Cam nta'a maye no'on da lataxac
1Ñim Nataxala', da la'aqtac, 'eeta': «¡Aicoue na qagueta lo'opi maye hua'aqta'a ana ilopi qaguetapi da deqat qataq nlagaxattac!»
2Ñim Nataxala', maye Natamnaxala' na Israel le'ecpi, 'enapega na nataxala'pi maye ilotague' nam lalamaxat Ñimaye nhuo' le'ecpi, 'eeta': «Qami' qaulagaxacheetac ana ilopi qaguetapi, qataq datauec qanqa'eñi, nache saishet da qanchelỹa'a. Qaq ỹoqo'oye Aỹem nagui maiche qami' sepa'aigueta da sauo'o ca qanhuaxanaguiiqui souaxat nam qauem maye qauo'ocheetac. Qaq 'era da ỹa'aqtac Aỹem Nataxala'. 3Qaq maiche Aỹem qome da ñe'eguelaxat ana no'onañipi ana ilopi, sachegoxota'a nam 'alhuapi maye taỹa ñaqa'en co'ollaxa, nache llaỹona't qome da ñe'eguelaxata na maiche lquia'aqa' co'ollaxa, yaqto' qalota qome ca llalaqpi. 4Qataq sauo'o qome cam ilotague'pi anamayepi da yaqto' ntela'a, qataq yaqto' saishet da huo'o ca ñe'etaique, qataq saishet da huo'o aca deqat anamayepi. Qaq 'era da ỹa'aqtac Aỹem Nataxala'.»
5Ñim Nataxala', 'enapec:
«Anacte' caua na'axa'te maye huaiguilo qome
da sauo'o ca nta'a maye chegoxoguet so David,
cam nta'a maye no'on da lataxac, qataq camaye do'onataxana qome
da nalochiguiñi qataq da no'on lataxac, da hueta'a ne'ena 'alhua.
6Qaq qom ñaq do'onataxaatac camaye,
nache nca'alec qome na Judá, nataqa'en na Israel qaica qome ca ndaqtaique.
Qaq 'era da le'enaxat da qaiỹaxana qome camaye:
‹Ñim Nataxala' nacheñi ñim qarca'alaxaqui.›
7Ñim Nataxala' 'enapec: Anacte' caua na'axa'te maye saishet qome da huo'o ca ỹan ca la'aqtac da, 'eeta': Nca'altauec Ñim Nataxala', maye nqateeguesop na Israel le'ecpi ye Egipto, 8nacherata da ỹan ca la'aqtac, 'eeta': ‹Nca'altauec Ñim Nataxala' maye nqateeguesop co'ollaxa nam chegoxoguetpi so Israel, yem 'alhua maye pa'aigue da sheu', qataq 'enauac nam laỹepi 'alhuapi maye taỹa naqa'en co'ollaxa, da yaqto' ỹe'eguelaxa da hueta'a na maiche lalamaxat na'alhua.›»
Da na'aqtaxanaxac maye talec na na'aqtaxanaxanecpi
9Da na'aqtaxanaxac maye talec na na'aqtaxanaxanecpi, 'eeta':
Aỹem ỹataqta qaica ca ilagaqa', 'enauac na ỹo'oc da ỹataqta cholaxan,
'eco' da aỹem taxaic, sheeta'am ca shiỹaxaua maye mashe quichigui na lataxa,
souaxat Ñim Nataxala' qataq naua qui'itte' la'aqtaqa.
10Ne'ena 'alhua ỹataqta nlaqchigui na quisheguetaxaicpi,
na shiỹaxauapi maye nqalgoqtague' da ỹo'ottac na qauem,
qataq do'ogoxona da la'añaxac da ỹo'ot da sa nalogoñi lataxac.
Qaq ỹoqo'oye Ñim Nataxala' ỹasaxalec da qauem la'aqtac ne'ena 'alhua,
nache ne'ena 'alhua deqaqa, qataq ỹavic na 'auaqpi
maye huetauga na toolec 'alhua.
11Ñim Nataxala', 'enapec: «Nam na'aqtaxanaxanecpi
qataq na ntaxaỹaxanaxanecpi ỹataqta qauem da lataxac.
Cha'aye ivira'a da selalec da hueta'a añi ỹalamaqte
atamnaxaqui da ỹo'ottac na qauem.
12Qaq ỹoqo'oye da nqa'aicỹaxac namayepi,
ỹataqta napalñi qome qataq salvi,
qataq Aỹem so'otec qome da qaỹamaxañi nache huañi.
Qom ñimit na lasouaxashetpi namayepi nache talec ñaqa'en ca qauem.
Qaq 'era da ỹa'aqtac Aỹem Nataxala'.»
13«Aỹem sauaachigui na na'aqtaxanaxanecpi ye Samaria
da ỹo'ottac nam ỹataqta aỹem inogoqchet,
namayepi ỹa'axatteguec da le'enaxat ñi Baal,
qataq ỹo'ot da nam ỹalamaxat nhuo' Israel le'ecpi isomapec.
