Soua dos no'oxonal maye huetangui aso hiigopi
1Qaq so Nabucodonosor maye nta'a ye Babilonia, co'ollaq ime da ỹauec so Jeconías, som llalec so Joaquim maye nta'a ye Judá, lỹatec naqa'en so nataxala'pi ye Judá, qataq som ỹaỹatenpi da ỹo'ot na le'enaqtac, qataq so lcat lo'opi, nache Ñim Nataxala', aỹem ỹachaxanalo soua dos no'oxonal maye huetanguilo aso hiigopi, qaq soomaye netraña ye naloteuga añi atamnaxaqui. 2Qaq soomaye, 'oonole aso huetangui aso ỹataqta 'onaxai hiigopi maye la'auaxana da ỹe, qaq aso lỹa, qalaq huetangui aso qauem hiigopi, qaq asomayepi ye ỹataqta qauem nache saishet qanallec.
3Nache Ñim Nataxala', aỹem inat 'eeta': «Jeremías, ¿negue't cam 'aulota'a?» Nache aỹem sasateguet, sheeta': «Qomye selota'a aye ỹataqta 'onaxai hiigopi, qataq huo'o aye ỹataqta qauem. Qaq souaxat da ỹataqta qauem, nache saishet da qanallec.»
4Nache Ñim Nataxala', aỹem 'enapega, 'eeta': 5«Aỹem, maye Aỹem Nataxala' maye Aỹem Natamnaxala' na Israel le'ecpi, da ỹa'aqtac, 'eeta': 'Eeta'am ñaqa'en aca ỹataqta no'on hiigo da selota'a na nhuo' le'ecpi na Judá, maye ca'ai ñaqa'en co'ollaxa ne'ena 'alhua da samaxa yem na'alhua na caldeopi. Nache ỹataqta saỹamaxareeta qome da selota'a, 6qataq ñepaxattalec, qataq ñe'eguelaxata qome ne'ena 'alhua. Qaq nache huaña qome ne'ena da qaica ca iueetaique, qataq saishet qome da qaltaq she'eguelaxa da selaxachigui namayepi, saañi qome namayepi, nache saishet da qaltaq ñapogosheguem. 7Qataq sanem qome da lauattonaxanaxac, da yaqto' aỹem ỹauattoota da nache Aỹem maye Aỹem Nataxala', qaq ne'ena nhuo' le'ecpi, nache ỹalamaxat qome, qataq nachaỹem Aỹem Ñatamnaxala', cha'aye namayepi ỹataqta imauec qome da lquiyaqteỹaxac da aỹem ñe'eguelaxa.
8Qalaxaye ñi Sedequías, ñim nta'a ye Judá, qataq na nataxala'pi qataq na laỹepi maye hueta'a ye Jerusalén, qataq nam hueta'a ne'ena 'alhua, huo'otaq nam neta'ague da Egipto, namayepi 'eeta'am ñaqa'en qome ana hiigo maye qauem, qaq souaxat da ỹataqta qauem nache saishet da qanallec. 9Qataq so'otec qome namayepi, cam ỹataqta ỹo'ot da lli'iỹaxa 'enauac nam ỹotta'a't shiỹaxauapi ana 'alhua, qataq namayepi qaica qome ca 'enec qanqa'en, qataq saqaỹaconeguet, qataq qauem qome ca talec 'enauac nam 'alhuapi maye selagaxaalec namayepi. 10Qataq ñamaxa qome namayepi ca alaataxac, qataq ca nqouaxa, qataq ca napiina, nache choche ivitta'a qome da qaica da 'oonolec ca no'onalec ne'ena 'alhua, maye sanem co'ollaxa namayepi, qataq som hua'au lta'alpi.»
