1Qaq ỹoqo'oye 'am Job, nagui 'ana'axaỹaxanalo naua shena'ape,
qataq 'ana'axaỹaxaachiguilo naua ñanoldec ỹa'aqtaqa.
2Cha'aye nagui sauachigui na aỹap da setaqa,
qalaxaye ỹataqta qalota na ỹa'aqtacpi,
3qalaxaye naua ỹa'aqtaqa chegoqchiguilo da huesota iquiyaqteỹaxac,
qataq ỹataqta 'eesora naua lleco naua ỹa'aqtaqa.
4Ñim Lo'onatac 'Enauacna maye
Qaica ca Ỹaqalanapec aỹem lo'onatac,
qataq naua la'a'che Ñimaye, ỹo'ot da ica'alaxa.
5Qaq 'anaỹamaxat da aỹem 'auataỹa'aguet,
qataq aỹem 'auasateguet qome da 'aushet.
6Cha'aye 'am qataq aỹem, nache shenaqta'a't
da souaqto'ot Ñim Lo'onatac 'Enauacna,
aỹem nataqa'en aỹem qaỹachegoxotaigui na 'alhua co'ollaq aỹem qaỹo'ot.
7Qaq ỹoqo'oye saishet da aỹem 'aye'etega,
cha'aye saishet da 'am serolec da ỹa'añaxac.
8Cha'aye mashe sa'aqtega da 'ara'aqtac,
da qoneta:
9«Aỹem qui'itta, qaica ca sasouaxat,
qaica ca ñe'enaxac, qataq qaica ca ỹasouaxashet.
10Qalaxaye Ñim Lo'onatac 'Enauacna nmittaique
da huo'o ca aỹem ỹasaxalec ỹasouaxashet,
nache 'eeta'am naqa'en aỹem ca mpa'aguenaxaua,
11nache ỹanaguilo naua ichel so lcoñetaxanaxat,
qataq ỹataqta nauaata'ape naua iqauaxaqui'.»
12Qalaxaye 'am shenapega da de'era qonapec saishet da 'eesa,
cha'aye Ñim Lo'onatac 'Enauacna
ỹataqta lta'araic saq 'ena'am ca shiỹaxaua.
13¿Ta'ainco' da 'ancotatague' Ñimaye,
ye saishet da ỹasateguet ca 'oonolec nam 'ara'aqtacpi?
14Ñim Lo'onatac 'Enauacna saishet da 'oonolec
naqa'en ca llec ca la'aqtac da qomi' detaxaỹoto,
qalaxaye qomi' ye sa ñanomaxa naxa de'era 'eetec Ñimaye.
15Cha'aye huo'o naxa da huaigui da qarchoxonaxac ye pe,
qataq huo'o da huaigui naqa'en da qarloxoc da so'ochaqta.
16Qataq qomi' ỹa'axaỹaqcheteque naua la'aqtaqa,
nache naamaye ỹo'ot da qarcolanaxa,
souaxat da qomi' iviraxato'oto,
17da yaqto' qolqa'ai naqa'en na so'otaqtac qauempi,
qataq qomi' qaỹoqtalo naqa'en da 'amqaanaxac.
18Qaq 'eetec de'era, da yaqto' qomi' nca'alaxateeguesopa añi huachiqui,
qataq qomi' nca'alaxateeguesopa da qanalaataguec.
19Qataq huo'o naxa da ỹauo'o da qanhuaxanaguec,
da souaqtalec ca qarmala',
nache ỹataqta qalota naqa'en da nqui'ic naua qarpi'ineqa.
20Nache ivira'a da ỹataqta deqaiga na nallec,
na'aictaxa da ỹataqta ama qalaq qaica ca lamaic naqa'en.
21Nache naua qarapa'ache nquicta'a't da lapo'oxo
nache ivitta'a da yo'oqte' naua qarpi'ineqa.
22Da qanachaalataxac saqaỹapeque añi huachiqui,
qataq huetaua'a na laỹe ca lasom da nleuaxa.
23Qalaxaye da huo'o ca 'oonolec,
na qalota namaxashecpi piguem le'ecpi da hueta'aguet camaye,
nache itauan da detaqlec qataq ỹa'axatem Ñimaye,
da camaye no'on da lataxac,
24souaxat da ichoxoreetac camaye,
nache nqouagaxaunot Ñim Lo'onatac 'Enauacna, 'eeta':
«Ñaq 'anca'alaxateeguesop da l-leuaxa,
cha'aye mashe huo'o ana lasheue da yaqto' nca'alec»,
25huaña nache da lo'ocỹaxac camaye,
qaltaq ỹe'eguelaxalec da huesottac,
'eeta'am da lo'ocỹaxac ca nogotolec,
qataq ỹe'eguelaxalec da 'eeta'am co'ollaxa da ña nsoqolec.
26Nache natamnot Ñim Lo'onatac 'Enauacna,
qaq Ñimaye ỹasateguet camaye, nache machiguiñi
da ilo'ot da lashiguiỹaxac Ñimaye,
qataq ỹa'alaq souaxat da machiguiñi,
nache Ñim Lo'onatac 'Enauacna ỹe'eguelaxata
da ỹaỹamaqchiguiñi lataxac co'ollaxa.
27Nache ca shiỹaxaua maiche nauattoola't
da huo'o da lasouaxashet, nache, 'eeta':
«Aỹem huo'o da ỹasouaxashet cha'aye ña'aqchet da ỹaỹamaqchiguiñi nataxac,
qalaxaye saishet da qaỹo'ot ca ñeuaxanaguec,
28nacherata da Ñim Lo'onatac 'Enauacna
aỹem nca'alaxateeguesop da nleuaxa,
qataq ñaq 'eetalec da ñeca'altauec
qataq ñaq selotaigui na yo'oqchiguiñi.»
29Qaq 'era da 'eetec da ỹo'otec
ca shiỹaxaua Ñim Lo'onatac 'Enauacna,
qalaxaye ivi' dos huo'otaq tres da ỹe'eguelaxalec damaye,
30da yaqto' nca'alaxateeguesop da nleuaxa,
qataq queta da ilotaigui naqa'en na yo'oqchiguiñi.
31Qaq aỹem 'ana'axaỹaxana qome 'am Job,
ña 'aue'enaxaatai', cha'aye aỹem setaqa.
32Qalaxaye da huo'o ca 'ara'aqtac, nache aỹem 'aua'axatem,
qaq da ỹoqta 'eesa ca qonapec, nache aỹem saỹamaxareeta qome,
33qalaxaye da qaica ca 'aua'axat, nache aỹem 'ana'axaỹaxana,
choche 'añe'emaxat qome, nache aỹem 'am sapaxaguenec da naỹaanec.
