Ñaq queta da detaqtac so Eliú
1Qaq ñaq queta da ltaxaỹaxac so Eliú, 'eeta':
2«Ñaq cara'acolec da 'alhuenai', ñaq 'am sapaxaguen,
cha'aye ñaq huo'oi naua lleco naua ỹa'aqtaqa
da setaqlec Ñim Lo'onatac 'Enauacna.
3Cha'aye da ỹauattonaxanaxac qaỹoqtegue
da sachegoxotta'ague da yaqto' ishet da sachaxan,
da Ñim aỹem lo'onatac ỹataqta 'eesora naua 'ena'ape.
4Cha'aye aỹem saishet da saq'en ca shenapec,
ỹoqo'oye, nagui 'am datato'ot na ỹoqta 'eesa ỹaanaxanaxaic.
5Ñim Lo'onatac 'Enauacna ỹataqta 'añaxaic,
qalaxaye saishet da imaqa'aguet ca qaica ca ỹasouaxat,
qataq ỹataqta huo'o la la'añaxac da laỹaanec.
6Ñimaye sa ichoxonnai' da nachaalataxac ca qauemaic,
qalaxaye ỹataqta iueelec na choxoraqpi.
7Qataq nache 'eetai' da ntela'a nam shiỹaxauapi
maye no'on da lataxac, qataq nso'ona'ai'
da lo'onataxanaxaua naqa'en na nta'alpi,
qataq ỹo'ot da la'amaqchec namayepi.
8Qalaxaye da qaicoñettai' namayepi,
qataq da nqui'ic ỹo'ot da nque'eenaxac,
9Nache Ñim Lo'onatac 'Enauacna
ỹachaxana nam qauemsat maye ỹo'ot co'ollaxa,
qataq da 'eetec da quetague' da ño'oxoreetapigui da lle'etaxaloxo.
10Qataq ỹa'axaỹaqchetec da lhuogoqtaxanaxac,
qataq 'enapega da ca'ai na saỹaỹamaxañesat.
11Qaq da ỹalaq qataq do'onataxanot Ñimaye,
nache huo'o da ntonaxac qataq machiguiñi,
'enauaque naua na'axa'te da nachaalataxac.
12Qalaxaye da sa ỹalaxaguet Ñimaye,
nache qom saxanaxa da deuennataxan nache ileu.
Souaxat da qaica ca ỹaỹaten.
13Qaq na 'etaxaloxoicpi qalaq nỹoxola't da lalemataic,
nache na'aictaxa da qaicoñettai', qalaxaye saishet
da iỹaxanot Ñimaye da yaqto' itauan.
14Nache ileu da ña nsoqolec,
qataq 'eeta'am da l-leuaxa nam qauemaicpi.
15Qataq ỹachegoxotchigui de'era que'eenaxac,
da Ñim Lo'onatac 'Enauacna nca'alaxatec
ca huo'o da nque'eenaxac, qataq ỹachegoxotchigui
de'era que'eenaxac da huo'o naqa'en ca ỹaỹaten.
16Nataqa'en 'am nqateeguesop qome da 'anque'eenaxac,
qataq 'am ỹanem da qaica ca 'aueetac,
qataq 'am huesochiguiñi naqa'en,
qataq nlaxattelec ca 'arquia'axala' na no'on nallec.
17Qalaxaye nache 'am chegoqchigui
'enauac na nhuaxanaguec na qauemaicpi,
qataq saishet qome da 'anachaata'aguet
da 'am qanmit, qataq da qaỹauo'o ca 'anhuaxanaguec.
18Qataq 'antela'aguet qome da choche 'am qaisheeten,
qataq saishet da 'anañaneguet da 'am loxonec da nsallaxa.
19Cha'aye da qouaigui ca 'anqui'ic
qalaq saishet da 'am itauan de'era 'arsallaxa,
qataq 'enauac na chegaqaigui da 'ana'añaxataxac.
20Ỹoqo'oye saishet qome da 'auayeeta'aguet ca pe,
maye huaigui da sa yo'oq na nhuo' le'ecpi.
21Qataq 'avita'aguet qome da 'avi'eguelaxa na qauemsat,
cha'aye nachena na huo'omshe 'am qaỹe'eguenec, da 'anque'eenaxac.
22Ñim Lo'onatac 'Enauacna ỹataqta lta'araic da la'añaxac.
Na paxaguenataxanaxaicpi qalaq qaica ca 'eeta'am Ñimaye.
23Qataq qaica ca ichemaxattega na ỹo'otpi Ñimaye,
qataq qaica ishet da iviraxato'ot,
da 'enapec saỹaỹamaxañi ca ỹo'ot Ñimaye.
24Qataq 'auennata'a qome da 'avio'oxoreetac na lo'onatacpi Ñimaye,
cha'aye 'enauac na shiỹaxauapi ỹo'oxoreetac namayepi.
25Qataq 'enauac na shiỹaxauapi da ishet da ilota'a namayepi,
na'aictoxo' da qaỹoqta.
26Qataq Ñim Lo'onatac 'Enauacna
ỹataqta lta'araic, qalaxaye saishet da sauattonaq,
qataq sa saỹatenaq chaq lcata vi'iye da nachaalataxac.
27Qataq Ñimaye maiche ncoyiñi ana llo'oxo na 'etaxat,
nache ipaxaalec naqa'en na talapi.
28Na auot qalaq chegaqaigui naqa'en na lo'oc na piguem,
nache ana llo'oxopi talec 'enauac na shiỹaxauapi.
29¿Negue'tom ca ishet da ỹaỹaten,
da chaq ta'ainco' da queta na lo'oc na piguem,
qataq da ỹalachigui namaye?
30Ñimaye ilagaxaalec na le'eraxa aso auaxai,
nache imattalec naqa'en na pa'aguiñi aso asomaye.
31Qaq 'era da 'eetec da iquia'axan na ỹotta'a't shiỹaxauapi
qataq ỹanem na aloq da choche huañi naqa'en.
32Ñimaye huetaiguilo naua lhua'q so lqashelgaxa
nache somaye tachiguiña cam ỹamaxague Ñimaye.
33Nam nalataxa, ỹa'axat da lviraxac Ñim Lo'onatac 'Enauacna,
qaq naua la'a'che lta'al, qalaq ỹa'axa't da layeloxo Ñimaye.»
