Qaltaq detaqa so Job
1Nache detaqa so Job, 'eeta':
2«¡Aỹem mashe qalota da sa'aqchigui na 'eeta'am ne'enapi!
¡Qaq qami' ỹataqta qaica da aỹem qaua'añaqchichi
nda'a't da aỹem qaucolanaqchichi!
3¿Peta'a qaico' ca loga't nam na'aqtacpi maye qaica ca naigui?
¿Negue't ca qami' saỹamaqche't da huo'omshe aỹem qauataita'aguet?
4Chaq 'eetec taxa ca qarataxaqui qami' da qoviita'a ye soota'a nagui,
nache aỹem nataqa'en ishettaxa da qami' setaqtacoto,
nache da seraxaatac na ỹaqaic da qami' llasheta'ape,
qataq qalota taxa na qami' sasaxaleguete ỹa'aqtacpi.
5Qalaxaye naua no'o'n ỹa'aqtaqa qami' ỹa'añaqche't taxa,
da yaqto' qami' qaramchiguilo qataq 'añaxaiqa.
6Qaq na'aictaxa da qalota na itaxaỹaxacpi,
qalaxaye saishet da ỹa'axaneguet da ñiqui'ic,
qataq da she'emaqtom qalaq saishet da ỹo'ot ca ỹamaicỹaxac.
7Qalaxaye Ñim Lo'onatac 'Enauacna
ỹataqta imeteuo naqa'en da ỹa'añaxac,
qataq deuotaxanec 'enauac na ñauochaxauapi.
8Qataq Ñimaye aỹem ipa'axanauo da aỹem icoñerai'.
Qataq ỹasaxalec aỹem na na'aqtaxanaxac saq'en,
qataq ỹo'ot da sataỹa'aguet na aỹem ỹasaxalec na saq'en ỹasouaxashetpi.
9Ñim Nataxala' ỹataqta aỹem icaatac qataq aỹem icolaxattac,
qataq aỹem icaatac, 'eeta'am na shiguiỹac da ỹectrauec na lhue,
ỹataqta aỹem ỹallichiguilo naqa'en naua la'ai'te
'eeta'am naqa'en da aỹem mpa'aguenaxaua.
10Na shiỹaxauapi qalaq lapona't da aỹem mpa'aguene',
qataq aỹem ỹe'eetac na shiỹaxauapi,
qataq iuaxanoigui na ỹashec da yaqto' aỹem ỹe'enai'.
11Ñim Lo'onatac 'Enauacna aỹem ỹaneguet da lhuaqỹaxac
na shiỹaxauapi qauemaicpi qataq laataxanaxaicpi.
12Qamaq aỹem selactapiguiñi, co'ollaxa
qalaq Ñimaye ỹaconot na ỹoqosot,
nache aỹem ivina't, qataq aỹem icolaxattac.
Qataq choche aỹem ỹaỹeetalec ana lchecnapi.
13Qataq chegoqteugalo naqa'en na aỹem ỹaỹeetalec ana lchecna,
ỹapacaviigui na ỹo'oc ana lchecnapi, qaica da aỹem ichoxonnai',
nache nlagaxattac naqa'en na iuel le'ecpi talec ana 'alhua.
14Qataq nacalec lỹa naqa'en na ique'emaxapi,
ỹataqta aỹem nqalgoqo'ot 'eeta'am na loquiaxaic.
15Aỹem nlaqchigui da ỹaquicoxo,
nache saayiñi soua aỹogo ỹasouaxaqui',
nache sa'areguet na ỹaqaic na 'alhua.
16Na ỹashec qalaq nalauat souaxat da ñenoinaxac,
qataq 'omaleguete naua ỹa'ai'te,
17Qaq na'aictaxa da saỹauanapega da huo'o ca so'otec ca qauem,
qataq ỹataqta no'oitegue da ñatamnaxac.
18¡Qaq 'am 'alhua, saishet qome da 'auapoleguete naua itago'q!
Qataq saishet da 'auapolec da iỹaxanaxac,
19qaq na piguem yo'oqta da huo'o ca ishet da aỹem itauan,
da aỹem detaqlec,
20da detaxaỹot Ñim Lo'onatac 'Enauacna da ỹa'axa't naua iuennataxaco,
da yaqto' Ñimaye ishet da ila'alo naua ỹache',
21cam ishet da detaxaỹot Ñim Lo'onatac 'Enauacna da aỹem detaqlec
'eeta'am naqa'en ca yo'oqchigui shiỹaxaua da detaqlec ca lỹa.
22Naua ña'axa'te maye ñaq huo'oi,
naamaye mashe inoxootrauec,
qataq saqaỹaloq da ashec, nache saishet da ñe'eguelaq.
