Job 5

₁'Ana'axannec qome da 'auỹaxan, 'am Job,

shapegueto' da huo'o ca 'am ỹasateguet.

¿Cha'aye negue't ca namaxashec piguem le'ec ca ishet da 'avi'iguenot?

₂Cha'aye da nalemataic taỹa'a da nleuaxa,

qataq da nquiỹaxanaqtaic ỹalauat ca qaica ca ỹaỹaana'a.

₃Aỹem sauaachigui na qaica ca ỹaỹaanapec da nquictasheguem da lsallaxa,

qalaxaye da lma'ỹaxac sa qaỹaloq da nlaguiñi.

₄Na llalaqpi qalaq qaica da huo'o ca itauan,

da huaiguilo naua ntaxaỹaxaqui', qataq ỹataqta sa qaiyacnapec,

qataq qaica ca ishet da iueelec.

₅Na ala na lañiguishec qalaq chec na nqouaqatocpi,

qataq da lsallaxa ivira'a da huetalec ca lquia'axala' na choxoraqpi.

₆Na sa ỹaỹamaxañesat maye chegaqaigui na namoxoỹaxa,

nataqa'en da nachoxoyec saq chegaqaigui ana 'alhua,

₇nam shiỹaxaua nachena na chegoqchigui da nachoxoyec,

nache 'eeta'am ca norec da chegoqchiguingui aca lto'o.

₈Yi'iye qoueta'a 'am Job da aỹem soota'a,

nache aỹem she'eguelaxa Ñim Lo'onatac 'Enauacna,

nache aỹem sacho'oto naua lhuaxaye Ñimaye na ỹasouaxashetpi.

₉¡Cha'aye Ñimaye qalota na ỹo'ot lta'araicpi maye ỹo'ot da na'aalaxa,

qataq na lataxacpi maye qaica ca ivi' da ỹaỹaten!

₁₀Ñimaye namaxa ana 'alhua ca auot,

qataq ca 'etaxat, icorelec 'enauac na no'onaxa,

₁₁Ñimaye ỹo'otec da la'amaqchec ca qaica ca ye,

qataq ca huetapoigui da nque'eenaxac.

₁₂Ñimaye saishet da ipacchigui naqa'en

ca huotaique da ỹo'ot ca sanqalaate' da ỹo'ot ca qauem,

yaqto' saishet da ipacchigui da huo'o ca ỹo'ot camayepi.

₁₃Ñimaye que'emaxam naqa'en ca ỹo'ot cam sanqalaate' da ỹo'ot na qauemsat,

qataq ỹo'otec da saishet da ipaiguilo naua qauema maye huotaique da ỹo'o't.

₁₄¡Nache ye na'a'q, camayepi pogolaxaateguiñi,

'eeta'am da huetaigui ca napalaxa!

Qaq ye na'a'q laiñi qalaq ipottapecra' 'eeta'am da huetaigui ye pe.

₁₅Ñimaye nca'alaxatec ca choxoraq

qataq ca huetaiya' naqa'en naua qauema na'aqtaqa,

qataq nca'alaxateeguesop camaye da la'añaxac cam qaica ca iren.

₁₆Qataq Ñimaye ỹo'ot da naquitaxac ca choxoraq.

¡Qataq ỹapogui na alap na qauemaicpi!

₁₇Qaq ỹataqta machiguiñi qome ca shiỹaxaua

maye Ñim Lo'onatac 'Enauacna ỹaỹamaxaañi ca lsomaxac,

ỹoqo'oye saishet qome da 'aumaqa'aguet

da lviraqtaxanaxac Ñim Qaica ca Ỹaqalanapec.

₁₈Cha'aye Ñimaye da ỹo'ot ca nque'emaxa,

qalaq nataqa'en nataren,

qataq da huo'o ca iuaxan qalaxaye nataqa'en nataren.

₁₉Qaq ỹataqta ỹe'eguelaqtalec da 'am nca'alaxateeguesop da lchecỹaxac,

qaq que'eca pa'atec nache ỹoqta 'am sa ỹasheneguet na qauemsat.

₂₀Da ivita da huo'o ca nqouaxa qalaq 'am nca'alaxateeguesop ca nleuaxa,

qataq da ivita da huo'o ca alaataxac qalaq 'am, nca'alaxateeguesop ca ỹeelonec.

₂₁Ñimaye 'am ntelaqna'agueta naua qauema na'aqtaqa,

qataq saishet da 'añi'itac naqa'en da ivita da nviyi' ca nlaxaañi 'enauacna.

₂₂Choche 'aue'eetac naqa'en ca nqouaxa

qataq ca ishet da nlaxaañi 'enauacna,

qataq saishet da 'añe'etega naqa'en ca shiguiỹacpi maye huauec.

₂₃Na coma'pi qalaq saishet qome da na'aqchet ca 'ano'onaxa

qataq ca shiguiỹacpi 'enauac da 'anhuoteete'.

₂₄Ca 'arma' qalaq ỹataqta huo'o da lañaxataxac,

qataq da 'auchemaxata 'enauac ca 'ana'atetpi qalaq nalota't.

₂₅Ỹataqta qalota qome ca 'am chegoxoguetpi 'aỹa'alaqpi,

'eeta'am aca huouepi maye nañaxattalec ca no'onaxa.

₂₆Ỹataqta 'avitta'a da 'am ỹa'axaiquiolec, nache 'avira aca 'anhuachiqui,

qataq qoneta'am aca naqta ala ca 'auaxa maye ỹataqta ỹeta.

₂₇Qaq 'enauac ne'ena ñemataxai' qomi' ỹapaxagueneque da nachera da lataxac,

qaq ỹataqta 'ana'axaỹaxana de'era, qataq maiche 'am 'analoqten.»