Job 30

₁Qaq nagui nda'a't da aỹem ne'eetapigui na nsoxoppi,

qamaq saishettaxa da ñasheeteguet co'ollaxa so lta'alpi,

da yaqto' ỹalecta'aguet ñaqa'en na ilo pioxoppi,

maye ilotague' ana ilo qaguetapi.

₂Cha'aye ¿negue'to' ca naigui ñaqa'en,

da la'añaxac naua lhuaxaye somayepi?

Ye naua lhuaxaye somayepi mashe imeuo da la'añaxac,

₃souaxat na lta'araic lqouaxa qataq da lhuenaxanaxa.

Nache ye pe qalaq ndauec da huetauga na toolec 'alhua,

nache choche iuactac na lpa'a' deqaqta,

₄qataq huetauga na ỹapogoñi, da napoctac ana huoue maye chem,

qataq ivira'a da chectac na lpa'a' ana qo'oipaqole.

₅Namayepi qaỹo'orauec co'ollaxa,

ca'ai qanqa'en na laỹepi shiỹaxauapi,

nache qaỹa'alaqtalec da qaicaatac,

'eeta'am qanqoỹen na cachaxaicpi,

₆ỹoqo'oye netaigui naxa na auacpi, qataq na la'auaxac deqaqta,

qataq neto'ot na tocotpi ana coma',

₇nalacotapiguishiguem naxa da huetaigui na nlot ato',

qataq lapoota'a't huetaigui na huouesat.

₈Ne'ena ỹalleppi qaica ca naigui, 'eeta'am da qaica ca lta'a,

ỹataqta saq taiguet da netalec ne'ena 'alhua,

ỹoqo'oye qaiuaxaatalec da qaỹo'orauec.

₉Qaq nagui qalaq namayepi aỹem ne'eetapigui,

qataq ỹo'o't naua lame'ete da aỹem ỹa'axaỹaqchectac,

₁₀qataq ỹataqta aỹem deqaiga, nache aỹem ca'ai,

qataq ivira'a da nqaigoxoigui na ỹashec.

₁₁Qaq nagui da Ñim Lo'onatac 'Enauacna ỹataqta aỹem ỹachetaiya',

nache namayepi aỹem nalalec da qaica ca shenec naqa'en.

₁₂Qataq huetaua'a na aỹoic namayepi da aỹem ipa'agueetac,

nache souañi naqa'en qataq aỹem iloquiaxan,

nache huotaique da aỹem ỹalauat,

₁₃Qataq nlaxaañi so ñeqa'aic,

qaq souaxat da qaica ca aỹem itauan,

nache aỹem iqopiilec namayepi da aỹem ilaxachigui.

₁₄Nache namayepi anac 'eeta'am da natoigui ca lauac na coma',

da aỹem nparenaxaneuga, nache qaica ca 'ena'am da l-lamaxa.

₁₅Nache na ỹo'ot da ncolanaxa aỹem talec,

nache da ỹo'oxoyec imeuo, 'eeta'am da ỹache na la'at,

qataq da isallaxa qalaq 'eeta'am na lo'oc da huaỹoxon.

₁₆Qaq nagui mashe huotaique shetauec da ñachaalataxac,

cha'aye naua na'axa'te da ñeque'eenaxac mashe sogote da aỹem loxonec.

₁₇Qaq ye pe qalaq ỹataqta ỹapacaviiguilo naua ipi'ineqa da ñiqui'ic,

nache qaica ca loga't de'era ñiqui'ic.

₁₈Qaq da la'añaxac Ñim Lo'onatac 'Enauacna ỹataqta aỹem lpachigui,

nache aỹem 'ogaxaic naqa'en 'eeta'am da ichegaxateuo na iqosot na ilomaxaqui.

₁₉Ñimaye ỹataqta aỹem ỹasaxauga na nshaxa,

nagui nache sheeta'am na 'alhua qataq na alo.

₂₀'Am seỹaxaatacot 'Am Ñatamnaxala',

qalaq saishet da aỹem 'auasateguet,

'Am ñachoxoreetacot qalaq qaica da aỹem 'auqocha'a.

₂₁Ỹataqta 'Am qaramchigui, saishet da aỹem 'auchoxonnai',

aỹem 'aurolec da la'añaxac na 'arhuaq da aỹem 'auloquiaxaatac.

₂₂Aỹem 'aurolec da la'añaxac na la'at da aỹem 'anaỹoqoosheguem,

nache aỹem 'auasaxauga na la'ana't la'at.

₂₃Qaq aỹem saỹateeta da 'anshetaique

da aỹem 'auasaxangui aca huachiqui,

añim loga't 'enauac na huo'o da lca'alaxa.

₂₄Qamaq aỹem saishet co'ollaxa

da she'eguelaxattec naxa na choxoraqpi,

da huo'o ca iueetaique qataq iỹaxaataique ca ntaunaguec.

₂₅¿Peta'a saisheto' co'ollaxa da ñeỹeetapeguelec na huo'o da nque'eenaxac,

qataq saisheto' peta'a da sa sechoxoren nam huo'o da lhuenaxanaxa?

₂₆Qaq co'ollaq seuattaique da ỹamaicỹaxac, qalaq nda'a't da anac na qauem,

qataq seuattaique ca yo'oqchiguiñi,

qalaq nda'a't da anac na napalaxa.

₂₇Añi iquiyaqte qalaq saishet da vi'iiguet da lasotaxa,

souaxat da aỹem iuatta'aguet ca na'a'q maye huetoigui ca ñeque'eenaxac.

₂₈Qataq da ñachaalataxac, lta'araic da laquicoxo,

qataq añi nala' saishet da aỹem icoỹarelec,

qataq ñachaateua'a na ỹalecta'a'tpi da seỹaxaataique ca ñetaunaguec.

₂₉Sevira'a da 'eco' ỹaqaỹañicpi na shiguiỹacpi dequi'iỹapec,

qataq 'eco' ñauochaxaua na mañecpi.

₃₀Da ỹo'ocỹaxac qalaq ỹataqta naue' qataq nmetapiguiñi,

qataq naua ipi'ineqa ỹataqta 'eroiguilo souaxat na ỹe'eraxa.

₃₁Aso ivique arpa, qalaq 'eco' noinaxac da l-lamaxa,

qaq aso ỹasheere, qalaq 'eco' naquicoxo da l-lamaxa.