14Qataq Aỹem sauaachigui na na'aqtaxanaxanecpi
na Jerusalén da ỹo'ottac nam ỹataqta qaiqaiga,
namayepi ncachetague' ana saishet da lhua, qataq decachetac,
qataq ỹa'añaqchet na qauemaicpi da yaqto'
namayepi saishet da ca'ai da qauem.
Namayepi qataq nam laỹepi maye hueta'a ne'ena huaqta'a't nỹecpi,
'eeta'am ñaqa'en so Sodoma qataq so Gomorra.
15Qaq ỹoqo'oye, Aỹem Nataxala' maye qaica ca Seqalanapec,
'era da ỹa'aqtac da sataỹa'aguet ne'ena na'aqtaxanaxanecpi.
Aỹem sequia'axanec qome ca nallec maye ỹataqta chem,
qataq ñeỹomaxangui ca 'etaxat maye huo'o lalegue maye qanlem,
cha'aye chegoqchigui na na'aqtaxanaxanecpi
na Jerusalén da laguelec 'enauac ne'ena 'alhua da qauem.»
16Qaq Ñim Nataxala' maye Qaica ca Ỹaqalanapec, da la'aqtac, 'eeta':
«Qami' Israel le'ecpi saishet qome da qaualaqaiguet
nam qami' ỹa'axatteguema nam na'aqtaxanaxanecpi,
cha'aye nam ỹa'axattac namayepi choche natenataxanaxacpi,
ne'ena la'aqtaxanaxacpi namayepi maiche ỹo'ot,
qaq saishet da Aỹem chegoqtot.
17Qataq da'aqtaxanem nam sa ỹaconegueta naua ỹa'aqtaqa, 'eeta':
‹'Onaxaic da qa'aita'ague›
Qataq nam quetegueto naua qauema lhuennataxaco
da lquiyaqteỹaxac qalaq da'aqtaxanem, 'eeta':
‹Saishet qome da qami' taleguete ca qauem.›»
Da la'alaxac so Jeremías
18Qalaxaye namayepi, ¿negue't cam ỹaỹate'n
naua ỹapoyeñi lhuennataxaco Ñim Nataxala'?
Qataq ¿negue't cam ỹauaachigui qataq hua'aqchiguilo naua la'aqtaqa?
Qataq ¿negue't co'ollaxa cam qochetega?
19Da layeloxo Ñim Nataxala', 'eeta'am ca la'at lta'araic,
'eeta'am qome ca la'ana't la'at da ỹamaxañi nam qauemaicpi.
20Da layeloxo Ñim Nataxala' saishet qome da vi'iiguet,
choche ivitta'a da Ñimaye ipacchigui cam 'eetapeguec.
Qaq anacte' caua na'axa'te maye huaiguilo qome
da qauennataxañi, qataq da qauaỹaañiteguet de'era.
Ñim Nataxala' dataỹa'aguet nam saq 'en na'aqtaxanaxanecpi
21«Aỹem, saishet co'ollaxa da samaq ne'ena na'aqtaxanaxanecpi,
qataq saishet co'ollaxa da setaxaỹot namayepi,
qalaxaye namayepi maiche nqalgoqtac da ỹa'axatec da ỹe'enaxat.
22Namayepi da ỹaỹate'n taxa naua saqcha'alo iuennataxaco,
nache da'aqtaxanem taxa na ỹalamaxat nhuo' le'ecpi naua ỹa'aqtaqa,
qataq nqateeguesop taxa namayepi da qauem llecỹaxac,
qataq ỹaxanec naqa'en nam qauem ỹo'ottac.»
23Ñim Nataxala', 'enapec:
¿Peta'a nacherata da Aỹem saqaỹapeque da Aỹem Atamnaxala'?
¡'A'i, saishet! ¡Maye nataqa'en Aỹem Atamnaxala' da Aỹem qaỹoqta!
24¿Negue't, ca ishet da nqañoxocheesop da imeenaxanaxac?
Ye Aỹem semattalec na piguem qataq ana 'alhua.
Qaq 'era da ỹa'aqtac Aỹem Nataxala'.
