So Elifaz qaltaq detaqa
1Qaq so Elifaz maye lma' ye temán qaltaq detaqa, 'eeta':
2¿Peta'a isheto' da huo'o ca shiỹaxaua ỹaanaxanaxaic,
nache Ñim Lo'onatac 'Enauacna ishet da huo'o ca naigui naqa'en camaye?
3Ñim Qaica ca Ỹaqalanapec, ¿negue'to' ca ỹachegoxotaigui,
da no'on da 'arataxac?
Qataq ¿negue't ca laueguec Ñimaye da qaica ca 'auasouaxat?
4¿Peta'a souaxato' da no'on da 'arataxac,
da huo'omshe ỹo'ot da 'anhuaxanaguec,
qataq da 'am nmit Ñimaye?
5¿Saisheto' peta'a da sa nachena,
na lta'araicpi qauem maye 'auo'ot,
qataq na 'arasouaxashetpi maye qaica ca loga't?
6Cha'aye na'aictaxa da qaica ca ỹasouaxat,
ca 'arqaỹa qalaq huo'o añi isheeten 'anqa'en,
qataq ivitta'a da 'auotaxanec na logoxotpi
na qaica ca ỹaañi, nache huetauec 'anqa'en.
7Na huo'o na laquip, qalaq saishet da 'aỹa'anem ca 'etaxat,
qataq na huo'o na lqouaxa, qalaq saishet da 'aỹa'anem ca aloq.
8¡Cha'aye 'am 'amaqtaqaic, qataq 'am ỹo'oxoraic
nache 'eco' 'aralamaxat na 'alhua!
9Ana pa'ai qalaq qaica ca 'aỹa'anem,
qataq ỹataqta 'anhuotta na qaicaua caua lta'al.
10Qaq ỹoqo'oye nagui, 'am coleesop na lcheguesat,
qataq 'avi'ilaqtapigui' souaxat da 'arcolanaxa.
11Qataq na napalaxa, saishet da huo'o naqa'en ca 'aula'a,
qataq na la'auaxac na 'etaxat 'am imoolec.
12Ñim Lo'onatac 'Enauacna, ¿peta'a
saq neto'oto' na ỹoqta pa'asheguem na piguem?
Ỹoqo'oye ña 'auamatasheguema ana huaqaañipi,
da ỹataqta qaỹoqotcheguema ye netaña.
13Qalaq ¿ta'ainco' da qonetega qaica cam
nanoma Ñim Lo'onatac 'Enauacna,
qataq na sa nsatchiguiñi lo'oc na piguem nqanaxat da huo'o ca nmit?
14Qataq ¿ta'ainco' da qonetega saishet da 'am ila'a
souaxat na lo'oc na piguem coleesop Ñimaye,
qataq souaxat da coleeteguelec 'enauac na piguem?
15¿Qalqo' 'anshetaique peta'a da qoquegue so togoshec nqa'aic,
maye quetague' co'ollaxa na qauemaicpi?
16Qalaxaye somayepi saqaỹaloq co'ollaxa da ileu,
'eeta'am ca ỹache na la'auataxa so tala da mpaxaasheguem.
17Qataq somayepi 'eetega Ñim Lo'onatac 'Enauacna, 'eeta':
«¡Ña qomi' 'aua'aqta'alo!»
¿Negue'to' ca ishet da qomi' ỹo'oteque
Ñim Qaica ca Ỹaqalanapec?
18Qamaq nacheñi co'ollaxa ñi nlaxatchiguilo naua lma'ate na logoxoshetpi.
¡Qaq ỹoqo'oye aỹem saishet da sheeguelo naua qauema lqataxaco namayepi!
19Ỹoqo'oye na no'on da lataxac da ila'a de'era nache machiguiñi,
qataq na qaica ca ỹasouaxat qalaq lashetac,
20souaxat da ila'a da lsallaxa na qauemaicpi da imeuo,
qaq na no'onañi ỹavigaxatta ca norec.
21Qaq ỹoqo'oye 'am Job, 'avi'eguelaxa qome
da 'anmane' Ñim Lo'onatac 'Enauacna,
yaqto' 'am ỹe'eguelaxatot qome da qaica ca 'aueetac.
22'Aua'aqta'a qome da 'am ỹapaxaguen Ñimaye,
qataq 'oxochiguilo añi 'arquiyaqte
naua la'aqtaqa Ñimaye.
23Cha'aye da 'avi'eguelaxa Ñim Qaica ca Ỹaqalanapec,
huaña nache ca'ai naqa'en ye 'arma' na que'eenaxacpi.
24Qataq da 'auasaxalec na 'alhua na oro maye 'aralamaxat,
nache 'am taỹot ca ỹataqta qalota oro,
'eeta'am ana qalota coma' maye huetangui so tala.
25Nache Ñim Qaica ca Ỹaqalanapec,
nacheñi qome ñi 'eeta'am 'anqa'en na oro,
qataq na plata maye chochaq huañi.
26Qaq Ñimaye, nacheñi ñi ỹo'ot da 'aramaicỹaxac
qataq ishet da 'auamato'ot Ñimaye.
27Nache da 'anatamnot Ñimaye,
qalaq ishet qome da 'am hua'axaỹa,
qataq ishet da 'aupacchigui ca 'aỹa'anot 'ara'aqtac.
28Qataq da huo'o ca 'auo'ot qalaq ishet da ipacchigui,
qataq da 'icỹaxac ỹataqta yo'oqoolec.
29Cha'aye Ñim Lo'onatac 'Enauacna huetaiya' naqa'en ca ño'oxonnaxaic
qataq nauaxaỹaxaasheguem ca sa na'amaqten.
30Cha'aye Ñimaye nca'alaxatec ca qaica ca ỹasouaxat,
qaq nache 'eetec nataqa'en da 'am qui'itta
qataq qaica ca 'arasouaxashet.
