Da ltaxaỹaxac so Elifaz
1Nache detaqa so Elifaz maye lma' ye Temán, 'eeta':
2«Ca ỹaanaxanaxaic da detaqa
qalaq saishet da nasaxauec ca la'aqtac maye qaica ca naigui,
qataq saishet da ỹashettaguilo naua ltaxaỹaxaco da 'eeta'ama na la'at,
3qataq da ncotatac qalaq no'oiteguelo naua 'ena'ape,
qataq sa detaxaiguilo naua na'aqtaqa maye qaica ca naiguilo.
4Qalaxaye 'am 'auo'ot da qaica ca 'enec qanqa'en Ñim Lo'onatac 'Enauacna,
qataq da qaica ca naigui qanqa'en da qanatamnot Ñimaye.
5Cha'aye naua maiche 'aye'etaxaloxoco
nachenaua na 'am ỹasouaxa't,
qataq naua 'ara'aqtaqa maye datenataxa'n.
6Qaq saiuen da sa'axat ca 'arasouaxashet,
cha'aye nam chegaqaigui na 'ap 'ara'aqtacpi
nachenaua naua 'auque'emaxama.
7¿Qalqo' 'aupi'itaxaatega da nache 'am,
da 'am la'auaxanec ỹale da 'am huo'o,
qataq da nache 'eetai' da 'am huo'o co'ollaq saxanaqaca ana qasoxonaxapi?
8¿Qalqo' nache 'am da 'aỹa'aatapeguema naua 'arqataxaco Ñim Lo'onatac 'Enauacna?
¿Huo'otaq da nache 'amta da 'am ỹaanaxanaxaic?
9¿Negue't cam 'auaỹaten maye qomi' saishet da saỹatenaq?
Qataq ¿negue't ca lỹa 'arauattonaxanaxac maye saishet da sauanaq?
10¡Qomi' mashe qomi' ỹa'axaiqa, qataq ỹapaga'q naua qarqaigo,
qataq huo'o na napacalec da llaxa so 'aralamaxat 'arta'a!
11¿Qache saisheto' da nalotañi da 'am icochaqtac Ñim Lo'onatac 'Enauacna,
qataq da huesotte' naua qara'aqtaqa da 'am setaxasoqtacot?
12¿Ta'ainco' da qoquetague' da maiche 'arquiyaqteỹaxac,
qataq da 'ettapoiguilo naua 'ara'ai'te da 'aralemataic?
13¿Ta'ainco' da ỹataqta 'aualemataỹa Ñim Lo'onatac 'Enauacna,
qataq 'aỹa'axaateueeguelo naua 'ara'aqtaqa?
14Qaica ca naigui ca shiỹaxaua maye chegaqaigui aca 'alo
da 'eetega qui'itta da lataxac, qataq da 'eetega qaica ca lasouaxashet.
15Cha'aye Ñim Lo'onatac 'Enauacna ye nataqa'en
na lalamaxatpi piguem le'ecpi da saishet da sa npi'itaxana,
qataq ivira'a na piguem, saishet da qui'itta naqa'en da imeteetac.
16¡Qaq ỹoqo'oye nataqa'en saishet da sa npi'itaxana
na shiỹaxauapi maye ỹataqta qauem qataq qaiqaiga da lataxac,
maye da ỹo'ottac na saỹaỹamaxañesat
qalaq 'eeta'am da nỹomigui na 'etaxat!
17Qaq ỹoqo'oye ñaq aỹem 'ana'axaỹana,
cha'aye huo'o da 'am sa'axatem,
nam lataxacpi maye mashe sevireguetpi,
18maye qomi' ỹapaxagueneque nam ỹaanaxanaxaicpi,
maye namayepi ỹachegoxoto'ot co'ollaxa so hua'au lta'alpi,
qaq nache saishet da ỹoxooñi.
19Qaq nachesota somayepi da Ñim Lo'onatac 'Enauacna
ỹanem co'ollaxa na 'alhua,
qataq qaica da ỹalecta'aguet nam ỹaqa'a ca chegaqa'ague.
20Da nachaalataxac ca shiỹaxaua qauemaic
qataq qaica ca iren, qalaq ỹataqta nque'etaxangui da nqui'ic,
qataq sa qaỹa'aguelo naua vi'iye da nachaalataxac.
21Qataq hua'aqtega na lta'araic nllimiaxa maye ỹo'ot da ncolanaxa,
qaq da ivita da ỹe'emaqtac, nache na cachaxaicpi decachiỹot.
22Camaye qaica ca naquitaxac da ỹet na napalaxa,
qataq taỹa'a da qairolec na ỹeelonec.
23Qataq isomtapigui', qataq tata'a da aloq na teguesanpi.
Qataq ỹaỹaten da taỹa'a da imeuo.
24Nache nque'etaxangui da ỹataqta lta'araic lcolanaxa,
'eeta'am ca nta'a da yaqta'a da qailoquiaxan.
25Qaq 'era da 'eetec cam dataỹa'aguet Ñim Lo'onatac 'Enauacna,
qataq cam nshegueetacot Ñim Qaica ca Ỹaqalanapec,
26nache huota'a aca lpaqtaxanaqte da nshegueetega
da nqapaxanot Ñimaye da delogui'.
27Qataq souaxat da chaxaraic da lashiguiỹaxac,
qataq ivira'alo naua da'am laỹel na lcheta.
28Nache camaye netaña qome ca huaqta'a't nỹecpi maye nlachiguiñi,
cam nỹecpi maye qanayeca'ai, souaxat da dolachigui.
29Qataq saqaỹauec da lsallaxa camaye,
qataq saishet da nquictauec ca lalamaxatpi ana 'alhua.
30Qataq na napalaxa saishet da ỹet camaye.
Camaye 'eeta'am qome ana qo'oipaq da ñaxatec,
qalaxaye ca norec ỹavigaxat ana lcouepi,
qataq aca lauoxo ỹache na la'at.
31Qaq ỹoqo'oye saishet qome da 'aua'amaqten ca natenataxanaxac,
cha'aye qoquetaua'a qome da 'am qaỹatenachetta.
32Cha'aye acamaye deqaqa qom ñaq saxanaxa da ivita ca laloqo',
qaq ana lcouepi saishet da ỹe'eguelaxa da ñaxatec.
33Qataq 'eeta'am ana uva lcheyec,
maye saishet da ivira'a da ỹe ana ala,
qataq 'eeta'am ana olivo da choche naañi ana lauoxo.
34Na qauemaicpi qaica qome ca llalec,
qataq na lma'pi qalaq da'aichigui
na chegaqaigui da lcachaxac, qalaxaye ca norec ỹavigaxat qome.
35Qataq namayepi 'eeta'am aca hualaxai,
qaq da deco'o nache deco'oic na qauemsat,
qaq da alaỹaxac qalaq ndotec da natenataxanaxac.»
