Job 37

₁«Ỹoqo'oye nataqa'en aỹem ỹataqta dasot añi iquiyaqte,

nache 'eeta'am da huotaique da dachipiauec.

₂Qataq qana'axaỹañiỹa da l-llimiaxa

da lavilỹaxac Ñim Lo'onatac 'Enauacna,

nam nalataxa maye chegaqaigui na alap Ñimaye.

₃Ñimaye ilagaxaalec 'enauac na piguem na le'eraxa,

nache ivira'alo naqa'en naua loga'te ana 'alhua na yo'oqchiguiñi.

₄Qaq da ime, nache qaỹa'axaỹa de'era lta'araic l-lamaxa,

da ivita da ỹalachigui naqa'en da qaica ca 'ena'am lavilỹaxac,

qaq da ña qaỹa'aqtega de'era nalataxa,

nache na lqashelgaxa na piguem saishet da vi'iiguet.

₅Ñim Lo'onatac 'Enauacna da ivita da ỹalachigui

naqa'en da lavilỹaxac, nache yo'oq na ỹo'ot da na'aalaxa,

qataq na lta'araicpi maye saishet da saỹatenaq ca lataxac.

₆Qataq namaq ana aloñi da talec ana 'alhua,

qataq na auot da ỹataqta, sansatteguet naqa'en da naañi.

₇Nache ỹo'otec da 'enauac na shiỹaxauapi

hueta'alo naua lma'ate, qataq da yaqto' ỹauattoota,

da nacheñi Ñimaye da do'onataxaatac.

₈Qataq na shiguiỹacpi taiguilo naua lauaco,

nache huetaiguilo da nqañoxooñi.

₉Da la'añaxa nache chegaqa'ague na la'at lta'araic,

qaq da sheu' qalaq, nache chegaqa'ague na latomaxa.

₁₀Qaq naua la'a'che Ñim Lo'onatac 'Enauacna

qalaq ỹo'ot ana aloñi qaq na qalochiguiñi 'etaxat

qalaq da'añiỹa'a't naqa'en.

₁₁Ñimaye ỹo'ot na laquitaxa na lo'oc na piguem,

qataq chegaqaigui naqa'en namaye na nqashelgaxa,

₁₂nache ne'ena nqashelgaxa, nqalgoqtalec na piguem,

qataq imata 'enauac ana 'alhua.

Nache ipacchigui da ỹamaxalec Ñim Lo'onatac 'Enauacna

₁₃Nache 'enauac namayepi ỹachegoxotchigui

da ỹauo'o da nhuaxanaguec ana 'alhua,

huo'otaq da ỹachaxan da lauotaxanaqtaic.

₁₄Qaq 'avi'iiguet 'am Job, ñaq 'ana'axaỹaxan,

qataq 'aumeten da llo'oxoyec Ñim Lo'onatac 'Enauacna.

₁₅¿'Auaỹaten peta'a da 'eetec Ñim Lo'onatac 'Enauacna,

da ilo'ogue na lo'oc na piguem qataq da 'eetec

na le'eraxa na nqashelgaxa da huetaigui na lo'oc na piguem?

₁₆¿'Auaỹaten peta'a ca 'eetec da huaỹoxon na lo'oc na piguem,

qaq damaye ỹachaxan da llo'oxoyec da qaica ca nqalaate' Ñimaye?

₁₇Qaq 'am maye 'anque'etaxaatapigui

da dapaxaỹaiguilo naua 'ogo da ivita da ntochiguiñi ana 'alhua,

souaxat da vi'iiguet na la'at maye chegaqa'ague da la'añaxa.

₁₈¿Peta'a 'autauaatac co'ollaxa Ñim Lo'onatac 'Enauacna,

da ỹanasheguem na piguem, qataq da sa deraỹai' 'anqa'en

nache 'eeta'am na lcat da lqashelgaxa?

₁₉Ñaq qomi' 'auapaxagueneque ca 'eetec ca qara'aqtac,

maye sanaxam Ñim Lo'onatac 'Enauacna,

cha'aye mashe souaqtaigui na napalaxa,

nache sa saỹatenaq ca llec ca qara'aqtac.

₂₀¿Peta'a iueno' Ñimaye da qaỹa'aqtaxanem de'era shenapec,

cha'aye negue't ca ỹañoxot da detaxaỹot Ñimaye, nache saishet da qanlaxaañi?

₂₁Saishet da qaila'a na le'eraxa añi nala',

da ña ỹapotalec na lo'oc na piguem,

qalaxaye da mashe ỹasheerelec na la'at,

nache qui'itta na piguem.

₂₂Huaña, nache yo'oq na qovialec

le'eraxa añi nala' chegaqa'ague da sheu',

da ivita da anac Ñim Lo'onatac 'Enauacna,

nactaigui da lta'araic la'añaxac.

₂₃Qaq saishet da seviraq da saỹatenaq da lataxac

Ñim Qaica ca Ỹaqalanapec, cha'aye ỹataqta lta'araic

da la'añaxac qataq no'on da lataxac,

no'oiteguelo naua ỹo'o't qataq saishet da huo'o ca huetaiya' naqa'en.

₂₄Qaq ỹoqo'oye na shiỹaxauapi ỹataqta ñi'iỹa Ñimaye,

cha'aye qaica ca naigui naqa'en, na 'eetega ỹaanaxanaxaicpi.»