Job 14

₁Ca shiỹaxaua ñiguiñi chegaqaigui aca 'alo,

camaye da nachaalataxac sa qaỹa'ague

qataq qalota na nque'eenaxacpi.

₂Camaye 'eeta'am aca lauoxo da dasovi, ime nache deqaqa,

'eeta'am na lpaqal da taỹa'a da pal.

₃¿Ta'ainco' da ỹalamaqchigui 'anqa'en da 'armeenaxanaxac

ne'ena shiỹaxaua qataq 'anauegueuo da yaqto' 'ancotaỹapegue'?

₄Cha'aye, ¿negue't ca ishet da nqatec ca qui'itta,

da ỹachegoxotaigui ca nshepaxan?

¡Qomye, qaica!

₅Naua na'axa'te qataq naua ca'agoxoiqa,

maye nachattaiguilo ca shiỹaxaua,

mashe 'auo'ot ye laloqo' da yaqto' saishet da napacalec.

₆¡Ỹoqo'oye 'anqateeguesop qome da 'armeenaxanaxac

camaye yaqto' ishet da lactapiguiñi!

¡Ñaq 'aua'axaỹa'a da machiguiñi da nachaalataxac

qataq da imatta ca lo'onatac ye na'a'q!

₇Da qaiquesoq aca qo'oipaq,

qalaq acamaye ishet da qaltaq ñaxatec,

qaq acamaye saishet da sa qaca aca llaxataxa.

₈Na'aictaxa da mashe lto naua lpa'aye,

qataq aca lamo da mashe ltoỹaigui ana 'alhua,

₉qalaxaye da ivita da noma'aguet

na laquitaxa na 'etaxat, nache ñaxatec,

nache huo'o ana lcouepi, 'eeta'am aca dalaxai qo'oipaq.

₁₀Qaq ca shiỹaxaua da ileu qalaq nache ỹataqta imeuo.

Qataq da ileu, qalaq ¿hua'ague ca taigue?

₁₁Qaq 'eeta'am da nchisheguem na 'etaxat aso auaxai,

qataq na tala da 'imñi, nache deqaqa,

₁₂qaq nache 'eeta'am ca shiỹaxaua da nnaañi,

nache saishet da qaltaq ñisheguem.

Qalaxaye da ñaq huo'o na piguem,

nache saishet da nlouec,

qataq saishet da ñisheguem souaxat na lo'ochaxa.

₁₃¡'Onaxaico' da aỹem 'oxooñi da huaña ca lma' na leuaxaicpi,

nache ivitta'a da inoxonec da 'aralemataic,

qaq da inoxonec damaye nache aỹem 'auennate!

₁₄Qaq da ileu ca shiỹaxaua, ¿peta'a ishet da qaltaq nca'alec?

Ỹoqo'oye 'enauaque naua na'axa'te,

de'era ñachaalataxac da seuataxaatac,

nache ivitta'a ca na'a'q da aỹem qaisouec.

₁₅Qaq da aỹem 'aỹaxana, nache 'Am sasateguet qome,

cha'aye 'anshetaique da 'aulo'ot nam lo'onatac naua 'arhuaxaye.

₁₆Qaq nagui da 'aulochiguilo naua iqauaxaqui',

nache saishet da 'aulotagui na ỹasouaxashetpi,

₁₇nache ỹataqta 'auapogoña da 'oxot na ñepe'enaxacpi,

qataq 'auapalaxat 'enauac na ỹasouaxashetpi.

₁₈Cha'aye 'eeta'am ana qasoxonaxa da qalagoxoñi,

nache nlaguiñi, nache na coma'pi ca'ai na netaña.

₁₉Qataq 'eeta'am na 'etaxat da ỹau na coma',

qataq na la'auaxac na auot da ỹache

na namoxoỹaxa maye huetalec ana 'alhua,

qaq nache 'eetec, da 'anlaxaañi da naquitaxac ca shiỹaxaua.

₂₀Qaq camaye nache 'eetai' da 'oxonec, nache imeuo 'anqa'en,

qataq 'ana'aqchet da lashiguiỹaxac,

ime nache 'auo'orauec.

₂₁Qaq da huo'o da ño'oxonnataguec ca llalaqpi,

qalaq camaye saishet da ỹaỹaten,

qataq da huo'o da ne'enaguec, ca llalaqpi qalaq saishet da nanoma,

₂₂qaq nacherata da lqui'ic da maiche lo'ocỹaxac maye nanomta'a,

qataq da nque'eenaxac da maiche nachaalataxac.»