1Qaq so vi'i cuatro da lo'onataxanaxac, da nta'a ye Judá so Joaquim, som llalec so Josías, qaq so Baruc som llalec so Nerías, co'ollaq ñaq ỹetteguiñi da na'aqtaxanaxac maye nasaqtauec so na'aqtaxanaxanec Jeremías, nache so Jeremías 'enapega so Baruc, 'eeta': 2«Qaq 'era da la'aqtac Ñim Nataxala' maye Natamnaxala' na Israel le'ecpi, 'eeta': ‹'am Baruc, 3'Am huo'o da 'anachoxoc souaxat da Aỹem maye Aỹem Nataxala', ñequigaxatec da 'araquicoxo qataq da 'anqui'ic. 'Am qonapec naxa da 'anasamñi souaxat da lta'araic 'anqui'ic, qataq da qaica ca 'anmataxac. 4Qalaxaye Aỹem maye Aỹem Nataxala', 'am sa'aqtaxanem da seshet da selagaxachigui nam ño'oxoosheguem co'ollaxa, qataq nataqa'en seshet da ñapoc nam saañi co'ollaxa. Qaq damaye naigui da 'enauac ne'ena 'alhua. 5Qaq 'am saishet qome da 'anmittaique ca lta'araic 'araỹamaxa, cha'aye Aỹem ñanacot qome cam qauem da talec 'enauac nam shiỹaxauapi. Qalaxaye 'am so'otec qome da nache 'anca'altauec maicheye cam 'aigue. Qaq da 'anachaalataxac nachera dam 'arhuotaxanaxat maye chegaqaigui ca alaataxac. Qaq 'era da ỹa'aqtac Aỹem Nataxala'.›»
