Josué 10

₁Qaq so Adonisédec, maye nta'a ye Jerusalén co'ollaq ỹaỹaten da so Josué loxonec ye Ai, qataq ỹataqta nlachiguiñi naqa'en 'eeta'am co'ollaxa da 'eetec ye Jericó, qataq da 'eetec nataqa'en so nta'a yemaye, qataq co'ollaq ỹaỹaten da so Gabaón le'ecpi mashe naỹamaxate' so Israel le'ecpi, qataq nache ỹalectaigui somayepi, ₂nache so Adonisédec ỹataqta lta'araic da lcolanaxa. Cha'aye so huaqta'a't nỹecpi ye Gabaón, yemaye 'amaqtaqaic qataq qalochiguiñi, qataq yemaye napacalec da la'amaqchec ye Ai, qataq som lma' yemaye ỹataqta 'añaxaicpi. ₃Qaq souaxat de'era nache so Adonisédec ỹamaxa da la'aqtac soua nta'al, som Hoán maye nta'a ye Hebrón, qataq so Pirán, maye nta'a ye Jarmut, qataq so Jafía maye nta'a ye Laquis, qataq so Debir maye nta'a ye Eglón. ₄Nache da la'aqtac somaye, 'eeta': «Ña qauanaqui qome. Aỹem qautauañi da seloquiaxai' ye Gabaón le'ecpi, cha'aye yemayepi mashe naỹamaxate' ñi Josué qataq ye Israel le'ecpi.» ₅Qaq huaña nache se'esoua cinco lta'al so amorreopi, som nta'a ye Jerusalén, qataq so nta'a ye Hebrón, Jarmut, Laquis, qataq ye Eglón, soomaye huaxaỹa't, qataq lỹatec so nalleppi nache naña ye nalotta ye Gabaón da yaqto' iloquiaxan yemaye.

₆Qaq so lma' ye Gabaón ỹamaxa da la'aqtac so Josué maye hueta'a ye Gilgal, 'eeta': «Saishet qome da huo'o ca 'ectega da qomi' 'autaua'n, cha'aye maiche qomi' 'aramaxashecpi. Qataq sa 'anaỹaloxon qome da 'auanac da qomi' 'autaua'n, cha'aye 'enauac ye lta'alpi ye amorreopi maye netalec aye qasoxonaxapi, yemayepi huaxaỹa't da yaqto' qomi' iloquiaxa'n.» ₇Huaña co'ollaxa nache so Josué jec, chegoqchiguiña ye Gilgal, lỹatec so nalleppi maye ỹataqta alaataxaicpi, ₈nache Ñim Nataxala' 'enapego' somaye, 'eeta': «Saishet qome da 'añe'etega yemayepi, cha'aye aỹem 'am sanem qome da 'oxonecpi, qaq yemayepi qaica ca ishet da 'am dataỹa'aguet.»

₉Nache so Josué palom da queta se'eso pe chegoqchiguiña ye Gilgal, nache ỹataqta ique'elaxatta da iloquiaxan se'eso amorreopi. ₁₀Qaq Ñim Nataxala' ỹanem se'eso nta'alpi da ỹataqta ñi'iỹa naqa'en so Israel le'ecpi, qaq ỹoqo'oye so Josué ỹataqta qalota so ỹalauat huaña ye Gabaón, qataq icaatac co'ollaxa so laỹepi huaña so nqa'aic ye Bet Jorón, nache queto'ot da ỹalauattac so amorreopi, nache iviraxatta'a ye Azecá qataq ye Maceda. ₁₁Qaq se'eso amorreopi co'ollaq mashe quetangui so ca'amegue ye Bet Jorón souaxat da 'ettapeguem so Israel le'ecpi, nache Ñim Nataxala' anacot co'ollaxa aso lache maye ỹataqta late'el, nache ỹataqta qalota so ỹalauat. Nache ỹataqta qalota so lalaatac asa'aso lache, napacalec so lalaatac so Israel le'ecpi.

