So Job qaltaq detaqa
1Nache so Job qaltaq detaqa 'eeta':
2Ña qana'axaỹaxañiichiguilo naua ỹa'aqtaqa,
yaqto' ishet da aỹem qaua'añaqchichi.
3Ỹataqta aỹem qana'añaxacheeguet qome da setaqa,
nato' qom ime da itaxaỹaxac, qaq maicheye da aỹem qavi'iñi.
4¿Qalqo' qaupichiitega da shectapeguelec ca choche shiỹaxauatto?
Qataq ¿ta'ainco' da qaupi'itaxañiitega, da imeuo da iualaxavic?
5Ñaq aỹem qauamachiỹo'ot yaqto' huo'o da qara'aalaqai,
nache qauapoiguilo naua qora'apilli'.
6Cha'aye da tachigui iuel naxa de'era,
nache ỹataqta huo'o da ỹaqaigaxa,
qataq ỹataqta dapoche na ỹo'oc.
7¿Ta'ainco' da queta da nca'altauec nam qauemaicpi,
qataq ivitta'a da lqueroxo, qataq nquictauec da lsallaxa?
8Qataq imeteetac da lañaxataxac na llalaqpi qataq na laualpi,
qataq ỹataqta machiguiñi da ỹalectaigui namayepi.
9Qaica ca ñe'etaique da hueta'a na lma'pi,
cha'aye Ñim Lo'onatac 'Enauacna saishet da ỹauo'o ca nhuaxanaguec namayepi.
10Na lalo huacapi, qalaq sa vi'iiguet da lco'oxoc,
qataq ana lalo huaca da deco'o, qalaq saishet da ileu na llalec.
11Qaq na ñaqpiolec maye llalaqpi namayepi
qalaq nqalgoqtac 'eeta'am na qagueta llalec,
12qataq machiguiñi, dasottac, qataq parenaxaatac,
do'onaxaata'ai' da l-lamaxa ana nviquepi,
qataquipi qataq ana nasheerepi.
13Qaq choche imeuo da nachaalataxac da qaica ca iueetac,
nache lactapiguiñi da tangui aca huachiqui.
14Qataq 'enapega Ñim Lo'onatac 'Enauacna, 'eeta':
«¡Ña qomi' 'aua'aqta'alo, cha'aye qomi'
saishet da sauoqtaique da saỹatena'q naua 'arqataxaco!»
15¿Negue't Ñim Qaica ca Ỹaqalanapec,
da nshetaique da so'onataxanaqtacot?
¿Negue'to' ca naigui da ñatamnaqtacot?
16Qalaxaye na qauemaicpi saishet da ỹoqta lalamaxat na hueto'otpi.
¡Ỹoqo'oye saishet da sheegue da lhuennataxac namayepi!
17¿Chaq laguio' co'ollaxa da 'om ana lcoỹaraxanaxaquipi ne'ena qauemaicpi?
¿Chaq laguio' co'ollaxa da nvira namayepi ca nque'eenaxac?
Qataq Ñim Lo'onatac 'Enauacna, ¿chaq laguio' co'ollaxa
da dalemataỹa namayepi, nache ỹauo'o da nque'eenaxac?
18¿Che laguio' co'ollaxa da ilagaxattac namayepi,
da 'eeta'am naqa'en na 'auaqpi, da ỹache ana daua'ache?
19Cha'aye qoỹenapec naxa, da Ñim Lo'onatac 'Enauacna
iqataxaatai' ca nhuaxanaguec na llalaqpi na qauemaicpi.
Qamaq nachena taxa na qauemaicpi
da ỹauo'o ca nhuaxanaguec yaqto' huo'o ca ỹaỹaten.
20Nache cam qauemaic maiche nque'etaxangui
da talec ca nhuaxanaguec, qataq da nque'etaxangui
da lalemataic Ñim Qaica ca Ỹaqalanapec.
21Cha'aye ¿ca 'eeteco' da iteetega ca lma' camaye,
ye mashe yaqta'a da ivita da ileu?
22Cha'aye ¿negue't ca ishet da ỹapaxaguen Ñim Lo'onatac 'Enauacna,
ye nacheñi ñi nmit na ỹataqta 'amaqtaqaicpi?
23Qataq huo'o na ileu da ñaq nsoqolec qataq no'oita,
qataq nalota't da la'añaxac da nachaalataxac qataq lactapiguiñi,
24qataq machiguiñi da sa qoue na aloq
qataq ỹataqta no'oita da nachaalataxac.
25Qataq huo'o na lỹachiguiñi' da nqui'ic da ileu,
qataq sa nauane' da machiguiñi.
26Qalaxaye 'enauac qome namayepi,
'eeta'a't da huangui aca huachiqui,
maye huaña da na qoche'l chec namayepi.
27Qalaxaye aỹem saỹateeta da qarhuennataqai da sheeta,
qataq naua qauema qarhuennataxacolli'
da aỹem qauque'emaqchichi.
28Cha'aye qoñiita' naxa:
«¿Chaq hua'ago' ca na'ague ca lma' que'eca huo'o naqye?
Qataq ¿chaq hua'ago' ca lma' de'era qauemaic?»
29¿Saisheto' naxa da qaunachiitac na queuoxoicpi?
Qataq ¿saisheto' naxa da qaua'aqaichigui na la'aqtaxanaxacpi namayepi,
30da ivita ca na'a'q da qanlaxaañi 'enauacna,
nache ca qauemaic nca'alec,
qataq da ivita ca na'a'q da nvi' ca nayeloxo, nache camaye nca'alec?
31Qalaq ¿negue'to' ca iviraxattega da qauem lataxac camaye?
Qataq ¿negue't ca ỹo'ot ca nhuaxanaguec souaxat na qauem maye ỹo'ot?
32Qataq da qairouga aca nhuachiqui,
qalaq qaỹauo'o na nauaatalecpi,
33qataq qalota na hua'auta dam taỹa'ague
qataq qalota na ca'attaueegue,
qaq camaye ỹataqta mateguet cam qaỹachaña 'alhua.
34¡Qaq shaco' da qansheetaique da aỹem qaua'añaqchichi!
¡Ye nam qoñiỹa'ape ỹataqta 'enauaque da saq'en'!
