1«¿Peta'a 'auaỹaten ca laloqo' da deco'o ana nauenec qasoxonaxa lashe?
¿Peta'a 'auauaachigui da deco'o ana chegaxango?
2¿Peta'a 'auaỹate'n chaxan lcate' ca'agoxoiqa da hualaxai,
qataq ca laloqo' da deco'o?
3Qaq da ivita da deco'o nache choche vi'iỹa't,
nache ñiguiñi na llalec nache vi'iiguet da nqui'ic.
4Ime, nache nquictasheguem na llalec
qataq 'añaxaic da nañaxattac, huetalec na no'onaxa,
ime, nache ivitta'a da jec, nache saishet da ñe'eguelaq.
5¿Negue't ca ỹami' da yaqto' huesochiguiñi na 'ashena maye huauec?
¿Negue't ca isouec da yaqto' huesotañi namaye da queuotapigui'?
6Qaq aỹem maye sanalec namaye na toolec 'alhua da yaqto' lma',
qataq ye nalochiguiñi 'alhua maye huo'o na toue.
7Cha'aye saishet da nqopita na naỹac
ye naña na huaqta'a't nỹecpi, qataq saishet da iqocha'a
da la'alaxac na ỹo'ottega't na 'atetpi.
8Nache queuotapeguelec na comarelecpi
da nmittaique na 'auaqpi, qataq nmittaique
ca camachaqca 'auaqpi darala da yaqto' chec.
9Qaq ¿peta'a 'aupi'itaxano' da ishet
da 'auauegaxaalec ca huaca no'onaxa le'ec,
huo'otaq da ishet da netaigui aca 'arelo shiguiỹac laỹe' ye pe?
10Qataq ¿ishet peta'a da 'aỹa'anagui
camaye ca lauegaxanaxaqui nache 'auo'orelec
da 'aua'araxaalec, huo'otaq 'auauecta'aguet
da 'am ca'attaueegue da 'aulaxattapigui na 'alhua?
11¿Peta'a ishet da 'aupe'etalec camaye,
cha'aye ỹataqta 'añaxaic qataq 'aua'aqta'a
da yaqto' ỹo'ot ca qapa'atta 'aro'onatac?
12¿Peta'a 'aupi'itaxana camaye
da taiguet da yaqto' laỹona't ca 'añiguishec ala,
nache ỹachaigui ca huaña da qaichegoq?
13Ña 'aula'a so mañec somaye ỹauattapiguilo
naua laua't souaxat da machiguiñi,
qalaxaye naua laua't saishet da 'eeta'ama na huaqap.
14Qataq somaye da deco'o nache ca'ai
na lco'oue' maye ỹachalec na 'alhua,
yaqto' na le'eraxa añi nala' ishet da viyigui naqa'en.
15Nache saq taỹapigui lauel da huo'otaq huo'o ca ilaxachigui,
huo'otaq da huo'o ca shiguiỹac da pigui.
16Qaq ỹataqta sa iyacnapec na llalec,
'eeta'am da huo'otaq saq llalec qataq sa itena'a
nache qaica ca naigui naqa'en da lco'oxoc.
17Cha'aye Aỹem saishet da sami' da laỹaanataxanaxac,
qataq saishet da sami' ca no'on ntoonaxac.
18Qalaxaye da ivita da nachaañi, nache jec da nqalgoqtac,
nache choche ỹe'eetac so caaỹo qataq so netalec.
19¿Qalqo' nache 'am peta'a da 'aỹa'anem da la'añaxac na caaỹo,
qataq 'auo'ot peta'a na logoraic lana'q laue da yaqto' llo'oxoraxat?
20¿Qalqo' nache 'am peta'a maye parenaxan
'anqa'en namaye da 'eeta'am ana shiiquioxoi,
nache de'era na'amqaanaxaic, lachemnaxanaxac, ỹataqta huo'o da lchec?
21Nache ỹataqta desheraxaatai' da huetalec
na nalochiguiñi 'alhua, na'amaqteetalec da la'añaxac,
qataq qaica ca lli'iỹaxa da nqalgoq da taỹa ca alaataxac.
22Nache choche lashetac da lchec qataq saishet da ñe'etac,
qataq sa dataueeguesop ca ỹeelonec,
23na'aictaxa da lamgui ana checna da nlectecot somaye,
qataq na lqashelgaxa ana taquiaxai qataq ana na'araxanaqte.
24Nache 'eco' saqaỹaleguete naqa'en
naua loga'te na 'alhua, da choche qaỹashiiyigui
ana nasheere nache saishet da ỹe'emaqta.
25Nache nỹeetai' da hua'aqtega
da l-lamaxa ana nasheere, nache da ña qaỹoqta
qalaq itata'aguet na laita da alaataxac,
qataq hua'axaỹa da namaxasoxonaxac
qataq da qaỹa'alaxalec da alaataxac.
26¿Peta'a nachera da 'araỹaanec
da chegoqchigui da laỹoxoc na qoỹo lo'o',
qataq da naỹosheguem da taigue da la'añaxa?
27¿Peta'a nache 'amo' maye 'auamaxalec da naỹosheguem so ỹanegralo,
da yaqto' ỹanalec na qaỹoqotcheguemec ca lpata'c?
28Nache netalec ana qasoxonaxapi ye na'a'q qataq ye pe,
qataq ỹo'ot na lle'eguenaqa' ana lmilo ana'ana coma'pi.
29Nache huetasheguema na pa'asheguem da doicnaxaatac,
nache chegoqchiguiña da ñi'iguenaña ca ltoc.
30Nache na llalaqpiolec chectac na ltago'q ca loxonec,
qataq ca huetaña na leuaxaic, nacheca hueta'a se'eso ỹanegralo.»
