Da ltaxaỹaxac so Eliú
1Huaña nache se'esoua tres ỹale't, co'ollaq ilora'a so Job, da ñe'eguelaxattasheguem da 'eetega qaica ca ỹasouaxat, nache ỹaxaayiñi da ỹasattrapeeguet somaye. 2Nache so Eliú, maye llalec so Baraquel, som lma' ye buz, maye chegoxoguet so Ram, somaye ỹataqta dalemataỹa so Job, souaxat da 'eetega qaica ca lasouaxashet, da hueto'ot Ñim Lo'onatac 'Enauacna. 3Nataqa'en dalemataỹalo soua tres nauochaxau' so Job, souaxat da sa ỹaỹate'n ca 'eetec da ỹasatreguet somaye, nache choche ỹo'o't da Ñim Lo'onatac 'Enauacna ỹauo'o da nhuaxanaguec somaye. 4Qaq cha'aye so Eliú ñaq nsoqolec, saq 'ena'ama soomaye da mashe ỹe't, nache iuata'alo da ỹaxaayiñi da detaqtracot so Job, 5qalaxaye co'ollaq ila'a da soomaye saỹaỹate'n ca llec ca la'aqta'c da ỹasatreguet so Job, nache ỹataqta 'eroigui da layeloxo, 6nache detaqa so Eliú, som llalec so Baraquel, maye lma' ye Buz, 'eeta':
«Cha'aye ñaq aỹem nsoqolec, qaq qami'
ye mashe qami' ỹa'axaiqolqa, ỹoqo'oye huo'o da icolanaxa
da qoñiita da sa'axa't naua iuennataxaco.
7Nache chochaq sheetac:
No'ono' da detaqa ca mashe huo'o nam nmate' lataxacpi,
nache na qalota vi'i maye mashe ivi' camaye,
ỹachaxan qome na laỹaaneguesat.
8Cha'aye 'enauac nam shiỹaxauapi huo'o so maiche saqcha'a lca'alaxa
qaq nacheso som ỹo'ot da laỹaanataxanaxac,
cha'aye naua la'a'che Ñim Qaica ca Ỹaqalanapec
nachenaua naua ỹo'o't da qarauattonaxanaxac.
9Qataq saishet da nachenata na ỹa'axaiquipi da ỹaanaxanaxaicpi,
qataq da nqueroxo saishet da nachera da ỹa'axategue da llec ca ỹaỹamaqchiguiñi.
10Qaq ỹoqo'oye aỹem shenapec:
‹Nagui aỹem qana'axaỹaxañiỹa,
cha'aye aỹem nataqa'en sa'axat na saỹatenpi.›
11Cha'aye aỹem choche qami' seuatta'alo,
qataq ña'axaỹaxaategalo naua qarhuennataxacolli'.
Qataq da qanmicheetaique cam qara'aqtaqui,
12nataqa'en sauaachigui da saishet da huo'o
ca 'oonolec da qoñiita da ỹe'eguelaxateguet na la'aqtacpi ñi Job,
qataq da ỹa'axategue da llec na la'aqtacpi ñimaye.
13Yaqto' saishet qome da qoñiỹapec,
da nache qomi' dam ỹataqta qomi' ỹaanaxanaxaiqa,
cha'aye Ñim Lo'onatac 'Enauacna,
nacheñi qome ñi qami' ỹasategueta
qaq saishet da nacheca ca shiỹaxaua.»
14Qaq cha'aye ñi Job, saishet da nachaỹem
da aỹem ỹalamaxatchigui nam la'aqtacpi,
ỹoqo'oye aỹem saishet da sa sasateguet, da sheeta'ama qami'.
15Qaq 'am Job, ne'enaua tres 'anauochaxau'
naamaye sa ỹaỹate'n ca llec ca lasataxa'c,
cha'aye mashe imereuo naua la'aqtaqa da 'am ỹasatreguet,
16qaq aỹem ¿peta'a choche ñe'emaxat
da seuatta'alo naamaye da saishet da detaxai'?
souaxat da saỹaỹate'n ca la'aqta'c da 'am ỹasatreguet.
17Ỹoqo'oye aỹem nataqa'en huo'o da ỹa'aqtaxanaxac,
da sa'axat da ỹauattonaxanaxac.
18Cha'aye aỹem ỹataqta qalota na ỹa'aqtacpi,
nache ỹo'ot da sa ñalo'oguet da iyaxa da setaqa,
19mashe 'eco' huotaique da aỹem dachipigui,
sheeta'am aca lo'oc dalaxaale maye laỹe' na lataxa da dachipigui.
20Ỹoqo'oye aỹem setaqa da yaqto' nmitcheguem na ỹa'aqtacpi,
cha'aye da setaqa nache yo'oq na ỹasataxacpi.
21Qalaxaye saishet da huo'o ca sagaqnauec da sho'oxoreetac,
nacherata da qaica ca seỹotauga.
22Cha'aye aỹem saishet da ñanaỹa'ac da huo'o ca sho'oxoreetac.
¡Cha'aye da nache sheetec de'era,
nache Ñim Lo'onatac 'Enauacna saqaỹaloq da ỹauo'o ca ñeuaxanaguec!
