1Qaq 'enauac ne'ena ỹataqta sauaachigui,
qataq 'enauac da sa'aqchigui, qataq saỹateeteguet.
2Nam qauaỹachiñipi nataqa'en aỹem saỹaten,
qaq saishet da aỹem qanapacỹalec.
3Qalaxaye aỹem sauotaique da ỹoqta setaxaỹapegue' Ñim Qaica ca Ỹaqalanapec,
qataq ñeshetaique da ñecotaỹapegue' Ñim Lo'onatac 'Enauacna.
4Cha'aye qami', choche qami' tenataxanaxaiqa,
qataq 'enauac qami' natannaxanaqpi,
qalaxaye qaica ca qami' naiguilo.
5Qami' taxa da choche qañi'imaxachiita,
qaq nacheractaxa da ỹo'ot da qami' ỹaanaxanaxaiqa.
6Qaq nagui qana'axaỹaxañiỹalo naua itaxaỹaxaco,
qataq qana'axaỹaxañiichigui da shenapec.
7¿Qami' qaupichiitega peta'a da qavicheetapeguelec,
Ñim Lo'onatac 'Enauacna da qauo'oche' naua qaratenataxanaxacolle'?
Qataq, ¿qaupichiitega peta'a da qautauañi
da qauo'oche' naua qanashepegaxanaxacolle'?
8¿Qami' peta'a qaupichiitega da qavicheetapeguelec Ñimaye?
¿Qataq da qanpaxachiitalec Ñimaye?
9Qalaxaye, ¿chaq qoñiiteco' da qami' nmi't Ñimaye?
¿Qaushichi peta'a da qauatenachichi,
Ñimaye da 'eeta'am ca choche shiỹaxaua?
10Da qami' qanqañoxochiitañi da qavichiitapeguelec Ñimaye,
nache Ñimaye qami' saỹala'aque da qami' iviraxato'oto.
11¿Saisheto' peta'a da qami' icolanaqche't da la'amaqchec Ñimaye?
Qataq ¿saishet peta'a da qami' iviloxolaqche't da qarcolanqai Ñimaye?
12Naua lleco naua qara'aqtaqalle' qalaq 'eeta'am na alo da nlaguiñi,
qataq qaica ca la'añaxa'c 'eeta'am ca npaqtaxanaxat nshaxa.
13¡Qaq nagui, qaue'enaxañiitai', ñaq aỹem qauaqaita'a da setaqa,
na'aictoxo' cam souaigui!
14Aỹem mashe sa seren da ñachaalataxac,
na'aictoxo' cam 'eetec ca huaigui damaye.
15Na'aictoxo' da aỹem ỹalauat Ñimaye,
qalaxaye nache 'ena'am seuata'aguet,
yaqto' ishet da sataỹa'aguet Ñimaye,
da ñepaxaalec da ỹataxac.
16Qaq Ñimaye, nacheñi ñi aỹem nca'alaxatec qome,
cha'aye qaica ca 'etaxaloxoic da ishet da inoxoneua'a ca hueta'a Ñimaye.
17Qaq nagui qana'axaỹaxañiichiguilo naua ỹa'aqtaqa,
qataq qana'axaỹaxañiỹa dam shenapec.
18Cha'aye aỹem saỹamaxatchiguiñi qome ca itaxaỹaxac,
cha'aye saỹateeta da ỹaỹamaqchiguiñi da ỹataxac.
19Qaq da huo'o ca nshetaique da huo'o ca aỹem ỹasaxalec ỹasouaxashet,
nache aỹem saishet da setaqa nagui, choche sevitta'a da seleu.
20Qaq 'Am seỹaxanot da aỹem 'aỹa'anema naua dos maye seỹaxaneua'alo,
nache saishet da 'Am ñeqañoxocheesop:
21'Axaañi qome da aỹem 'auaxaatac,
qataq saishet da ỹaguec 'anqa'en da icolanaxa.
22Aỹem 'aỹaxana qome, nache 'Am sasateguet,
qalqo' sa'auñi da setaqa nache aỹem 'auasateguet.
23Ñaq aỹem 'aua'aqtaxanem, ¿chaq lcata na ỹasouaxashetpi
qataq na so'ot saỹaỹamaxañipi?
Ñaq aỹem 'auachaxana, chaq negue't na qauempi maye so'ot.
24¿Ta'ainco' ye aỹem 'anqañoxocheesop?
Qataq ¿ta'ainco' da 'eco' aỹem 'ampa'aguenaxaua?
25¿Peta'a 'aulaxachigui aca laue ana qo'oipaq da huetaiya'?
Qataq ¿'aucaatac peta'a ca 'auaqpi maye deqaqta?
26Ỹataqta huo'o da lqui'ic na ỹasouaxashetpi maye aỹem 'auasaxalecpi,
cha'aye aỹem 'auỹoqtalec na ỹasouaxashetpi co'ollaq ñaq aỹem nsoqolec.
27Ỹataqta 'aucoñetchiyiñi naua ichel,
qataq 'aulochiguilo naua iqauaxaqui',
qataq ỹataqta 'aualte' naua lliguiyiñi naua ỹapia'ate.
28Cha'aye 'enauac da shenaqta qomi' nlatrañi,
shenaqta'am ca nogoxot da mashe chec na lalaxat.