25Aỹem, sa'aqtega da nashepegaxanaxac ne'ena na'aqtaxanaxanecpi, da 'eetega ỹa'axattac da ỹe'enaxat, qataq 'eetega ña'aqtaxaatague' da huaigui na lchoxonaxacpi. 26¿Chaq laguio', qaq ỹaxaañi da ỹa'axattac nam saq'enpi, qataq na maiche ỹo'ot lhuennataxacpi maye saishet da 'eesa? 27Qaq na lchoxonaxacpi maye ỹa'axattapeguem na laỹepi, nachena nam huotaique da ỹachegoxotchigui, da na ỹalamaxat nhuo' le'ecpi Aỹem icoua'ai, 'eeta'am co'ollaxa som hua'au lta'alpi, da aỹem icoua'ai nache ca'ategue so Baal. 28¡Ca na'aqtaxanaxanec da huo'o ca lchoxonaxac, qalaq iuen da ỹa'axatta da choche lchoxonaxac, qalaxaye da ỹaconegueta naua ỹa'aqtaqa qalaq iuen da ipagaqchiichiguilo da ỹa'axa't! Cha'aye, ca 'auaqpi saishet da qanaloqnet ca trigo. 29Naua ỹa'aqtaqa 'eeta'am ca norec, qataq 'eeta'am aca ntoqnaxanaqte lcat maye ishet da ilaxachigui ca coma'. Qaq 'era da ỹa'aqtac Aỹem Nataxala'. 30Qaq ỹoqo'oye Aỹem sataỹa'aguet ne'ena na'aqtaxanaxanecpi maye decachetegalo naua ỹa'aqtaqa da ỹa'axatta'ape. Qaq 'era da ỹa'aqtac Aỹem Nataxala'. 31Aỹem sa'axat, da sataỹa'aguet ne'ena na'aqtaxanaxanecpi, maye ỹa'axattac nam 'eetega ỹa'aqtacpi, qamaq namayepi maiche ỹo'ot. 32Qataq sa'axat da sataỹa'aguet ne'ena na'aqtaxanaxanecpi, maye ỹa'axatta'ape naua lchoxonaxaco maye saq'e'n, cha'aye nachenaua ne'enaua latenataxanaxaco, qataq naua qaica ca naiguilo la'aqtaqa, nam ỹo'o't da isomapec na ỹalamaxat nhuo' le'ecpi. Aỹem saishet da samaq co'ollaxa namayepi, qataq saishet da samaxalec da da'aqtaxan. Qaq ỹoqo'oye namayepi saỹañoxot da itauan ne'ena nhuo' le'ecpi. Qaq 'era da ỹa'aqtac Aỹem Nataxala'.
33«Qaq 'am Jeremías, da huo'otaq huo'o ca shiỹaxaua ne'ena nhuo' le'ecpi, huo'otaq na'aqtaxanaxanec, huo'otaq ntaxaỹaxanaxanec, da 'am inat da, 'eeta': ‹¿Ca 'eetec cam qomi' taleguete la'aqtaxanaxac Ñim Nataxala'?› Nache 'auasateguet qome, qoneta': Ñim Nataxala' 'eeta' da la'aqtac Aỹem qami' sheca'aisalo qome. Qaq 'era da la'aqtac Ñim Nataxala'. 34Qaq da huo'o ca na'aqtaxanaxanec, huo'otaq ca ntaxaỹaxanaxanec huo'otaq ca lỹa shiỹaxaua, ne'ena nhuo' le'ecpi, da do'ogoxona de'era na'aqtac maye 'eeta': ‹lamaxasoxonaxac Ñim Nataxala',› nache camaye qataq ca llalaqpi, sauo'o qome ca nhuaxanaguec. 35Qaq da huo'otaq huo'o ca inat ca nauochaxaua huo'otaq ca lalamaxat lauo' le'ec, qaq iuen da, 'enapec: ‹¿Ca 'eetec ca lasataxac Ñim Nataxala'? ¿Ca 'eetec ca la'aqtac?› 36Qalaxaye saishet qome da ỹe'eguelaxaalec da do'ogoxona dam na'aqtac maye, 'eeta': ‹lamaxasoxonaxac Ñim Nataxala'› cha'aye da huo'o ca do'ogoxona da nasaxauec de'era na'aqtac, nache so'otec da naua la'aqtaqa camaye maiche que'emaxama. Qami' qana'axache' naua ỹoqta naiguilo naua la'aqtaqa Ñim Lo'onatac 'Enauacna maye Nca'altauec, Ñim Qanatamnaxala'ai, Ñim Nataxala' maye Qaica ca Ỹaqalanapec.
37'Am Jeremías, 'aunat qome nam na'aqtaxanaxanecpi, qoneta: ¿Ca 'eetec ca lasataxac Ñim Nataxala'? Qataq ¿ca 'eetec ca la'aqtac? 38Qaq namayepi da, 'eeta': ‹lamaxasoxonaxac Ñim Nataxala'›, qaq 'am 'auasateguet qome namayepi qoneta: Ñim Nataxala', 'eeta': Qaq cha'aye qami' qoquiito'ot da qauo'ogoxoñiitega dam na'aqtac maye qami' sa sashenema da qauo'ogoxoñiỹa, 39nache Aỹem, qami' sasaxare'c qome, qataq nam huaqta'a't nỹecpi maye qami' sanema co'ollaxa, qataq som hua'au qarta'ailpi, nache ỹataqta qaỹoqta ñaqa'en da sheeta, cam qoviỹaña qome. 40Qataq chochaq tatec qome ñaqa'en, da qaica ca 'eneque qanqa'en qami', qataq chochaq tatec da qara'agaqai, nache damaye saishet qome da qaucoviỹa'ai.»
