Job 35

₁Qaltaq cot da ltaxaỹaxac so Eliú, 'eeta':

₂«'Am Job, ¿peta'a 'aupettega

da ỹaỹamaqchiguiñi da 'ara'aqtac da qoneta':

Aỹem ỹataqta qaica ca ỹasouaxashet

da hueto'ot Ñim Lo'onatac 'Enauacna?

₃Qataq qoneta': ¿Negue'to' ca ỹaueguec da qaica ca ỹasouaxashet?

¿Qataq negue'to' ca naigui da qaica ca sasouaxat?

₄Qaq ỹoqo'oye 'am sasateguet nagui,

qataq naua 'anauochaxau'.

₅Ña 'auamato'ot qome na piguem,

nache 'aumeten namaye da ỹataqta qaỹoqotcheguemec, 'am napacalec.

₆Qaq da huo'o ca 'auasouaxat, qalaq saishet da na'aqchet Ñim Lo'onatac 'Enauacna,

na'aictoxo' da qalota na 'arasouaxashetpi maye 'auo'ot,

qalaxaye qaica ca na'aqchet Ñimaye.

₇Qaq da no'on da 'arataxac, qalaq

¿negue'to' ca ishet da 'aỹa'anem Ñimaye?

Huo'otaq ¿negue't ca 'am ỹachegoxoto'ot Ñimaye?

₈Nam shiỹaxauapi maye qoneta'am,

'ena maye ishet da na'aqchet ca 'arasouaxashet,

qataq nachena na ishet da no'onaxat ca no'on 'aro'onataxanaxac.

₉Cha'aye 'enauac na shiỹaxauapi,

ỹa'alaqtac souaxat da saqaiyacnapec,

nache iỹaxaataique ca ishet da nca'alaxateeguesop na 'añaxaicpi.

₁₀Qalaxaye qaica ca denataxaataique ca neta'ague

Ñim Lo'onatac 'Enauacna maye qomi' lo'onataqa,

maye qomi' ỹanema da qara'añaxac ye pe,

₁₁Ñim qomi' ỹapaxague'n da yaqto' saishet

da shenaqta'am na shiguiỹacpi, qataq qomi'

ỹaanaxanaxaiqa naqa'en da yaqto'

saishet da shenaqta'am na maỹopi.

₁₂Ỹoqo'oye namayepi ỹa'alaqtac qalaxaye Ñimaye sa hua'axaỹa,

souaxat da ño'oxonnaxac ne'ena qauemaicpi.

₁₃Cha'aye Ñim Lo'onatac 'Enauacna

maye Qaica ca Ỹaqalanapec saishet da hua'axaỹa

dam qaica ca naigui lỹaxanaxac.

Qataq Ñimaye saishet da iqochetega namayepi.

₁₄Na'aictoxo' da qonapec da saishet da 'aula'a Ñimaye,

qalaxaye Ñimaye mashe hueto'ot na 'auo'otpi,

qaq ỹoqo'oye ña 'auata'a.

₁₅Qataq ye 'am qonapec da Ñimaye saishet da dalemata,

qataq saishet da iqocha'a ca nasouaxashet.

₁₆¡Qalaxaye 'am Job, qaica ca naiguilo naua 'ara'aqtaqa,

qataq ỹaguec da 'artaxaỹaxac qalaxaye sa 'auaỹaten ca llec nam 'aua'axattacpi!»