So Job ỹasateguet so Elifaz
1Nache so Job ỹasateguet so Elifaz, 'eeta':
2¡'Onaxaic taxa da qanaloqten de'era ñiqui'ic
qataq da ñeque'eenaxac, da qaỹachangui aca naloqnaxanaxaqui!
3Nache yo'oqta da napacalec taxa
da lsallaxa ca lsoche na 'alhua aso auaxai.
Qaq ỹoqo'oye da setaqa, qalaq qapa'attegueta naua ỹa'aqtaqa.
4Cha'aye Ñim Qaica ca Ỹaqalanapec
ỹataqta aỹem ỹapacaviigui ana lchecnapi,
qaq na lshenataxanaxa anamayepi ỹataqta ỹapacaviigui na ỹo'oc.
Ñim Lo'onatac 'Enauacna ỹataqta aỹem nlaqchigui
da icolanaxa souaxat da l-loquiaxanataxanaxac.
5¿Peta'a ishet da nỹen ca 'ashena da huo'o ca aloq huoue?
¿Huo'otaq nỹen ca huaca da huo'o ca aloq 'auaqpi?
6¿Peta'a ishet da qanallec ca nallec da qaica ca lalegue toue?
¿Peta'a ishet da huo'o ca lamaic ca lapagaxa ca 'olgaxa lco'oue'?
7Cha'aye nam seqaictega co'ollaxa da sasachec,
qalaq nachena nagui na sachectac.
8¡Qaq 'onaxaico' da Ñimaye aỹem ỹanem ca seỹaxanaique,
'onaxaico' da Ñimaye ipacchigui da sheetapeguec!
9¡'Onaxaico' da Ñimaye nacheñi ñi chegoqchigui da aỹem nlaxaañi,
nache imeuo naqa'en da ñachaalataxac!
10Qaq nachera taxa da aỹem ỹa'añaqchet,
na'aictaxa da lta'araic da ñiqui'ic, qalaxaye huo'o da ñetonaxac,
cha'aye aỹem saishet da ñeqoleguete' ca la'aqtac Ñimaye.
11Qataq mashe qaica ca ỹa'añaxac da shecto'ot da seuataxaatac,
qataq negue'to' ca huo'omshe shecto'ot da ñeca'altauec.
12¿Maye sheeta'amo' da la'añaxac ca coma'?
¿Qataq na ỹapat maye 'eeta'amo' da la'añaxac ca lcat bronce?
13Ca sheeteco' da aỹem soolec da maiche shenec,
ye mashe qaica ca aỹem itauan.
14Ca auochaxaua maye huo'o da nque'eenaxac,
camaye iuen da qaỹauotec,
na'aictoxo' da ca'ai qataq ỹaxanec da ñi'iỹa
Ñim Qaica ca Ỹaqalanapec.
15Qalaxaye na ỹaqaỹañicpi aỹem ỹatenachet,
'eeta'am da la'añaxac ca la'auaxac,
qataq 'eeta'am aca lacheugue da ipaxaalec qataq 'em,
16qataq 'eeta'am ca 'etaxat da imalaqta na le'ec
qataq isaxa't da ỹaleeguet aca aloñi.
17Qalaxaye da ivita da napaxaỹañi,
nache deqaqa na la'auaxacpi,
qataq da ana'c naua nta'api nache imeuo na le'ec 'etaxat.
18Huaña nache dashelec camaye ca queuoxoicpi,
nache taalec ca toolec 'alhua huaña nache ileu.
19Qaq na nmenaxaic maye lma' ye Temán nqo'ona se'eso la'auaxac,
qataq na queuoxoicpi maye lma' ye Sabá huo'o da naquitaxac somaye.
20Qalaxaye da ivita somaye, nache saỹaỹaten ca 'eetec,
huaña nache daqat da naquitaxac.
21Qaq 'era da 'eetec ñaqa'en nagui da qoñeeta,
souaxat da qauloỹalec da lchec da souaigui,
nache ỹataqta huo'o da qarcolanqai.
22Qalaxaye aỹem saishet da qami' seỹaxanoto da huo'o ca aỹem qaỹa'añim,
huo'otaq da qaushiichiñi da yaqto' aỹem ñeca'alec.
23Huo'otaq da huo'o ca aỹem nca'alaxateeguesop ca depa'aguenataxaatac,
huo'otaq da aỹem nca'alaxateeguesop da lhuaqỹaxac na qauemaicpi.
24¡Ñaq aỹem qauapaxaguiñi, nache aỹem she'emaqtom qome,
ñaq aỹem qauachaxañiỹa ca huetaña ca isomaxac!
25Naua ỹaỹamaqchiyiñi na'aqtaqa
ỹataqta huo'o da lamai'c da qana'axaỹaxaategalo,
qalaxaye naua qanasaqairec qara'aqtaqalle' saishet da 'eesora.
26Qami' nacherata da aỹem qanmichiitac souaxat naua ỹa'aqtaqa,
cha'aye aỹem huo'o da iuogoxo,
nache naua ỹa'aqtaqa choche taira'cra'.
27¡Qami' ỹataqta qauañoxoche da qaua'ashaxañeetac da nachaalataxac ca saploq,
qataq ivira'a da qaumiñi ca maiche qanauochaxauai!
28Qaq nagui aỹem qauloitot qome,
nache aỹem qoñiỹapega da huo'otaq ñashepegaxaatac.
29Qaq qaỹa'axañiiyiñi qome naua qara'aqtaqalle', maye saishet da 'eesora,
qataq qauaỹachiñiita da ỹoqta 'eesora naua shena'ape.
30¿Qalqo' qaupi'itaxañeetega da saishet da 'eesora naua ỹa'aqtaqa,
huo'otaq da sa saỹaten ca shenapec?
