Noxonec ye Egipto huaña ye Carquemis
1Ñim Nataxala' detaxaỹot so na'aqtaxanaxanec Jeremías da ỹa'axat da 'eetec da taỹa'a som ỹotta'a't shiỹaxauapi. 2Qaq 'era da la'aqtaxanaxac da ỹa'axat da 'eetec da taỹa'a ye Egipto, qaq ỹactec da ỹalamaqchigui so nalleppi so faraón Necao som nta'a ye Egipto, maye hueta'a co'ollaxa ye Carquemis, maye hueto'ot na loigue so tala Éufrates, qalaxaye huaña co'ollaxa yemaye nache so Nabucodonosor maye nta'a ye Babilonia loxonec somayepi huetoigui so vi'i cuatro da lo'onataxanaxac da nta'a ye Judá so Joaquim som llalec so Josías:
3«¡Qauaỹamaxachiiñi ana qarpaqtaxanaqchipi!
¡Nache qoqui da qauloqui!
4¡Qauo'ocheelec na caipi!
¡Nache qaunocheelec namayepi!
¡Qaỹa'añiiñi ana alaataxaquipi aro'o, nache qanaloiñi!
¡Qaqueuoqui ana taquiaxaipi!
¡Qataq qaỹa'añiiñi ana npaqtaxanaqtepi!
5Qalaxaye ¿negue'to' dam selota'a?
Qaq souaxat da lcolanaxa, nache qosheta.
Nam alleppi qalaq laga't cha'aye noxonecpi,
qataq datauec nache saishet da namatapec.
¡Qaq 'enauaque naua pa'aiguelo huo'o da ncolanaxa!
Qaq 'era da ỹa'aqtac Aỹem Nataxala'.
6¡Nam ỹataqta qayaqaicpi qalaq saỹañoxot da datauec,
nam ỹataqta 'añaxaicpi qalaq saỹañoxot da naneltaxan!
Qaq huaña na pa'aigue da sheu' maye hueto'ot na loigue so tala Éufrates,
da pogolaxaañi nache huañi.
7¿Negue't nam 'ena maye nquictasheguem, 'eeta'am so tala Nilo,
'eeta'am ca 'etaxat da npaxanec, nache qaica ca iren?
8Qaq nachena na Egipto na nquictasheguem,
'eeta'am ca 'etaxat da npaxanec nache qaica ca iren.
Na Egipto 'enapec naxa:
‹Ñequictasheguem qome nache semattalec ana 'alhua,
qataq selaxachigui qome na huaqta'a't nỹecpi,
qataq nam netaiguipi namayepi.›
9¡Ñaq jec qome nam netalec na caipi! ¡Ñaq jec qome ana naigonapi!
Qataq jec qome na alaataxaicpi,
nam alleppi maye lma' ye Etiopía qataq ye Libia
ỹaatañi ana lpaqtaxanaqtepi,
qataq jec qome na alleppi ye Lidia maye ỹaỹaten da do'ogoxona na checnec!
10Qaq que'eca na'a'q nacheca ca lalamaxat Ñim Nataxala' maye Qaica ca Ỹaqalanapec,
que'eca na'a'q nache huaigui da ỹe'eguelaxateguet nam mpa'aguenaxauapi.
Ca ỹeelonec qalaq qalota qome ca ỹalauat
nache ivitta'a da nlaqtegue na ntago'q.
Cha'aye Ñim Nataxala' maye Qaica ca Ỹaqalanapec
ỹauo'o qome ca lta'araic lalaataxanaxac da huaña
ye 'alhua maye pa'aigue da sheu' maye hueto'ot na loigue so tala Éufrates
11¡Qami' nhuo' Egipto le'ecpi, qanqo'oñiỹa
qome ye Galaad da qauloỹaique ca qaratannaxanaxache!
¡Qalaxaye na'aictaxa da qalota ca natannaxanaxat da qaviñi,
qalaxaye qaica qome ca naigui,
cha'aye qaica ca natannaxanaxat ca ishet da qami' no'onaxa't!
12Nam ỹotta'a't shiỹaxauapi mashe ỹaỹaten da qaica ca qara'amaqchiqui
qataq imauec ana 'alhua da qaỹa'aqtega da qara'alaxaqui,
ñi 'oonolec nam alaataxaicpi qalaq ỹe'egueetega't ca maiche lỹa,
nache 'enauac da huañi hueta'aguet na 'alhua.»
So Nabucodonosor iloquiaxan ye Egipto
13Ñim Nataxala' detaxaỹot so na'aqtaxanaxanec Jeremías, co'ollaq so Nabucodonosor maye nta'a ye Babilonia, jec da iloquiaxan ye Egipto, 'eeta':
14«Qaua'aqtaxañim ye Egipto, qataq ye Migdol,
ye Menfis qataq ye Tafnes, qoñiita':
¡Ña qanaỹamaxache, nache qami' lhuotte' qome!
¡Cha'aye na ỹeelonec mashe anacta da qami' ilaxachiguilo!
15¿Ta'ainco' da huetaiya' so 'ara'añaxanec?
