Qaltaq detaqa so Bildad
1Nache detaqa so Bildad, maye lma' ye Súah, 'eeta':
2«¿Chaq laguio' qaq 'axaañi da 'artaxaỹaxac?
¡Ña 'anlotec taxa yaqto' ishet da ña'aqtaxanaqta't!
3¿Ta'ainco' ye ỹataqta qomi' 'eeta'ama 'anqa'en ca shiguiỹac,
qataq qomi' 'eeta'ama 'anqa'en ca qaica ca ỹaỹaanapec?
4'Am maye maiche 'anlaxattapeguela't souaxat da 'aralemataic,
qalaxaye saishet da nachera da ỹo'ot da toolec naqa'en ana 'alhua,
qataq ana coma'pi da ca'ai ca netaña.
5Ca qauemaic qalaq 'om aca lcoỹaraxanaxaqui,
nache qaica ca le'eraxa ca l-le'.
6Aca lcoỹaraqte ca lma' qalaq 'om,
nache ca lma' saishet da 'ettalec.
7Naua lqauaxaqui' qalaq nquictrañi da la'añaxa'c,
qataq na lapaxañipi maye 'eetapeguecpi
nache maiche huañi naqa'en camaye.
8Qaq ca llec qalaq huetangui na ncoñetaxanaxat,
huaña nache lpachigui ca nqoinaxanaxat.
9Nache lpachiguilo naua nqonacamo que'eca ncoñetaxanaxat,
nache ỹataqta nllichiyiñi naua lapia'ate.
10Qaq ana'ana nqoinapi ỹataqta sa yo'oq da huetangui ca nqa'aic,
iuatta'a da pelec nache loxonec camaye.
11Qataq qaica ca saq hua'ague da narenaguec camaye,
nache ỹataqta datauec naqa'en camaye da lcolanaxa.
12Qaq da la'añaxac imeuo souaxat na lqouaxa,
nache taỹa'a da nlaguiñi camaye.
13Qaq da nalolaxa qalaq nchetteuo da taigui da lo'ocỹaxac,
qataq da nleuaxa qalaq coleetasheguemque
naua lhuaxaye qataq naua lapia'ate.
14Qataq ca lma' camaye qalaq ca'ai naqa'en da l-lagaxayec,
nache qaỹauogoleetaua'a ca lta'a da lchecỹaxac.
15Nache ca norec qalaq imattalec ca lma',
qataq ca quiquiaxaraic maye 'ettaigui talec ca logoxoshetpi.
16Qataq 'eeta'am ana qo'oipaq da daqaqte' naua lpa'aye,
nache 'enauac ana lcouepi qalaq deqaqa.
17Nache nam huetalecpi ana 'alhua
qalaq saishet da iuennatega camaye,
qataq da le'enaxat sa lỹa da qanasaxauec.
18Qataq qaỹachegoxottoigui na yo'oqchiguiñi,
da qaỹasaxauga na napalaxa,
qataq qaỹo'orauec, ca'ai qanqa'en ana 'alhua.
19Nache ỹataqta qaica ca lauo' le'ec da no'onañi,
qataq qaica da huo'o ca no'onalec ca lma' maye netalec co'ollaxa.
20Qaq na neta'ague da yo'oxoñi qataq da avit,
qom ỹaỹaten da huaigui camaye,
nache ỹataqta nlaqchigui da lcolanaxa.
21Qaq 'era da 'eetec da nachaalataxac ca qauemaic,
cam shiỹaxaua maye sa ỹauatton Ñim Lo'onatac 'Enauacna.»
