Job 9

₂Aỹem mashe saỹateeta da 'eesa de'era qoỹenapec.

Qalaxaye ca 'eeteco' da huo'o ca da'aqtaxanem

Ñim Lo'onatac 'Enauacna da 'eetega qaica ca ỹasouaxat,

₃cha'aye da huo'o ca nshetaique da ncotaỹapegue' Ñimaye,

qalaq na qalota la'aqtacpi Ñimaye,

saishet da 'oonolec ca qaỹañoxot da qaỹataỹa'aguet.

₄Cha'aye Ñimaye ỹataqta lta'araic da la'añaxac qataq da laỹaanec,

¿qaq negue'tom ca ishet da dataỹa'aguet Ñimaye

nache qaica cara da nachaalataxac?

₅Ñimaye da dalemata nache ỹacholaxan ana qasoxonaxapi,

qaq anamayepi saishet da nanoma,

chaq negue't ca hualolaguiñi naqa'en.

₆Ñimaye ishet da ca'ai naqa'en ca na'attaña ana 'alhua,

qataq ishet da cholaxan naqa'en ca ỹa'añaxattañi anamaye.

₇Ñimaye ishet da 'enapega aso nala' da saishet da nnoxoosheguem,

qataq ana huaqaañipi da yaqto' saishet da 'eroigui.

₈Ñimaye ndote' co'ollaxa da ỹo'ot na piguem,

qataq vi'iiguet naqa'en ana lapaxa ana auaxai.

₉Ñimaye lo'onata ana ỹotta'a't huaqaañipi late'eraipi:

huo'o aso le'enaxat Osa Mayor, qataq aso Orión

qataq aso Pléyades qataq ana laỹepi huaqaañipi

maye na'ague da pa'aỹa'ague da la'añaxa.

₁₀¡Ñimaye ỹataqta qalota na ỹo'otpi lta'araicpi,

maye qaica ca ishet da ỹaỹaten qataq qaica ca 'ena'am

da llo'oxoyec, qataq saishet da qaivi' da qanaloqten!

₁₁Qaq Ñimaye da huo'otaq aỹem nlectot, qalaq saishet da sela'a,

qataq da aỹem napacalec, nataqa'en saishet da ñanoma,

₁₂qataq da huo'o ca ỹacona da ỹauo'o lalamaxat,

qalaq ¿negue'tom ca ishet da ñe'eguelaxaala't?

Cha'aye negue'tom ca ishet da ichemaxata ca ỹo'ot Ñimaye.

₁₃Ñim Lo'onatac 'Enauacna da dalemata,

qalaq saishet da pasa'a da nañaxaañi,

qaq na ltauapi so Rajab

qalaq ỹa'atto'oto naua l-llecte Ñimaye.

₁₄¿Qaq ca sheeteco' ca ỹa'aqtac da yaqto' sasateguet Ñimaye,

qataq ca 'eeteco' ca ỹa'aqtac da ñecotaỹapegue'?

₁₅Qaq na'aictaxa da qaica ca sasouaxat,

qalaxaye saishet da sasateguet Ñimaye.

Ñimaye nacheñi ñi aỹem nmit,

ỹoqo'oye seỹaxanot da choche aỹem ichoxoren.

₁₆Qaq Ñimaye da huo'otaq seỹaxana, nache aỹem hua'axaỹa,

qalaxaye yo'oqta da saishet da aỹem ỹoqocha'a.

₁₇Nache Ñimaye yo'oqta da aỹem iuaxanec ca la'at lta'araic,

nache nquigaxatec na ique'emaxapi,

na'aictaxa da qaica ca la'amaqchec ca sasouaxat,

₁₈nache ỹo'ot da qaica naqa'en ca ldaqa' naua ỹa'a'che,

qataq aỹem nlaxatchigui da ñequi'icỹaxac.

