Qaltaq detaqa so Job
1Qaltaq detaqa so Job, 'eeta':
2Nagui qaltaq she'eguelaxalec da ñasaxarec naua quia'aq ỹa'aqtaqa souaxat da ñiqui'ic,
cha'aye Ñim Lo'onatac 'Enauacna ỹataqta sa ỹala'ac da aỹem iuaxaatalec.
3¡Llaxaso'o' da saỹaten ca netaña Ñim Lo'onatac 'Enauacna,
nache ñeqo'ona taxa ca netaña Ñimaye!
4Nache seroua'a taxa Ñimaye dam souaigui,
nache ỹataqta sa'aqtaxaatem Ñimaye.
5¡Huaña taxa qaq saỹaten ca lasataxac
qataq saỹateeteguet ca la'aqtac Ñimaye!
6Qalaxaye yo'oqta da saishettaxa da aỹem irolec da la'añaxac Ñimaye,
da aỹem ncotaỹapegue' nachaqrata da aỹem na'axaỹaxana,
7cha'aye camachaqca shiỹaxaua no'on da lataxac,
ishet da da'aqtaxanem Ñimaye ca huaigui,
huaña taxa nache qaica naqa'en ca ỹasouaxashet,
qataq huesochiguiñi naqa'en aỹem.
8Qaq da saigue da nala' lliguisheguem da ñimittaique,
qalaq saishet da hueta'ague damaye,
qataq da ñimitegue da nala' lliguiñi,
qalaq ñaq 'eetalec saishet da sanata.
9Qataq da saigue da sheu' qalaq ñaq 'eetalec sa sela'a,
qataq da saigue da la'añaxa,
qalaq ñaq 'eetalec saishet da sanata.
10Qalaxaye Ñimaye ỹauattoota 'enauac da iqauaxac,
qaq da aỹem ỹe'eguen, nache sheeta'am ca ndotec oro.
11Cha'aye aỹem ỹataqta shectegue da llecỹaxac,
qataq saishet da saỹoxouec da sheca'ai Ñimaye.
12Qataq ỹataqta saishet da saxaarec naua lamaxasoxonaxaco,
qataq ỹataqta saỹamaxatteque naua la'aqtaqa.
13Ñimaye da huo'o ca huotaique da ỹo'ot
qalaq qaica ca ishet da nqanaxat,
cha'aye ca 'eetapeguec da ỹo'ot, qalaq ipacchigui da ỹo'ot.
14Qaq da nshetaique da aỹem ỹo'otec Ñimaye,
nachera da ipacchigui da aỹem ỹo'otec,
nataqa'en 'enauac nam laỹepi maye 'eeta'am de'era.
15Qaq ỹoqo'oye ỹataqta huo'o da icolanaxa Ñimaye,
qataq naxa da tachigui ye iuel,
nache ỹataqta aỹem nlaqchigui da icolanaxa.
16Ñim Lo'onatac 'Enauacna ỹo'ot da lcopchaxac añi iquiyaqte,
Ñim Qaica ca Ỹaqalanapec ỹataqta aỹem iviloxolaqchet.
17'Onaxaictoxo' co'ollaxa da nachena na napalaxa da imeuo, naqa'en aỹem,
qataq nachenactaxa ne'ena napalaxa da aỹem ỹapolec.
