Da la'aqtac Ñim Nataxala' maye ỹanem so judiopi maye hueta'a ye Egipto
1Da la'aqtac Ñim Nataxala' maye nvita so Jeremías da yaqto' ỹanem 'enauac so judiopi maye hueta'a ye Egipto, som hueta'a ye huaqta'a't nỹecpi ye Migdol, Tafnes, Menfis qataq yem 'alhua maye pa'aigue da la'añaxa, 'eeta': 2«Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': ‹Qami' qauauañiichigui co'ollaxa 'enauac nam qauemsat maye talec ñaqa'en ye Jerusalén qataq nam laỹepi nỹecpi maye ỹotta'a't naua nañalo ye Judá. Qaq nagui qalaq nlachiguiñi yemaye nache qaica ca ishet da netaigui, 3souaxat nam qauempi maye ỹo'ot co'ollaxa, cha'aye Aỹem inogoqchet souaxat da natameetacot nam ỹaqa'a atamnaxala'pi, qataq ỹaatacot na lchenaxanaxat maye ama na laita som atamnaxala'pi, maye somayepi qataq qami', qataq som hua'au qarta'ailpi saishet da ỹauatton co'ollaxa. 4Qaq ỹataqta she'eguelaqtalec da samaq naxa som ỹamaxashecpi maye ỹa'aqtaxanaxanecpi da yaqto' qami' 'enapegalo da saishet da qauo'oche de'era maye seqaiga.
5Qalaxaye qami' saishet da Aỹem qaualaqaiguet qataq saishet da Aỹem qauqochiỹa, nda'a't da nache qoquiito'ot da qaỹa'añiitacot na qarchenaxanaxache maye ama na laita nam ỹaqa'a atamnaxala'pi. 6Qaq ỹoqo'oye 'eroigui da ỹalemataic, qataq da ỹayeloxo, nache nalaqaasheguem 'eeta'am ca norec da ỹavigaxat so huaqta'a't nỹecpi maye ỹotta'a't naua nañalo ye Judá, qataq so nqa'aicpi ye Jerusalén. Nache ỹataqta nlachiguiñi qataq toolec choche ivitta'a nagui.› 7Qaq nagui Aỹem Nataxala' maye Qaica ca Seqalanapec maye Aỹem Natamnaxala' na Israel le'ecpi, sheeta': ¿Ta'ainco' da maiche qanỹoqoitala't dam lta'araic qauem? ¿Ta'ainco' da qauo'ochec da ileu 'enauac na shiỹaxauapi na Judá, ỹelleppi, 'alpi, ñaqpiolec qataq ivira'a na cheta'ague da ñiguiñi, qaq ivira'a da qaica ca no'onañi? 8¿Ta'ainco' da Aỹem qanogoqcheche souaxat nam qauo'ocheetacpi, qataq qaỹa'añiỹot na qarchenaxanaxache maye ama na laita nam ỹaqa'a atamnaxala'pi ne'ena Egipto, maye qauanaiỹa co'ollaxa da qoñiỹalec? Qaq nam qauo'ocheetacpi nachena qome na maiche qami' ilaxachiguilo, qaq huaña nache qami' naloqnaxanaqa'ate nam qauem, qataq da qaica ca qara'amaqchiqui da qaualliquiitaigui 'enauac nam ỹotta'a't shiỹaxauapi ana 'alhua. 9¿Peta'a mashe qaucouaỹa'ai 'enauac nam qauempi maye ỹo'ot co'ollaxa so hua'au qarta'ailpi, qataq nam qauempi maye ỹo'ot so nta'alpi qataq aso lhuapi ye Judá, qataq nam qauempi maye qami' qataq ana qarhuaipi, qauo'oche co'ollaq huaña ye 'alhua Judá, qataq na nqa'aicpi ye Jerusalén? 10Qaq ivitta'a nagui da qami' saishet da qanaralaxache da qarataxaqui, qataq qaica ca qarcolanqai, qataq saishet da qaupaquiilec na ỹapaxaguenataxanaxacpi qataq na iqataxacpi maye qami', qataq som hua'au qarta'ailpi sanem co'ollaxa.
