Ñim Nataxala' detaqa
1Nache Ñim Nataxala' detaxaỹot so Job, qalaxaye huetaigui so la'ana't la'at lta'araic, 'eeta':
2¿Negue't nam na' maye qaica ca ỹanaiguilo naua iqataxaco,
ye naua la'aqtaqa yo'oqta da qaica ca ỹaỹaanapec?
3Qaq nagui ña 'anaỹamaxat da aỹem 'auataỹot,
cha'aye Aỹem, 'am senat qataq 'auasategueta qome
naua inataxanaxaco maye, 'eeta':
4¿Hua'ague ca qoueta'ague co'ollaq llapaqtapiguiñi ana 'alhua?
¡Qataq ñaq aỹem 'aua'aqtaxanem
da ỹoqta 'eesa da huo'o na 'auaỹaten!
5¿Negue't co'ollaxa ca ỹo'ot ye lcachiguiñi namaye,
peta'a 'auaỹaten da negue't co'ollaxa ca naloqteetac?
6¿Chaq negue't so na'attalec lo'oxonaxala' namaye?
¿Qataq negue't ca lapaxañi so coma' maye nlletañi namaye.
7Qataq co'ollaq do'onaxaatagui ana huaqaañipi yo'oxoñi lalaqtepi,
qataq ỹalecteguet da ntonaxac na ỹamaxashec piguem le'ecpi?
8Qataq ana auaxai co'ollaq chegoqtoigui ana 'alhua da npaxaasheguem,
nache ¿negue't co'ollaxa ca ỹo'o't naua laso'omi da yaqto' npaxateguet na 'etaxat?
9Qataq co'ollaq sanem na lo'oc da 'eco' lapoto ñaqa'en anamaye,
qataq llepataxangui na lta'araic napalaxa.
10Qataq co'ollaq sauo'oi naua loga'te aso auaxai,
nache sapoguilo naua laso'omi qataq sevinguillo.
11Nache shenapega, sheeta': «'Ena qome na ishet da 'anvira'a,
nache saishet da 'aigue da laỹe,
cha'aye 'ena na tachiguiña ana ño'oxonnaxai 'arapaxa.»
12Qataq 'am, ¿peta'a huo'o ca huaña co'ollaxa da 'auamaq na yo'oxoñi,
qataq da 'auachaxana ca lma' na che'egueera,
13da yaqto' na le'eraxa ivira'alo naua loga'te ana 'alhua,
nache ỹacholaxan na qauemaicpi maye netalec anamaye?
14Qataq da naralaxat da lataxac ana 'alhua,
'eeta'am ca no'onatac 'alhua,
qataq togaxaraic naqa'en da lo'oxoỹaxac 'eeta'am ana npotoyec,
15qataq da qanqateeguesop na yo'oqchiguiñi na qauemaicpi,
huaña, nache imeuo da la'añaxac na napagaqaanaxaic lhuaq.
16¿Peta'a mashe 'aviraña ca chegoqchiguiña aso auaxai,
qataq mashe 'aucoleeteguelec ca loga't na pa'aguiñi da 'anmittac?
17¿Peta'a 'auauana ca naña ca lasom da nleuaxa,
yem ỹataqta napalñi lma' na lqui'ipi na leuaxaicpi?
18¿Peta'a 'auaỹaten ye lcachiguiñi na 'alhua?
¡Ñaq aỹem 'aua'aqtaxanem qom ỹoqta 'eesa da 'auaỹaten da llec 'enauac namayepi!
19¿Hua'ague ca hueta'a na yo'oqchiguiñi,
qataq na napalaxa?
20¿Peta'a 'aushet da ivira'a 'anqa'en ca pa'atec loga't ana 'alhua,
qaq da ime, nache 'añe'eguelaxata ca chegoqchiguiña lma'?
21¡Qaq yo'oqta da 'auaỹaten de'era,
cha'aye mashe qalota na vi'i da 'anachaalataxac,
cha'aye mashe sogote co'ollaxa da 'auañiguiñi!
22¿Peta'a mashe 'avira'a da 'aumeten ye naỹamaqtaqa'
ana aloñi qataq ana lache,
23maye saỹamaxattac da yaqto' samaq
da ivita ca laloqo' da que'eenaxac,
huo'otaq da huo'o ca loquiaxac qataq ca alaataxac?
24¿Hua'ague ca tateuga da ivita da nlagaxaañi na yo'oqchiguiñi?
¿Qataq da nlagaxaañi na la'at maye chegaqa'ague
da nala' lliguisheguem da talec ana 'alhua?
25¿Negue't ca ỹauateguet da yaqto' anac na auot,
qataq da ỹachaxana ca llec na la'at,
26da yaqto' talec na auot ca toolec 'alhua,
maye qaica ca netalec shiỹaxaua,
27da yaqto' ỹapapiaxaalec ca 'alhua maye toolec,
nache ñaxat naqa'en ana huoue?
28¿Huo'o peta'a ca lta'a na auot,
qataq huo'o peta'a ca lta'a na 'aỹa?
29¿Negue't aca late'e ana aloñi
qataq aca late'e ana isaxa't aloñi?
30¿Negue't ca ỹo'otec da na 'etaxat qaramta't, 'eeta'am na coma',
qataq da'añiỹa'a't na 'etaxat aso late'erai auaxai?
31¿Peta'a isheto' da 'aucoñera't so naxatta'a't naqa'en aso Dapiche',
qataq da 'ausogui so naxatta'a't naqa'en aso laỹepi huaqaañipi le'enaxat Orión?
32¿Peta'a nache 'amo' maye da ivita ca laloqo'
nache nnoxoosheguem 'anqa'en aso chi'ishe yo'oxoñi lalaqte?
¿Qataq nache 'amo' peta'a da 'auo'otegue ca llec aso huaqaañipi
maye le'enaxat Osa Mayor qataq aso Osa Menor?
33¿Peta'a 'auaỹaten na qalapaqtañi lataxacpi na piguem?
¿Qataq nache 'am peta'a da 'alapaxañi
ne'ena lataxacpi na huetalec ana 'alhua?
34¿Peta'a isheto' da 'auỹaxaasheguemec na lo'oc na piguem,
da yaqto' anac naqa'en ca lta'araic 'etaxat da 'am ỹapolec?
35Qataq da 'auamaq na nqashelgaxa da huo'otaq huo'o ca taigue,
nache ¿ishet peta'a da 'am ỹasateguet, 'eeta': «Aja' ashec, aỹem 'auamaq?»
36¿Negue't ca ỹami' da yaqto' huo'o da laỹaanec ana huategra,
qataq ca ỹami' da sa nqalat na 'olgaxa?
37¿Negue't ca ỹaanaxanaxaic, da ỹaỹaten
da naloqten ye lcata na lo'oc na piguem?
¿Negue't ca ishet da iqui'itaxatchigui namaye da yaqto' ncoyiñi na auot,
38da yaqto' na namoxoỹaxa ishet da nshaxa,
qataq ana 'alhua lapa, ishet da donaỹa't?
39¿Peta'a nache 'amo' maye 'ane'epteguelec aca quiyoc,
da yaqto' ishet da deque'e na llalaqpi, nache comaraxaicpi,
40da nnaatai' da hueta'a ca lanataqa',
huo'otaq da dauanaxaatac da huetaigui ca huouesat?
41¿Negue't ca ỹaata'am da lquia'axac na teguesanpi,
da ivita da ỹa'alaqtagui na llalaqpi da aỹem iỹaxaatacot,
qataq nsomaxaatapigui' souaxat da qaica ca chec?
