1Da nachaalataxac ca shiỹaxaua da huetalec ana 'alhua,
qalaq ỹataqta lta'araic da nque'eenaxac,
'eeta'ama naua na'axa'te ca 'onataxanaxaic.
2Qataq 'eeta'am ca nlatac da nañaxaata'ape naua la'a'che
souaxat da lyaxa da hueto'ot ca lpaqal,
huo'otaq ca namaxashec maye iuattaique ca nsheetenaguec.
3Qaq aỹem, mashe huo'oi soua souaiguilo ca'agoxoiqa da qaica ca so'ot,
qataq soua pesa'ache da ñeque'eenaxac.
4Da ñenaatai' ye pe qalaq ỹataqta qaỹoqtec ñaqa'en,
qataq choche ñechemaqtapiguiñi, ivitta'a da yo'oxoguera,
nache da seuennataxaatac qalaq, sheeta': ¿Chaq laguio' qaq yo'oxoñi?
5Da ỹo'ocỹaxac qalaq da'aichigui na qoche'l qataq depoxoỹapega't,
qataq naquittashiguem na lli'i na lpoxoỹaxa na ỹo'oc.
6Naua ñachattaiguilo na'axa'te qalaq sailaua'aguelo,
'eeta'am aca nqaleenaxanaqte,
nache mashe qaica ca ñaquitaxac.
7'Am Ñatamnaxala', 'auennata'a qome,
da de'era ñachaalataxac da 'eeta'ama naua na'a'che da qanauecta'ape.
Nache naua ỹa'ai'te sa lỹa da ỹauachiguilo ca ỹaỹamaqchiguiñi.
8Qaq na aỹem ilota'a nagui, qalaq saishet da qaltaq aỹem ila'a qonte',
qaq 'Am aỹem 'aualletaique qome,
qalaxaye mashe aỹem qaica.
9'Eeta'am na lo'oc na piguem da huesogui nache nlagaxatapec,
qaq nachera da 'eetec ca mashe tangui aca huachiqui,
camaye saishet da qaltaq ñe'eguelaxasheguem,
10nache saishet da qaltaq ỹe'eguelaxa ca lma',
nache ca lauo' le'ecpi saishet da qaltaq nauane' camaye.
11Qaq ỹoqo'oye saishet da se'enaxaatai'.
Qaq souaxat da ỹataqta lta'araic da ñiqui'ic qataq da ỹachetataic,
qaq nachera da ỹo'ot da ñasaxarec ne'enaua ỹa'aqtaqa.
12¿Peta'a aỹemo' auaxai, huo'otaq shiguiỹac lta'araic maye le'ec na 'etaxat,
da yaqto' aỹem qanauaatalec 'anqa'en?
13Cha'aye aỹem naxa da seuennataxan, nache sheeta':
Qom ñenaalec ca imala', nache amata da ñemataxac,
qataq da ỹo'ochaxa ỹa'axaneguet da ỹachotaxac,
14qalaxaye da ỹo'ochaxa huaigui 'anqa'en da icolanaxa,
qataq chaqaiqa 'anqa'en naua ichoxonaxaco.
15Qaq ỹoqo'oye 'onaxaictaxa da qaivigoqot na ỹoqosot,
nache saishet da queta da nca'altauec de'era ñachaalataxac.
16Mashe saỹemec da ñachaalataxac.
Qataq sa iuennataxa da nache 'eetai' da ñeca'altauec.
Ỹoqo'oye aỹem 'aỹa'axaatac, cha'aye da ñachaalataxac qaica ca naigui.
17¿Ta'ainco' da 'auauotaico' da la'amaqchec ca choche shiỹaxauatto?,
qataq ¿ta'ainco' da 'auqochetega camaye?
18Qataq ye nte'eta naua na'axa'tesa'ache da 'anmittac,
qataq 'avi'eguelaqtalec da 'avi'egueetac.
19¿Ta'ainco' ye saq 'axaañi da aỹem 'aulotagui?
Qataq aỹem 'aua'aqta'a taxa da choche seuoxoorañi naua ỹa'alle.
20Qaq da huo'o ca ỹasouaxashet
qalaq ¿negue'to' ca sa ỹaỹamaxañi maye 'Am so'otec,
'Am maye 'anauaatalec na shiỹaxauapi?
¿Ta'ainco' ye ỹataqta aỹem 'aualamaqtapigui?
¿Qalqo' ỹapactec da aỹem 'ausallaxan peta'a?
21¿Ta'ainco' ye sa 'auapalaxato' na ỹasouaxashetpi?
¿Qataq saisheto' peta'a da 'aucoua'ai na qauem maye so'ot?
Cha'aye aỹem mashe saqaỹaloq da sootaigui na 'alhua,
qaq na'aictoxo' da aỹem 'anmittaique qome qalaxaye mashe aỹem qaica.
