Da ltaxaỹaxac so Bildad
1Nache so Bildad maye lma' ye Súah, 'enapeco':
2«¿Chaq laguio', qaq 'aỹa'axaañi da qoneta'ac de'era da 'artaxaỹaxac?
Naua 'ara'aqtaqa qalaq 'eeta'ama na la'at da sancherapec.
3¿Ñim Lo'onatac 'Enauacna peta'a isheto' da ỹashaxanec ca ỹaỹamaqchiguiñi lataxac?
Ñim Qaica ca Ỹaqalanapec saishet da saipaguelec naqa'en da llec ca no'on lataxac.
4Cha'aye so 'aỹa'alaqpi da huo'o ca lasouaxashet hueto'ot Ñim Lo'onatac 'Enauacna,
nache Ñimaye mashe ỹauo'o da nhuaxanaguec somayepi.
5Qalaxaye da 'anmitaique Ñim Lo'onatac 'Enauacna maye Qaica ca Ỹaqalanapec,
nache 'auỹaxanot da yaqto' choche 'am ichoxoren,
6cha'aye da qui'itta qataq ỹaỹamaqchiguiñi da 'arataxac,
nache Ñimaye ỹataqta 'am ilotague',
qataq 'am ỹe'eguelaxatot na 'aralamaxatpi co'ollaxa.
7Qaq so hua'auchiguiñi 'arsallaxa co'ollaxa,
somaye qaica ca la'amaqchec da qanaloqneguet
ca 'arsallaxa maye 'auaconeguet qome.
8Qataq 'aunataxanec qome som hua'au shiỹaxauapi,
qataq 'auchemaxata qome na mashe nmate' lataxac so lta'alpi somayepi.
9Qomi' ñaq cheta'ague da qomi' huo'oi so lỹa na'a'q,
qataq qaica ca saỹaanaqpec,
naua qana'axa'te da souaqtalec ana 'alhua
qalaq 'eeta'am na lpaqal da taỹa'a da pal.
10Cha'aye ne'ena togoshec shiỹaxauapi 'am da'aqtaxanem,
qataq ỹachegoxotanguit añi lquiyaqte
na 'am ỹanem la'aqtacpi da 'am ỹapaxaguen.
11¿Isheto' peta'a da ñaxat aca na'aate da huetalec ca qaica ca nshaxa?
qataq ¿ishet peta'a da ñaxat na pe'elac lta'a da netaña ca qaica ca 'etaxat?
12Qalaxaye na'aictaxa da ñaq darala,
qataq da ñaq saxanaxa da qaiquesoq,
qalaq ishet da deqaqa, napacalec ana laỹepi huouepi.
13Qaq 'era da 'eetec da llecỹaxac
'enauac na icoua'ai Ñim Lo'onatac 'Enauacna,
qataq da 'eetec da imeuo da naquitaxac na qauemaicpi.
14Da naquitaxac qalaq qaica ca la'añaxac,
qataq da lpe'e ỹataqta qapio'olec 'eeta'am na palachiyaxa lo'oxonec.
15Ỹoqo'oye da hua'axaua'a camaye qalaq qaica ca la'añaxac,
qataq da ỹacootaua'a qalaq saishet da nalo'oguet camaye.
16Cha'aye namayepi 'eeta'am ana qo'oipaq darala
da hueta'aguet na le'eraxa añi nala',
nache nquictauec ana llaxataxapi da ñaxaalec ca nañiguishe lma',
17qaq na lpa'a'pi anamaye ỹataqta nañaxattaigui ana coma'pi,
qataq no'oxona'aguet na coma' laỹepi.
18Qalaxaye da choche qanapogosheguem que'eca na'attaña,
nache qaica da huo'o ca ỹa'axat da na'attaña co'ollaxa yi'iye 'alhua.
19Qaq 'era da 'eetec da imeuo da lamaicỹaxac da nachaalataxac,
qaq que'eca lañaxataqa' nache ñaxaalec ana ỹaqa'a huoue.
20Cha'aye Ñim Lo'onatac 'Enauacna
saishet da ca'ai ca shiỹaxaua ỹaỹamaqchiguiñi da lataxac,
qataq saishet da itauan ca ỹo'otta'ape naua qauema.
21Ñimaye ishet da 'am ỹe'eguelaxata da qaltaq 'auaỹalleguettac,
qataq 'am ỹanem da 'aua'alaqtai' souaxat da 'antonaxac,
22Qaq na 'am nquiỹategapi qalaq choche ỹapoguilo naua lashego da la'aloxo,
qataq naua lma'ate na qauemaicpi ivira'a da nlachiyiñi.»