₁₉Qaq da nachera da yo'oqchigui na'añaxac,

qalaq Ñimaye ỹataqta ỹactec da la'añaxac,

qaq da huo'o ca qancotaỹapigui qalaq

¿negue't ca ishet da ỹañoxot da nachaateuo naqa'en Ñimaye?

₂₀Qaq na'aictoxo' da qaica ca ỹasouaxashet,

qalaxaye naua ỹa'aqtaqa nachenaua naua aỹem ỹasouaxa't.

Qataq na'aictoxo' da no'on da ỹataxac,

qalaxaye Ñimaye nache 'ena'am huo'o naqa'en ca ỹasouaxashet,

₂₁Aỹem ỹataqta qaica ca sasouaxat,

qalaxaye mashe qaica ca naigui da ñachaalataxac.

Cha'aye aỹem mashe ñasamiisop da ñeca'altauec.

₂₂Qaq damaye nache 'eeta'a't. Ỹoqo'oye da iuennataxac, 'eeta':

Ñimaye nlaxaañi cam huo'o na ỹasouaxat qataq ca qaica ca ỹasouaxat.

₂₃Qaq da nque'elaxatta da qanayeuaigui ca napiina maye dalaataxanapec,

nache Ñimaye choche ỹe'eetac da nque'eenaxac na qaica ca ỹasouaxat.

₂₄Qaq Ñimaye ỹanem da yaqto' na qauemaicpi ỹacona na lma' na huetalec ana 'alhua,

qataq ỹaxachiguilo naua la'ai'te na aloico lo'o', yaqto' saishet da nmit damaye,

qaq Ñimaye da saishet da ỹo'ot de'era, qaq ¿chaq negue'ttoxo' ca lỹa ishet da ỹo'ot de'era?

₂₅Naua ña'axa'te qalaq ỹataqta nqalgoqta'ape, 'eeta'ama ca qomitaxaic,

qataq ỹataqta sailaua'aguelo, nache sanauane' ca ỹaỹamaqchiguiñi.

₂₆Ne'enaua ña'axa'te ỹataqta sailaua'aguelo

'eeta'ama aca notaxaqui da qanayiguingui na 'etaxat,

qataq 'eeta'am ana naloxo na taga' da icanapec ca loxonec.

₂₇Qaq da, sheeta': Secoua'ai qome da ñeque'eenaxac,

nache se'enaxat da samachiguiñi qataq saỹalleguettac,

₂₈qalaxaye ỹataqta aỹem icolanaqchet, 'enauac ne'ena ñequi'iguesat

cha'aye aỹem saỹaten da Ñimaye saishet da ỹa'amaqten da qaica ca sasouaxat.

₂₉Cha'aye Ñimaye mashe ỹaỹaten da huo'o na ỹasouaxashetpi,

nache negue'to' ca naigui da ña'añaxattac.

₃₀Cha'aye na'aictoxo' da sauota'a na nỹoxonaxat da seỹoi' naua ihuaxaye,

huo'otaq da seỹoxona ca lỹa nỹoxonaxat,

₃₁qalaxaye nache 'ena'am ishet da aỹem 'auasaxangui ca qaỹoqchiguingui nshaxa,

huaña nache ivira'alo naua maiche aỹogo aỹem deqaigalo.

₃₂Cha'aye Ñimaye saishet da 'eeta'am ca choche shiỹaxauatto da shenapega,

sheeta': «Qolaq ñeqo'onaxaua'a ye huaña da huo'o ca qanmit.»

₃₃Cha'aye da shenaqta, qaica ca ishet da nmit na nasouaxashetpi,

qataq ca qomi' nalaleguete da qomi' nmi't,

₃₄qataq qaica ca nqanaxata'aguet Ñimaye da aỹem iuaxaatac,

qataq da aỹem icolanaqchet da lchec Ñimaye.

₃₅Qalaxaye, nache 'ena'am ishet da setaxaỹot Ñimaye, qaica ca she'etaique.

Cha'aye saỹateeta da qaica ca ỹasouaxashet hueto'ot Ñimaye.