Job 40

₂«Qaq 'am maye aỹem qoquetapeguelec,

Aỹem maye Qaica ca Saqalanapec,

¿peta'a ñaq 'anshetaique da aỹem 'auataỹa'aguet?»

₄«¿Hua'ago' ca sheetec ca ỹa'aqtac aỹem?

Ye ỹataqta qaica ca ỹa'amaqchec.

'Onaxaico' da choche ñe'emaxat.

₅Ye mashe she'eguelaqtalec da itaxaỹaxac,

qaq saishet da qaltaq she'eguelaxalec da setaqa.»

₇«Ñaq 'anaỹamaxat nagui da aỹem 'auataỹa'aguet,

cha'aye 'am senat qataq aỹem 'auasateguet qome.

₈¿'Anshetaique peta'a da aỹem 'auasaxalec

da qonetega huo'o na ỹasouaxashetpi,

da yaqto' qoỹeetega da qaica ca 'arasouaxashet?

₉¿Qalqo' 'aupi'itaxaatega da 'anapacalec da la'añaxac na ihuaq?

¿Peta'a ỹalachiguilo naqa'en naua 'ara'aqtaqa da 'eeta'am aỹem?

₁₀Qaq da nache 'eetec de'era, nache 'aỹa'aañi qone'

da 'ayo'oxoyec qataq da 'ara'amaqchec,

nache 'anapogoña da 'ara'amaqchec qataq da 'aryacỹaxac.

₁₁Ñaq 'anashetcheguem da 'aralemataic,

nache 'aulogui 'enauac na napagaqaanaxaicpi,

da yaqto' huetaiya' 'anqa'en namayepi.

₁₂Nache 'auamaxañi, 'aurolec da 'armeenaxanaxac

da huetaiya' 'anqa'en, qataq 'aupataxañi

ne'ena qauemaicpi huaña 'anqa'en ca hueta'a.

₁₃'Aularoigui 'enauac ana 'alhua qataq 'alpategue,

nache 'auachangui aca qaỹoqchiguingui huachiqui.

₁₄Huaña qome nache saỹaten da la'añaxac na 'arhuaq,

da nachena ne'ena 'arhuaq da 'am ỹanem da 'arca'alaxa.

₁₅Ñaq 'aula'a qome ñi shiguiỹac lta'araic

maye le'enaxat Behemot, ñim ỹo'onatac

maye ỹalamaxat 'eeta'am da qoneta,

ñimaye chectac na 'auaqpi 'eeta'am ca nauegaxanaxala' huaca,

₁₆ñaq 'aulogui ñimaye da la'añaxac na l-laq,

qataq da la'añaxac naua lo'otal.

₁₇Na la'araxashet da iraxan qalaq 'eeta'am ana qo'oipaq cedro,

qaq naua lo'otal naua lapia'ate qalaq ỹataqta ncoñetta't.

₁₈Naua lpi'ineqa qalaq 'eeta'am na ỹasaataigui lcat bronce,

qaq na laỹepi lpi'inecpi qalaq 'eeta'am na lcat.

₁₉Qaq nacheñi ñi hua'auchiguiñi 'enauac na ỹo'onatacpi,

qaq nache aỹemta maye ishet da ỹoxonec ñimaye.

₂₀Ana qasoxonaxapi maye la'ashaxalate ne'ena shiguiỹacpi,

anamaye nache ñaxattalec ana huoue maye lqo ñimaye.

₂₁Nache da nnaañi qalaq hueto'ot

na ỹapogoñi lpaqal na pe'elac lta'a,

qataq taigui na na'aatesat da nqañoxooñi.

₂₂Ne'ena lpaqal na pe'elac lta'a ipelteetalec ñimaye,

qataq coleesop ana qo'oipaq ma'aic maye lañaxataqa' na la'auaxac.

₂₃Qaq da npaxaasheguem na tala qalaq saishet

da ñe'etega, na'aictaxa da na 'etaxat ivirasheguemque

naua lmic lauaco, qalaq ỹe'emaqtom.

₂₄¿Negue'tom ca ỹañoxot da ỹaconeua'a,

nache nqa't naua la'ai'te,

huo'otaq da icoñeragui na lmic ca lquet?»