxa lo'o da ỹo'ot se'eso nshaxa? Qami' qoñiitaiguilo naua ihua'q, qoñiita'am som nshaxa maye netaiguilo naua lhua'q so nshaxa lo'o. Qaq 'era da ỹa'aqtac Aỹem Nataxala'. 7Aỹem huo'o ñaqa'en ca laloqo' da ñapogosheguem qataq seqalagoxooñi, qataq selaxachigui ca ỹotta'a't shiỹaxauapi huo'otaq ca no'onataxanaxac. 8Qalaxaye que'eca ỹotta'a't shiỹaxauapi da ca'ai na qauem, nache saishet da ñamaxa ca nhuaxanaguec maye mashe seqataxaatai'. 9Qataq huo'o ñaqa'en ca laloqo' da ño'oxoosheguem qataq nquictauec ñaqa'en ca ỹotta'a't shiỹaxauapi, huo'otaq ca no'onataxanaxac. 10Qalaxaye que'eca ỹotta'a't shiỹaxauapi da ỹo'ottac na qauem qataq sa na'axaỹaxana nam ivitaqtaxanaxacpi, nache saishet da ñamaxa ca no'on maye mashe seqataxaatapigui' da sanem.
11Qaq nagui 'aua'aqtaxanem na shiỹaxauapi na Judá, qataq na lma' na Jerusalén, da aỹem Nataxala', shenapega namayepi, sheeta': ‹Mashe huo'o dam llapaqtegueñi da yaqto' qami' sataỹa'agueta, Aỹem mashe iuennataxa da qami' seuaxa'n. Ñaq qoquiỹa'ai qome som qauem nqa'aic, nache qano'onaxache da qarataxaqui qataq da qaro'onataxanaxaqui.›» 12Qaq namayepi qome 'am 'enapega, 'eeta': «¡Saishet qome da qomi' 'aume'egueta! Cha'aye qomi' saỹamaxarenaqta da so'otaqtac ca maiche shenaqtapeguec, qataq nache qolaqto'ot qome da so'otaqta'ape naua qauema lhuennataxaco da qarquiyaqteỹaxac.»
13Qaq ỹoqo'oye Ñim Nataxala', 'eeta':
«Qaunache qome na ỹotta'a't shiỹaxauapi,
da huo'otaq huo'o ca hua'aqchigui co'ollaxa ca 'eeta'am de'era.
¡Na Israel le'ecpi huo'o da ỹo'ot maye ỹataqta qaiqaiga!
14¿Peta'a huo'o ca huaña co'ollaxa da quiguiñi ana aloñi
maye huetalec ana qaỹoqotcheguemecpi coma'pi ye Líbano?
¿Ishet peta'a da deqaxaỹañi nam atom 'etaxat
maye chegaqasheguema ana qasoxonaxapi?
15Qalaxaye na ỹalamaxat nhuo' le'ecpi Aỹem icoua'ai,
nache ỹaatacot na saq'en atamnaxala'pi na lchenaxanaxat maye ama na laita,
Namayepi iqataqchet so nqa'aic, som nqa'aic maye togoshaapec,
nache quetegueto naua saq 'amaqtaq nqa'aico maye saqaỹauatto'n.
16Qaq 'era da 'eetec da toolec naqa'en na na'alhua namayepi,
nache ỹo'ot da chochaq tatec da na'aalaxa.
Qaq 'enauac nam taalec namaye,
nache iconnaxaatac na lqaic souaxat da la'aalaxa.
17Qaq Aỹem, sheeta'am qome ca la'at
maye chegaqa'ague da nala' lliguisheguem,
nache selagaxattac qome na Israel le'ecpi,
so'ot da dataueeguesop na mpa'aguenaxauapi
Aỹem, sero'oguet qome na ilaq namayepi,
qaq saishet da samato'ot qom nvi' cam na'a'q
maye huaigui ca nhuaxanaguec.»
Dam qalapaxañi da qaỹataỹa'aguet so na'aqtaxanaxanec
18So shiỹaxauapi, 'enapec: «Sauoqo'o qome ca llapaxasoxoñi lataxac da yaqto' sataỹaqa'aguet so Jeremías. Cha'aye saishet da seuenaqtaique ntaxaỹaxanaxanec da qomi' ỹapaxague'n, qataq cam ỹaanaxanaxaic da qomi' ỹanema ca lqataxac, qataq ca na'aqtaxanaxanec da qomi' ỹa'axatema ca la'aqtac Ñim Lo'onatac 'Enauacna. Ñaq sauoqo'o ca lasouaxashet yaqto' qaỹalauat. Qaq saishet qome da salaxasoxoguet nam ỹa'axattacpi.»
Da natamnaxac so Jeremías
19¡'Am Nataxala', ñaq aỹem 'ana'axaỹaxana!
¡Qataq 'ana'axaỹaxana da la'aqtac nam ñepa'aguenaxauapi!
20¿Peta'a iuen da qaisheetenaxana ca qauem da qaisheeten ca no'on?
¡Namayepi co'ollaxa nshe' añi ñeuachiqui!
Ña 'auennata'a da 'am sataỹa'aguet co'ollaxa
da setaqteguelec namayepi
da yaqto' 'anqateeguesop namayepi da 'aralemataic.
21¡Qalaxaye nagui, 'auo'ot qome
da nam llalaqpi namayepi ilem na lqouaxa,
huo'otaq da ilem ca ỹeelonec,
qataq 'auo'ot da pa'aipi qataq qaica ca llalaqpi ana lhuapi namayepi!
¡Qataq na ỹalleppi maye lhuapi anamayepi ỹalauat qome ca napiina,
qataq na nsoxoppiolec ileuaigui qome ca alaataxac!
22Qataq nque'elaxatta qome 'anqa'en da 'anamaxa namayepi ca cachaxaicpi,
¡Ñaq qaỹa'axaỹa qome ca la'alaxac souaxat da lcolanaxa!
Cha'aye ỹo'ot co'ollaxa aso lshere da yaqto' aỹem loxonec
qataq ỹanangui na ỹec aso lqoinapi.
23Qalaxaye 'am Nataxala', 'auaỹaten 'enauac nam lapaxañipi
namayepi da yaqto' aỹem ỹalauat.
¡Qaq saishet qome da 'auchoxoreetac souaxat nam qauem maye ỹo'ot,
qataq saishet da 'aucoua'ai na lasouaxashetpi!
¡Qaq huañi qome 'anqa'en namayepi,
qataq 'auauo'o ca nhuaxanaguec 'aurolec da 'arayeloxo!