11Qaq ỹoqo'oye, Aỹem Nataxala' maye Qaica ca Seqalanapec, maye Natamnaxala' na Israel le'ecpi, shenapec: Mashe iuennataxac da ñanacot ca qauem da qami' taleguete ñaqa'en, qataq selaxachigui 'enauac ye Judá. 12Aỹem so'ot qome da na lca'alaxaicpi ye Judá, maye lhuennataxac da taỹa ye Egipto da nalec, namayepi huaña qome yemaye da 'enauac da qailaxachigui. 'Enauac qome da qailaxachigui na ñaqpiolec qataq na ỹepi ileuaigui qome ca alaataxac, huo'otaq ca nqouaxa, nache nmeneguet qome da naloqnaxanaxat dam qauem, qataq ca qaica ca la'amaqchec, qataq cam ỹo'ot da ncolanaxa da qailota'a. 13Sauo'o qome ca nhuaxanaguec na hueta'a ye Egipto, 'eeta'am ñaqa'en da nhuaxanaguec co'ollaxa ye Jerusalén da serolec so alaataxac, nqouaxa qataq napiina. 14Nache nam saq 'amaqtaq maye no'onañi na Judá, maye taỹa da naña ye Egipto, qaica qome ca ishet da naneltaxan, huo'otaq da nca'altauec. Qaq na'aictaxa da huotaique da ỹe'eguelaxa ye Judá da yaqto' naña yemaye, qalaq saishet qome da ỹañoxot. Nachaqcauate' caua sa 'amaqtache maye ishet da naneltaxa'n.»
15Qaq huaña, nache som shiỹaxauapi maye ỹaỹaten da aso lhuapi ỹaatacot naxa na lchenaxanaxat maye ama na laita na laỹepi atamnaxala'pi, qataq som laỹepi 'alpi maye ỹataqta qalota, qataq ỹalegueuo so judiopi maye netaña ye pa'aigue da la'añaxa ye Egipto, ỹasateguet so Jeremías, 'eeta': 16Qomi', saishet da salaxasoxoguet de'era qomi' 'andota'alo, maye qonetega la'aqtaxanaxac Ñim Nataxala'. 17Nacherata da nache qolaqto'ot da so'otaqtac dam mashe qarhuennataxac co'ollaxa da so'otaq. Nache qolaqto'ot da sanaqtacot na qarchenaxanaxat maye ama na laita, qataq na qarachetaqtaxanaxat lataxa añi atamnaxalate maye le'enaxat Nate'e na Piguem, dam ñanaguenaqto'ot da so'otaqtac choche ivitta'a nagui, qataq ỹo'ottac co'ollaxa nataqa'en so qarta'alpi, qataq so nta'alpi qataq so nataxala'pi, ye huaqta'a't nỹecpi maye ỹotta'a't naua nañalo ye Judá, qataq da huaña na nqa'aicpi ye Jerusalén. Cha'aye co'ollaq so'otaqtac de'era, nache qaica ca seuenaqtaique nam qonoq, qataq qaica camachaqca, qataq saishet da qomi' taleguete ca qauem, 18qalaxaye chegoqta'a co'ollaq saxanaxañi da sanaqtacot na qarchenaxanaxat maye ama na laita, qataq na qarachetaqtaxanaxat lataxa, añim Nate'e na Piguem, nache huo'o da lta'araic qarhuenaxanaxa, qataq so qarhuo' le'ecpi ilem na lqouaxa, qataq ileuaigui so alaataxac.
19Qaq nataqa'en so 'alpi, 'eeta': Qomi' naxa da so'otaq ana qarauole 'ayiiña huetalec ñaqa'enaq so lqui'i añi Nate'e Na Piguem, qataq da sanaqot añimaye na qarchenaxanaxat maye ama na laita qataq na qarachetaqtaxanaxat lataxa, qaq 'enauac namayepi da ỹaỹamaxareeta na qarhuapi. Qaq damaye nache qolaqto'ot da so'otaqtac.