¿Ta'ainco' da saishet da nachattañi? Cha'aye Ñim Nataxala' ỹamaxañi.
16Na 'analleppi qalaq pogolaxaañi, nache huañi,
nache ñi 'oonolec 'eetega ñi lỹa, 'eeta':
¡Qolaqa'ai qome ne'ena, nache she'eguelaxasaxa
ye qana'alhua, yem 'alhua maye maiche qarañoqo' co'ollaxa!
¡Sataxaueguesop da alaataxac maye qaica ca qairen!
17Qaq huo'o na ỹa'alaqtai', 'eeta':
¡Ñi faraón choche lamtapigui! Ñim nta'a ye Egipto
qalaq mashe iqataqchet som ldaqa' da huo'o ca ỹo'ot.
18Qaq Aỹem maye Aỹem Nta'a, da ỹe'enaxat, 'eeta':
Nataxala' maye Qaica ca Ỹaqalanapec, san da ỹa'aqtac maye, 'eeta':
'Eeta'am añi qasoxonaxa Tabor da saishet
da 'ena'am ana laỹepi qasoxonaxapi
qataq añi qasoxonaxa Carmelo maye netaua'a na laỹe aso auaxai,
qaq nache 'eetec qome da anac na pa'aguenaxauapi.
19Qami' Egipto le'ecpi ñaq qanaỹamaxache,
cha'aye qami' qaỹaue'c qome, cha'aye na Menfis
ỹe'eguelaxa da toolec qome qataq nlachiguiñi
nache qaica ca ishet da nalec qome.
20Na Egipto qalaq 'eeta'am aca 'onaxai huaca llale,
qalaxaye chegaqa'ague qome da sheu' aca ncoga da inac.
21Nam nalleppi maye isheeten co'ollaxa da yaqto' itauan namayepi
qalaq 'eeta'am na chaxaraicpi huaca llalaqpi,
qalaxaye nataqa'en qome namayepi da datauec,
cha'aye mashe nvi' ca qauem na'a'q qataq ca laloqo' ca nhuaxanaguec.
22Na Egipto le'ecpi qom datauec, qalaq yo'oxonegue
'eeta'am ca na'araxanaq,
qom nayeetai' ca alleppi da iloquiaxan namayepi,
ỹauota'a aca nqachepe 'eeta'am da iquesoqtac ana qo'oipaqpi.
23¡Nache nquesoxoñi ye sansattec aviaq!
Qaq 'era da ỹa'aqtac Aỹem Nataxala'.
Cha'aye namayepi napacalec ye lcata ana shiiquioxoipi,
nache qaica ca ishet da naloqten.
24Qaq ye Egipto, qaica ca 'enec qome,
nache nam shiỹaxauapi maye chegoxogue da sheu' loxonec qome.»
25Ñim Nataxala' maye Qaica ca Ỹaqalanapec Ñim Natamnaxala' na Israel le'ecpi, 'eeta': «Aỹem sauo'o qome ca nhuaxanaguec ñi Amón, maye atamnaxala' ye Tebas, qataq ye Egipto cañe' ñaqa'en nam natamnaxala'pi, qataq nam lta'alpi, qataq ñi faraón qataq nam ỹa'amaqteetac ñimaye. 26Saneguet qome da lhuaqỹaxac nam npa'aguenaxauapi maye huotaique da ỹalauat namayepi, saneguet dam lhuaqỹaxac ñi Nabucodonosor maye nta'a ye Babilonia, qataq na nalleppi ñimaye. Qalaxaye qom qaỹata'ague de'era, nache ye Egipto ỹe'eguelaxa qome da qaltaq qanayenalec, 'eeta'am so hua'auchiguiñi. Qaq 'era da ỹa'aqtac, Aỹem Nataxala'.
Ñim Nataxala' nca'alaxatec qome so lalamaxat nhuo' le'ecpi
27Qalaxaye 'am Jacob, maye 'am ỹamaxashec saishet qome da 'añi'i,
'am Israel, saishet qome da huo'o da 'arcolanaxa,
cha'aye aỹem 'am ñeqateeguesop qome yem qaỹoqta 'alhua,
qataq ñeca'alaxateeguesop qome nam 'am chegoxoguetpi
ye 'alhua maye hueta'a nagui da ncoñeteguishecpi.
Qaq 'am Jacob 'avi'eguelaq qome nache qouetaigui da 'al-lagaxayec
qataq nquictasheguem qome da 'arsallaxa,
huaña nache qaica ca 'am iquichoqchettac.
28'Am Jacob, maye 'am ỹamaxashec saishet qome da 'añi'i,
cha'aye Aỹem 'am soota'aguet.
Qaq 'era da ỹa'aqtac Aỹem Nataxala'.
Qaq na'aictaxa da ñematchiguiñi qome
nam ỹotta'a't shiỹaxauapi maye 'aỹa ñaqa'en co'ollaxa.
Qalaxaye 'am saishet da 'am selaxachigui,
nacherata da 'am serolec da nalochiguiñi lataxac da 'am ñimit.
Qalaxaye saishet da sa sauo'o ca 'anhuaxanaguec.»
