Job 12

₂«¡Qaica ca qami' iqolegue't da ỹataqta 'eesa qoviita'aguet na shiỹaxauapi,

qaq ỹoqo'oye da qaullivi, nache huaña da imeuo da naỹaanec!

₃Qalaxaye aỹem nataqa'en huo'o da ỹauattonaxanaxac,

qataq saishet da ỹapactec da aỹem qanapacỹalec.

¡Cha'aye negue'tom ca saỹaỹaten 'enauac de'era!

₄Qaq na'aictoxo' da qaica ca sasouaxat qataq ayem qui'itta,

qataq caillaye da seỹaxana Ñim Lo'onatac 'Enauacna qalaq aỹem ỹasateguet,

qaq nagui na sheetega ñauochaxauapi, qalaq nda'a't da aỹem ne'eetapigui.

₅Ca ipi'itaxaatega da ỹaỹamaqta da nachaalataxac,

nache ỹo'otan ca choxoraq,

qataq sa itena'a da ỹamaxañi ca mashe huotaique da huañi.

₆Qaq na cachaxaicpi qalaq lactapiguiñi hueta'alo naua lma'ate,

qataq na inogoqchettac Ñim Lo'onatac 'Enauacna,

qalaq qaica ca machaqca,

cha'aye ipi'itaxaatega da mashe huetaigui naqa'en na lhuaq lauel Ñimaye.

₇'Aunat qome na shiguiỹacpi yaqto' 'am ỹapaxaguen,

huo'otaq na maỹopi, yaqto' 'am da'aqtaxanem.

₈Nataqa'en 'aunat ana 'alhua, yaqto' 'am ỹapaxaguen,

qataq na nỹaq maye huetangui ana auaxai,

yaqto' 'am da'aqtaxanem.

₉Cha'aye negue't namayepi ca saỹaỹaten de'era,

cha'aye Ñim Lo'onatac 'Enauacna, nacheñi Ñim lo'onatac namayepi.

₁₀Na lhuaq lauel Ñimaye, nache huetaigui 'enauac na huo'o da lca'alaxa,

qataq naua la'a'che da nachaalataxac na shiỹaxauapi.

₁₁Da na'axaỹaqchec ishet da ỹauatto'n naua ỹotta'a't na'aqtaqa,

'eeta'am ñi nachaxat da ỹaỹaten ca ama qataq ca ñe'eua.

₁₂Na ỹa'axaiquipi huo'o na laỹaanecpi,

cha'aye da qaỹoqtec nachaalataxac namayepi,

nachera da ỹo'ot da laỹaanataxanaxac.

₁₃Qalaxaye Ñim Lo'onatac 'Enauacna ỹataqta ỹaanaxanaxaic, qataq 'añaxaic,

Ñimaye hueto'ot na nauattonaxanaxacpi qataq na naỹaanataxanaxacpi.

₁₄Ca nlaxaañi Ñimaye, nache qaica ca ishet da no'oxoosheguem,

nache 'ena'am da huo'o ca ỹapoua'a,

nache qaica ca ishet da ỹauateua'a.

₁₅Ñimaye da nllañi na auot, nache huo'o da lqaxaỹaxa ana 'alhua,

nache 'ena'am da anacot na auot, nache npaxaasheguem ana 'alhua.

₁₆Ñimaye hueto'ot da naỹaanec qataq na'añaxac.

Ñimaye ỹauatton ca qaỹatenachet qataq cam datenataxan.

₁₇Ñimaye ỹo'otec na ỹaanaxanaxaicpi da deqat na laỹaanataxanaxacpi,

qataq nam aloico lo'opi 'eco' huo'o da aloic naqa'en.

₁₈Ñimaye deuotaxanec da la'añaxac na nta'alpi,

qataq ỹo'otec da noxonec qataq huetauec naqa'en namayepi.

₁₉Ñimaye deuotaxanec da lo'onataxanaxac na ntaxaỹaxanaxanecpi,

qataq nqateeguesop da la'añaxac na 'añaxaicpi.

₂₀Na nqataxac lo'opi qalaq qaica naqa'en ca la'aqtac,

qataq deuotaxanec da qaica ca nqalaata'ai' na nqueroxonecpi.

₂₁Qataq ỹasaxalec da no'otanaguec na huo'o naq 'enec,

qataq nam 'añaxaicpi qaica naqa'en ca la'añaxac.

₂₂Ñimaye ỹo'ot da yo'oqchiguiñi na ỹataqta qaỹoqchiguiña napalaxa,

qataq nqatsheguem da yaqto' qaila'a na lpaqal maye huetaigui da nleuaxa.

₂₃Ñimaye ỹo'ot da nquictauec na ỹotta'a't shiỹaxauapi,

qataq ishet da nlaxaañi qataq da ilagaxattac

na ỹotta'a't shiỹaxauapi, qataq ishet da qaltaq laỹona't.

₂₄Ñimaye deuotaxanec da laỹaanataxanaxac na lta'alpi na shiỹaxauapi,

nache choche isomtac naqa'en, 'eeta'am da huetalec

ca toolec 'alhua maye qaica ca nqa'aic.

₂₅Huaña nache choche ipottapecra' naqa'en huetaigui na napalaxa,

ỹe'egottapigui' naqa'en 'eeta'am ca taxaic.