1Cha'aye Ñim Qaica ca Ỹaqalanapec,
saishet da ỹauo'o ca laloxoqui da huo'o ca ỹo'ot,
da yaqto' na nauochaxauapi sa ỹaỹaten
ca na'a'q da huo'o ca ỹo'ot Ñimaye.
2Na qauemaicpi qalaq nqochenaxat na loga't na no'onaxapi,
qataq decachiỹa ana qagueta da yaqto' nquiguec ana lalopi.
3Qataq deuotaxanec na lalopi 'ashenapi na qaicaua caua lta'al,
qataq ipatanauo naqa'en na lauegaxanaxala' huacapi ana pa'aipi.
4Qataq ca'ai naqa'en so nqa'aic na huo'o da lhuenaxanaxa,
qataq nqañoxooñi naqa'en na choxoraqpi.
5Na choxoraqpi qalaq 'eeta'am na 'ashenapi
aviaq le'ec maye huetalec na toolec 'alhua,
namayepi huo'o da lhuogoxo 'ottauec da ilotaique ca loxonec,
qataq ỹachegoxottapeguelec na toolec 'alhua na aloq na llalaqpi.
6Qataq nqattac na ala na ỹaqa'a nanaxanaqa'
qataq nqattac ana ala ana uva maye lañiguishe na qauemaicpi.
7Qataq ye pe qalaq qaica ca napogoña,
souaxat da qaica ca logoxot, qataq qaica
ca depaqtaxana da mpaxateguet na latomaxa.
8Na auot maye chegaqalec ana qasoxonaxapi qalaq dapapta naqa'en,
nache huaxaỹot ana coma'pi da nmittaique ca lla'aqa'.
9Na qauemaicpi qalaq nqateeguesop da l-llepaxac na qaica ca lta'a,
qaq na choxoraqpi qalaq ipatanauo naqa'en na lalamaxat.
10Na choxoraqpi qalaq huetauec naqa'en da queuotapigui',
qataq iỹoqtac na trigo qalaxaye ilem naqa'en na lqouaxa.
11Qataq iconnaxaatapigui naqa'en
na namaicnaxanaxat coma' da yaqto' ỹo'ot na aceite,
qataq petapigui ana uva da nlomtac na lli'i,
qalaxaye nache 'ena'am ilem na laquip.
12Qataq ỹataqta qaỹoqta na huaqta'a't nỹecpi,
qalaxaye qaỹa'aqtega da la'alaxac na ileetapigui'pi maye netaigui,
qataq ỹataqta na'alaqtapiguiñi da nỹeetac na que'emaxaicpi,
qalaxaye Ñim Lo'onatac 'Enauacna saishet da hua'axaỹa da natamnaxac.
13Huo'o na ỹataqta sa nqopita na yo'oqchiguiñi,
qataq saỹauatton na llecỹaxacpi Ñim Lo'onatac 'Enauacna.
14Na laataxanaxaic ỹataqta no'ottasheguem,
da yaqto' ỹalauat na choxoraq, qataq na huo'o da lhuenaxanaxa,
qaq da pe qalaq nañigui cachaxaic.
15Qaq na lauatapiguiñi' ana sa lhua qalaq iuatta'a da napalñi,
nache ỹataqta ỹapotelec na lashec,
nache deuennataxaatac 'eeta':
«Yaqto' qaica ca aỹem ỹauangui.»
16Qaq na cachaxaic qalaq taigui na nỹec ye pe.
Qaq ye na'a'q qalaq 'enauac namayepi napotala't,
ỹataqta saisheteguet na yo'oqchiguiñi.
17Na le'eraxa na yo'oqchiguiñi qalaq 'eeta'am naqa'en na napalaxa,
ỹoqo'oye ipactega ye pe maye huo'o da lchec.
18Na qauemaic qalaq sailaua'ague
da huaỹoxon naqa'en na la'auataxa na 'etaxat.
Ca na'alhua ỹataqta huetalec da nhuaxanaguec,
qataq qaica da huo'o ca ỹe'eguelaxalec da ỹaalec ana lañiguishe uva.
19Na ntap da qaicaua naua auo'oche,
nachena na quiguiñi naqa'en ana aloñi,
qataq ana huachiqui, nachana ana pal naqa'en ca 'etaxaloxoic.
20Qataq aca lalamaqte late'e camaye qalaq icoua'ai,
qaq na qoche'l qalaq chec qome camaye,
qataq ỹataqta qaica ca iuennata'a qome camaye.
Ca qauemaic hua'axañi qome
'eeta'am aca qo'oipaq da qaiquesoqot.
21Qataq ana 'alo maye sa deco'o, qalaq sairen,
qataq ana pa'ai, saishet da itauan.
22Qalaxaye Ñim Lo'onatac 'Enauacna,
irolec da la'añaxac da ỹamaxañi na 'añaxaicpi,
da ivita da huo'o ca ỹo'ot qalaq qaica da huo'o ca nca'altauec.
23Ñim Lo'onatac 'Enauacna hua'aqta'a namayepi da qaica ca ivittaique,
qalaxaye ỹataqta naua'n naua lqauaxaqui'.
24Qataq cara'acolec naqa'en da nauaqsheguem nam qauemaicpi,
qalaxaye saqaỹaloq da qaica.
Namayepi deqaxaỹañi 'eeta'am ana huoue da qanapoc,
qataq 'eeta'am na ala na trigo da qaicheguec.
25Qaq da saishet da nache 'eetec de'era,
qaq ¿negue't ca ishet da 'enapec da saq'en da shenapec,
qataq ishet da ỹa'axat da saq 'eesora naua ỹa'aqtaqa?
