1Qaq so Nabucodonosor maye nta'a ye Babilonia, lỹatac 'enauac so nalleppi qataq nam ỹotta'a't shiỹaxauapi maye chegaqaña nam 'alhuapi maye ilotague' somaye, co'ollaq iloquiaxaatac ye Jerusalén, qataq 'enauac na huaqta'a't nỹecpi maye lauoreuapi yemaye, nache Ñim Nataxala' 'enapega so Jeremías, 'eeta': 2«Aỹem Nataxala' maye Natamnaxala' na Israel le'ecpi, 'am samaq da 'anqo'oneua'a ñi Sedequías maye nta'a na Judá, nache qonapega, qoneta: 'Eeta' da la'aqtac Ñim Nataxala': Aỹem so'ot qome da ñi nta'a ye Babilonia loxonec ne'ena huaqta'a't nỹecpi, nache ỹavigaxat qome. 3Qaq 'am saishet qome da 'auañoxot da 'ananeltaxaneguet da la'añaxac ñimaye, 'am noxonec qome, nache 'am qoỹaneua'a ñimaye, qaq qom ime da 'am qoỹaneua'a ñimaye, nache 'am qaỹaueegue qome da Babilonia. 4Qalaxaye na'aictaxa de'era 'am Sedequías maye 'am nta'a na Judá, ñaq 'ana'axaỹaxana da ỹa'aqtac, Aỹem Nataxala' 'am saxatem da saishet da 'am qairolec qome ca ỹeelonec da 'am qaỹalauat. 5Da 'al-leuaxa qome qalaq qaica camachaqca, qataq qaỹavigaxat qome na coraxat qom 'am qaỹatategueua'a, 'eeta'am da 'eetec da qaỹavigaxat na coraxat co'ollaq qaỹatategueua'a som hua'au 'arta'alpi maye hua'auñi da nta'alpi, nache qoỹeeta', qome: ¡Aicoue, 'am nataxala'! Qom qanayeetaigui da naquicoxo souaxat 'am. Qaq 'era da ỹa'aqtac, Aỹem Nataxala'.»
8Ñim Nataxala' qaltaq 'enapega so Jeremías, co'ollaq ime da so nta'a Sedequías ỹauo'o so naỹamaxataxac da naỹamaxate' 'enauac so shiỹaxauapi maye netaña ye Jerusalén, da yaqto' ỹaxanec na l-latacpi. 9Se'eso aỹamaxataxac nanettalec da 'enauac na huo'o na l-latac huo'otaq l-lata maiche hebreo le'ec, iuen da ỹaxanec, yaqto' qaica ca huo'o ca l-latac na maiche lauo' le'ecpi. 10Nache 'enauac so nataxala'pi qataq som shiỹaxauapi, ỹaỹamaxareeta se'eso aỹamaxataxac, nache ỹaxanec 'enauac so l-latacpi, nache saishet da qaltaq dequicto'ot da ỹamaqtac somayepi. 11Qalaxaye co'ollaq qaỹata'ague de'era, nache somayepi huo'o da ntogotaxac souaxat da ỹaxanec so l-latacpi, nache qaltaq ñe'eguelaxauo naqa'en da yaqto' do'onataxanot da l-latac somayepi. 12Qaq huaña, nache Ñim Nataxala' 'enapega so Jeremías, 'eeta': 13«Aỹem Nataxala', maye Natamnaxala' na Israel le'ecpi, so'ot co'ollaxa so ñaỹamaxataxac da ñaỹamaxate' som hua'au qarta'ailpi, co'ollaq ñeqateeguesop ye Egipto, yem huaña co'ollaxa da choche nlatacpi. Nache samaxalec co'ollaxa 14da ivireuga ye siete vi'i, nache ỹaxanec ca camachaqca nam hebreo le'ecpi maye qaimenot namayepi, qataq mashe seis vi'iye da do'onataxaatac. Qalaxaye som hua'au qarta'ailpi saishet co'ollaxa da Aỹem ỹalaxaguet. 15Qaq nagui qalaq qami' qanaralaxache da qarataxaqui nache qauo'oche dam aỹem saỹamaxareeta, da qa'axañeeuec na maiche qarhuo'oi le'ecpi maye qarlataqui. Qataq qauauo'oi so qanaỹamaxataxaqui, maye sauaachigui qanqa'eñi huaña añi atamnaxaqui maye ỹalamaqte. 16Qalaxaye co'ollaq qaỹata'ague de'era, nache qaltaq qanaralaxache da qarataxaqui, nache qaica ca naigui qanqa'eñi da Ỹe'enaxat, da qoñiỹapega nam qarlataquipi maye qa'axañeeuec co'ollaxa, da yaqto' qaltaq ñe'eguelaxauo da qaltaq qami' do'onataxanoto da qal-lataqui. 17Qaq ỹoqo'oye Aỹem Nataxala', shenapec: Qami' saishet da Aỹem qaualaqaiguet, cha'aye saishet da qa'axañeeuec nam qal-lataquipi maye maiche qarhuo'oi le'ecpi: Qaq ỹoqo'oye nagui Aỹem, qami' taleguete qome ñaqa'en ca alaataxac, napiina qataq ca nqouaxa, da yaqto' qami' ỹo'oteque da qami' deqaigalo 'enauac na nta'alpi ana 'alhua. Qaq 'era da ỹa'aqtac Aỹem Nataxala'. 18Qaq cha'aye souaxat da saqauyacñiỹapec da ñaỹamaxataxac, qataq saishet da qaupaquiilec da lataxac da aỹamaxataxac maye sauaachigui qanqa'eñi co'ollaq qanasachiigui, qaq ỹoqo'oye Aỹem so'ot qome da qoñiita'am ca huaca maye qaichiguingui na laiñi da yaqto' la'anaxat da aỹamaxataxac. 19Qaq nam nataxala'pi na Judá qataq na Jerusalén, qataq nam 'amaqtaqaicpi ltauapi, qataq na ntaxaỹaxanaxanecpi, qataq 'enauac nam quichiguingui co'ollaxa na laiñi soua laỹel so huaca, 20saneguet qome da lhuaqỹaxac na mpa'aguenaxauapi da yaqto' ỹalauat. ¡Qaq da lo'ocỹaxac qome namayepi, qalaq aloq na teguesanpi qataq na shiguiỹacpi maye huauec! 21Nataqa'en ñi Sedequías, maye nta'a na Judá, qataq 'enauac na ltauapi, da saneguet qome da lhuaqỹaxac na mpa'aguenaxauapi maye nachena na nalleppi ñi nta'a ye Babilonia, nam ỹaxaañi nagui da iloquiaxaatac. 22Aỹem samaxalec qome da ỹe'eguelaxalec da iloquiaxan ne'ena huaqta'a't nỹecpi, qaq da mashe loxonec nache ỹavigaxat. Qataq so'ot qome da toolec na laỹepi huaqta'a't nỹecpi maye ỹotta'a't naua nañalo na Judá, nache qaica qome ca netaigui. Qaq 'era da ỹa'aqtac Aỹem Nataxala'.»
