Job 11

₂«Na qalota na'aqtacpi, ¿peta'a sa iueno' da qaỹasateguet?

Qataq ca taxaỹaxaic ¿peta'a saisheto' da qaica ca lasouaxashet?

₃Qalqo' 'aupi'itaxaatega da ne'ena 'ara'aqtacpi,

maye qaica ca naigui ỹo'ot da qaica ca detaqa da shenaqta,

qataq, ¿'aupi'itaxaatega peta'a da saishet da sasataxaguet ne'ena 'are'enaxanaxacpi?

₄'Am maye qoneta': ‹Na ỹapaxaguenataxanaxacpi ỹataqta ỹaỹamaqchiguiñi,

qataq ỹataqta qui'itta da ỹataxac.›

₅¡Qaq 'onaxaico' da Ñim Lo'onatac 'Enauacna

ishet da detaqa da yaqto' 'am ỹasateguet!

₆Nache Ñimaye 'am ỹapaxaguenec na saqcha'a naỹaanecpi,

maye ỹataqta huo'o da lqalaic da yaqto' qaỹaỹaten.

Huaña taxa nache 'am 'auaỹaten da Ñim Lo'onatac 'Enauacna,

saishet da ipaigui da ỹoqta 'anhuaxanaguec taxa.

₇¿Qaq 'am 'aupi'itaxaatega peta'a da 'aushet da 'aunoxoneua'a

na saqcha'a lhuennataxacpi Ñim Lo'onatac 'Enauacna?

¿Qalqo' 'aushet peta'a da 'avi' da 'auaỹaten ca ỹataqta

saqcha'a lataxac Ñim Qaica ca Ỹaqalanapec?

₈¿Qaq hua'ago' ca qonetec da 'avi' damaye,

ye ỹataqta napacalec na piguem ye lshequitcheguema?

Qataq ¿ca 'eeteco' da 'auaỹate'n naamaye?

Ye ỹataqta napacalec ye lshecchiguiña

ye loga't ca huetaña na lqui'ipi na leuaxaicpi.

₉Naamaye ỹataqta qalochiyiñi, napacalec ye lcachiguiñi ana 'alhua,

qataq napacalec ye lcateueegue aso auaxai.

₁₀Qaq da huo'otaq anac Ñim Lo'onatac 'Enauacna,

nache huo'o ca ỹaconeua'a da icoñi',

nache da huo'otaq deỹaxaasop da qanmit,

qaq, ¿negue't ca ishet da npaxata'aguet Ñimaye?

₁₁Qaq Ñim Lo'onatac 'Enauacna ỹauatton ca tenataxanaxaic,

qataq Ñimaye ila'a na qauemsat,

qalqo', ¿'aupi'itaxaatega peta'a da saila'a namayepi?

₁₂Qalaxaye que'eca na'a'q, qom deco'o aca 'ashena, da shiỹaxaua ca llalec,

huaña nache ishet da huo'o da laỹaanec ca qaica ca ỹaỹaana'a.

₁₃Qaq 'am da 'ano'onaxat da 'arquiyaqteỹaxac,

qataq 'aỹa'anoto naua 'arhuaxaye Ñimaye,

₁₄qaq da huo'o na 'arasouaxashetpi,

qalaxaye 'aỹa'axanec, qataq sa 'auashenem ye 'arma'

da huetaña na saỹaỹamaxañesat,

₁₅huaña nache da 'armeenaxanaxac qui'itta,

da huo'o ca 'auamata'a qataq ỹataqta qaica

ca 'am iraxanai', qataq qaica ca 'añe'etaique.

₁₆Huaña, nache 'aucoua'ai da 'anque'eenaxac,

qaq da 'auennate damaye, qalaq 'eeta'am 'anqa'en ca 'etaxat maye mashe ỹoxogue.

₁₇Nache da 'anachaalataxac ỹataqta 'eroigui,

'eeta'am na le'eraxa añi nala' da mashe na'a'q laiñi,

qaq na napalaxa qalaq 'eeta'am na yo'oqchiguiñi da mashe yo'oxoñi.

₁₈Huaña, nache 'avi'imaqtac, cha'aye huo'o da 'anaquitaxac,

qataq da 'auo'oche qalaq qaica ca 'andaqtaique, cha'aye 'am qanpaxattalec.

₁₉Da 'annaañi qalaq qaica da huo'o ca 'am icolanaqchettac,

nache qalota qome na 'am naỹa da nshetaique da 'aỹa'anem ca 'artaunaxanaxac.

₂₀Qaq nam qauemaicpi qalaq imeuo qome,

qataq saishet da ỹanata ca lle'eguenaqa',

huaña nache naquitta'a da maiche ileu.»