Jeremías 40

₁Ñim Nataxala' detaxaỹot so Jeremías co'ollaq so Nebuzaradán maye lataxala' nam nauaatalec so nta'a, mashe ime da isouec so Jeremías huaña ye Ramá, cha'aye so Nebuzaradán ilalec somaye da ỹalectaigui som shiỹaxauapi maye lma' ye Jerusalén qataq ye Judá maye qaỹauecpi co'ollaxa qaỹauega ye Babilonia da qaicoñe'.

₂Qaq so lataxala' so nauaatalecpi so nta'a, iỹotauga co'ollaxa so Jeremías, nache 'enapega, 'eeta': «Ñim Nataxala' maye 'Anatamnaxala', ỹa'axata'a co'ollaxa da namaxa ne'ena 'alhua de'era qauem, ₃qaq nagui ipacchigui dam la'aqtac co'ollaxa. Qaq de'era qami' taleguete souaxat da huo'o da qarasouaxashechi hueto'ot Ñim Nataxala' cha'aye saqaualaqaiguet co'ollaxa Ñimaye. ₄Ñaq 'aulogui nagui da aỹem ñeqat na 'arquet lcat maye 'ancoñetaxat. Qaq 'am da 'auauotaique da aỹem 'auca'ategue da saxague da Babilonia, nache qolaq, qaq aỹem 'am selo'ogue qome. Qalaxaye da saishet da aỹem 'auca'ategue, nache qaica ca 'eetec da 'ano'onañi. Cha'aye 'ena nam 'alhua, qaq maicheye ca 'arauela da 'anqo'ona da qonaña. ₅Qaq da 'auauotaique da 'avi'eguelaq, nache 'avi'eguelaxa ñi Gedalías maye llalec so Ahicam qataq laual so Safán, maye ñim nta'a ye Babilonia ỹanagui ñimaye da nta'a, da ilo'ogue ye huaqta'a't nỹecpi maye ỹotta'a't naua nañalo ye Judá, nache qono'ot qome ñimaye qataq ye maiche 'aralamaxat 'arhuo' le'ecpi. Qaq 'anqo'ona qome cam 'arauela.» Ime, nache so lataxala' na alleppi ỹauo'o so nme qataq so aloq so Jeremías, ime nache ncoyeguene'. ₆Qaq huaña nache so Jeremías jec da nqo'ona ye Mispá maye netaña so Gedalías, nache neto'ot somaye, qataq netaigui so shiỹaxauapi maye no'onaña co'ollaxa yi'iye 'alhua.

₇Qaq som 'amaqtaqaicpi nataxala'pi qataq so alleppi maye judiopi, maye ñaq netauga ye no'onaxa, la'axaỹaxac co'ollaxa da so nta'a ye Babilonia ỹanagui da nta'a da ilo'ogue ye 'alhua so Gedalías som llalec so Ahicam qataq da ipataxalec da ilo'ogue so ỹalleppi qataq so 'alpi qataq so ñaqpiolec maye llalaqpi som shiỹaxauapi maye ỹataqta choxoraqpi maye hueta'a yi'iye 'alhua, maye saishet co'ollaxa da qaỹauega ye Babilonia da qaicoñe', ₈nache somayepi jec lỹatac so lauo' le'ecpi da taỹa ye Mispá da nqo'ona so Gedalías. Qaq somayepi ỹalectaigui so: Ismael som llalec so Netanías, qataq so Johanán qataq so Jonatán maye llalqa so Careaj, qataq so Seraías som llalec so Tanjumet, qataq soua llalqa so Efay maye lma' ye Netofa, qataq so Jezanías som llalec so ỹale maye lma' ye Maacat qataq so nalleppi. ₉Nache so Gedalías ỹanem somayepi da la'aqtac, 'eeta': «Saishet qome da qayi'iitac da qanañañiỹot na caldeopi. Nache qoñiỹaña qome ne'ena 'alhua, qataq qanañañiỹot qome ñi nta'a ye Babilonia, yaqto' sana'aigue da qanachaalataxaqui. ₁₀Qaq aỹem sonaña na Mispá da yaqto' aỹem qartaxaỹaxanaxañequi da sepa'aiguet na caldeopi da nvita ne'ena. Qaq qami' qalaq qavi'iguelaqỹa nam nỹecpi maye qauacoñiỹa, nache qoviỹapegue' da qauaỹamaxache na lataxa, qataq na ala na nañiguishec qataq na aceite.» ₁₁Qaq nataqa'en na judiopi maye hueta'a ye Moab, Amón, Edóm, qataq na hueta'a na laỹepi 'alhuapi la'axaỹaxac co'ollaxa, da so nta'a ye Babilonia ỹasheetem na judiopi da huo'o na no'onaña ye maiche na'alhua, qataq da ỹanagui da nta'a so Gedalías da ilo'ogue somayepi. ₁₂Qaq nache 'enauac somayepi ñe'eguelaq ye Judá, chegoqchiguiña nam 'alhuapi maye taỹa co'ollaq nlagaxattac, huaña nache nachaateua'a so Gedalías maye hueta'a ye Mispá. Qaq nataqa'en somayepi huapegue' da ỹaỹamaxat nam lataxa, qataq nam qalota ala na nañiguishec.

₁₃Qaq so Johanán som llalec so Careaj, qataq 'enauac so laỹepi lataxala' so alleppi maye huetauga na no'onaxa, taỹa ye Mispá da yaqto' nauane' so Gedalías, ₁₄nache 'enapega somaye, 'eeta':

¿Saishet peta'a da 'auaỹaten da ñi nta'a Baalís maye lma' ye Amón, da namaq so Ismael som llalec so Netanías, da yaqto' 'am ỹalauat?

Qalaxaye so Gedalías saishet da ỹa'amaqten somayepi ₁₅Qaq huaña nache so Johanán, ỹoxotchiguiñi da 'enapega so Gedalías, 'eeta': Aỹem 'aua'aqta'a qome da ñeqo'ona da salauat so Ismael. Qaq saishet qome da huo'o ca ỹaỹaten da negue't cam ỹo'ot de'era. ¿Ta'ainco' taxa da sa'axasoqta'a somaye da 'am ỹalauat? cha'aye damaye ỹo'ot qome da nlagaxattac na Judiopi maye 'am datato'ot, qaq huaña qome nache nataqa'en nlaguiñi nam ñaq huo'o na Judá.

₁₆Qalaxaye so Gedalías ỹasateguet somaye, 'eeta':

¡Saishet qome da 'auo'ot de'era! ¡Cha'aye dam 'aua'axattac maye 'eetega huotaique ỹo'ot so Ismael, damaye saishet da 'eesa!