20Huaña, nache so Jeremías, 'enapega 'enauac so ỹalleppi qataq so 'alpi maye lasataxac de'era nache, 'eeta': 21Qami', ¿peta'a qaupicheetega da Ñim Nataxala' saishet da noma de'era, huo'otaq da icoua'ai da qami' qataq som hua'au qarta'ailpi qataq som lta'alpi somayepi qataq so lataxala'pi, qataq 'enauac som shiỹaxauapi, da ỹaatacot co'ollaxa na lchenaxanaxat maye ama na laita, nam laỹepi atamnaxala'pi da huaña na huaqta'a't nỹecpi maye ỹotta'a't naua nañalo ye Judá qataq na nqa'aicpi ye Jerusalén? 22Qalaxaye Ñim Nataxala' mashe sa nalo'oguet co'ollaxa dam qauem, qataq deqaiga nam qauo'ocheetacpi. Qaq ỹoqo'oye yem qana'alhuai, nagui ỹataqta nlachiguiñi, qataq qaica ca hueta'a yemaye, nache nmeneguet da naloqnaxanaxat dam qauem, qataq cam ỹo'ot da ñi'iỹaxa da qailota'a. 23Qaq de'era qauem, maye qami' qoviitaigui nagui, damaye qami' taleguete souaxat da qaỹa'añiitacot na qarchenaxanaxache maye ama na laita nam laỹepi atamnaxala'pi, qaq nache huo'o da qarasouaxashechi hueto'ot Ñim Nataxala', cha'aye saishet da qaualaqaiguet nam lapaxaguenataxanaxacpi, qataq nam lqataxacpi Ñimaye, qataq saishet da qaupaquiiteleguete naua lamaxasoxonaxaco.
24Qaq so Jeremías, nataqa'en 'enapega 'enauac so shiỹaxauapi, qataq 'enauac so 'alpi, 'eeta': Ñaq qana'axaỹaxañiỹa dam la'aqtac Ñim Nataxala', 'enauac qami' Judá le'ecpi maye qoñiitaña na Egipto. 25Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'eeta': Qami' qataq ana qarhuaipi dam qanasaqaiuec naxa, qaq damaye nache ipacchigui da qauo'ocheetac naxa. Qami' qoñiỹapec da mashe qaỹa'añi da qara'aqtaqui da qaỹa'añiỹot na qarchenaxanaxachi maye ama na laita, qataq na qarachetaqtaxanaxachi lataxa añi Nate'e na Piguem, qataq qoñiỹapec da ỹataqta qapaquiitelec qome dam qara'aqtaqui. ¡Qaq damaye ỹaỹamaqchiguiñi, qaupaquiitelec qome da qaỹa'añi qara'aqtaqui! 26Qalaxaye 'enauac qami' Judá le'ecpi maye qoñiitaña na Egipto, ña qana'axaỹaxañiỹa dam ỹa'aqtac Aỹem Nataxala': San da ỹa'aqtac chegoqchigui dam 'amaqtaqaic ỹe'enaxat, da nam Judá le'ecpi saishet qome da qaltaq huo'o ca nasaqteguec da ỹe'enaxat, da hueta'a na Egipto da, 'eeta': ¡Nca'altauec Ñim Nataxala'! 27Cha'aye Aỹem qami' ñauaataleguete qome, da yaqto' qami' ñamaxalo ca qauem, qaq saishet da qami' ñamaxalo cam no'on. Qaq 'enauac na Judá le'ecpi maye netaña na Egipto, ỹataqta nmichiguiñi qome da ileu, ileuaigui ca alaataxac huo'otaq ca nqouaxa. 28Qaq ỹataqta saq 'amaqtache qome caua ishet da naneltaxa'n da huaigui ca alaataxac, nache caamaye quera'ai qome na Egipto da ỹe'eguelaxalo ye Judá. Qaq huaña nache nam no'onañipi co'ollaxa maye lma' ye Judá, nam naỹa co'ollaxa na Egipto, ỹaỹaten qome da chaq negue't cam ipacchigui ca la'aqtac, Aỹem huo'otaq namayepi.
29Qaq Aỹem Nataxala', qami' sanema qome dam la'anaxat dam ỹa'axat da ipacchigui dam ỹarenaxanaxac, da sauo'o qome ca qanhuaxanaguiiqui da qoviita'a ne'ena 'alhua. 30Aỹem saneguet qome ñi faraón Jofra, ñim nta'a na Egipto, dam la'añaxac na mpa'aguenaxauapi maye huotaique da ỹalauat ñimaye, 'eeta'am ñaqa'en da 'eetec so Sedequías maye nta'a ye Judá, co'ollaq saneguet da la'añaxac so Nabucodonosor maye nta'a ye Babilonia, som huotaique da ỹalauat somaye.
