1Aỹem mashe imetrauo naua ỹa'a'che,
qataq ñayeetega ca ỹoga't, qataq aỹem iuattaique aca ñeuachiqui.
2Qaq na salecta'aguetpi, qalaq nda'a't na 'enaxanaxaicpi,
ye na'a'q qataq ye pe, qalaq semeteetac da nnogoqtaxanaxac.
3Qalaxaye 'Am Nataxala' ishet da aỹem 'ampaxaalec,
¿cha'aye negue'tom ca lỹa, ye nachaq'amta,
maye ishet da 'auo'ot de'era?
4'Am maye 'avi'itaxaloqchet da lauattonaxanaxacpi namayepi,
qaq saishet qome da 'auasheetem namayepi da aỹem loxonec.
5Qataq nque'etaxangui 'anqa'en qome na lqouaxa,
na llalaqpi nam ỹaconeguet ana nsheetenaqte,
souaxat da ỹe'enai' na nauochaxauapi.
6'Am maye 'auo'otec na shiỹaxauapi,
da 'enauac da aỹem ỹasaxalec na qauemsat,
qataq nqaigoxoigui na ỹashec.
7Naua ỹa'ai'te qalaq 'omaleguete souaxat da ñiqui'ic,
da ỹo'ocỹaxac qalaq ỹapo'ota, ndotrec naua ipi'ineqa.
8Qaq na 'onaxaic da lataxac, da ila'a de'era nache ỹe'elaq,
qataq na qaica ca ỹasouaxat, nachaañi da dataỹa'aguet na 'etaxaloxoicpi.
9Nache na no'on da lataxac, saishet da ca'ai da no'on llecỹaxac,
qataq na qui'itte' naua lhuaxaye nquicapeguec da la'añaxac.
10Qalaxaye ña qauanaqui nagui 'enauac da qoñiita,
yaqto' qauaỹaañi da qaica ca selalec
de'era qoñiita, ca huo'o na ỹaỹaten.
11Naua ña'axa'te qalaq mashe inoxootrauec,
qaq nam huotaique da so'otpi, qataq naua iuennataxaco,
qalaq saishet da ipacchiguilo.
12Qalaxaye qami' qoñiitega pe ye na'a'q,
¡qaq na'aictaxa da napalñi, qalaq qoñiitega
mashe saqaỹapeque ca yo'oqchiguiñi!
13Qaq aỹem qalaq nacherata da seuatta'a da seleu,
qataq da sootaigui na napalaxa da so'oche.
14¡Nache sheetega ita'a añi huachiqui,
qataq setaxaỹa da ỹate'e qataq iqaỹañecpi na qoche'lpi!
15¿Qaq chaq hua'ago' ca pa'aigue da ñaquitaxac?
Qataq ¿negue'tom ca ishet da ila'a?
16¿Peta'a iỹachiguiñi' qome damaye da saña ca huaña da nleuaxa,
da yaqto' sauaxasoqta't da souaqtaigui na 'alhua?»