₁₂Qaq co'ollaq mashe ime da Ñim Nataxala' ỹaneguet da lhuaqỹaxac so Israel le'ecpi se'eso amorreopi, nache so Josué 'enapega Ñim Nataxala', hua'aqchigui naqa'en so nhuo' le'ecpi, 'eeta':

Qaq 'era da nanettalec aso lere so «No'on da Lataxac.» Añi nala' vi'iiguet co'ollaq huangui na laiñi na piguem, nache ivi' 'oonolec na'a'q da saishet da inoxooñi. ₁₄Qaq saishet da huo'o co'ollaxa qataq qome ca na'a'q lỹa da 'eeta'am se'eso na'a'q da Ñim Nataxala' hua'axaỹa da lỹaxanaxac so shiỹaxaua, qataq da deloctapeguelec so Israel le'ecpi maye lalamaxat nhuo' le'ecpi.

₁₅Qaq co'ollaq ime de'era, nache so Josué qataq so nalleppi ỹe'eguelaxa so lanataqa' maye naña ye Gilgal, ₁₆qaq se'esoua cinco lta'al so amorreopi datarec co'ollaxa, nache nqañoxotoiguilo so auac ye Maceda. ₁₇Qalaxaye co'ollaq mashe qaỹata'ague nache qailaleguete da huetraigui so auac ye Maceda, nache qaỹa'aqtaxanem so Josué. ₁₈Huaña nache so Josué, 'eeta': «Qauapoigui qome ca ñegueuo que'eca auac qauauoita'a ca ỹataqta lta'al coma', qataq huo'oi qome qanqa'eñi caua nauaata'ape que'eca ñegueuo. ₁₉Qataq saishet qome da nache qoviita'a ne'ena, nacherata da qaucañiỹapec qome na qampa'aguenaxauaipi, qanauañi' qome naua na'axasoxonataqa. Nache saishet da qauashiñim da ỹe'eguelaxaua'a nam lalamaxat huaqta'a't nỹecpi, cha'aye Ñim Nataxala' maye Qanatamnaxala'ai mashe qami' ỹanema da qoroxoñiqui namayepi.»

₂₀Qaq so Josué qataq so Israel le'ecpi co'ollaq mashe loxonec so amorreopi qataq ỹataqta qalota so ỹalauat, qalaxaye so laỹepi amorreopi maye ñaq nca'altauec, ỹe'egueneua'a co'ollaxa so maiche lalamaxat huaqta'a't nỹecpi maye huo'o so sansattec lpaqtaxat. ₂₁Huaña nache 'enauac so Israel le'ecpi ỹe'eguelaxa so lanataqa' maye naña ye Maceda, yem netaña so Josué, qaq nache ỹataqta qaica ishet da ỹasaxalec ca qauem la'aqtac so Israel le'ecpi.

₂₂Huaña co'ollaxa nache so Josué, 'enapeco': «Qanqache cam lapoxot que'eca ñegueuo que'eca auac, nache qanqacheerec que'ecaua cinco nta'al ye amorreo.» ₂₃Qaq 'era da 'eetec co'ollaxa so Israel le'ecpi da nqatrec soua nta'al maye huetraigui so auac, som nta'a ye Jerusalén, Hebrón, Jarmut, Laquis qataq ye Eglón. ₂₄Qaq co'ollaq mashe qaỹaueguereua'a so Josué soua nta'al, nache somaye iỹaxaneuga 'enauac so Israel le'ecpi, nache 'enapega so lataxala'pi so alleppi maye nnaictague' somaye, 'eeta': «Qanquiquiiuo, nache qauapiiỹoto naua lqoso'oche ne'enaua nta'al.» Qaq somayepi nache ỹo'ot de'era, ₂₅huaña nache so Josué, 'enapeco': «Saishet da qayi'iitac, qataq da qauqaulleetac, qataq saishet da leuapigui ye qarvilỹaxaqui, nacherata da ỹataqta qami' qaramchiguilo qome qataq da qami' 'añaxaiqa, cha'aye 'era da 'eetec qome Ñim Nataxala' 'enauac na qampa'aguenaxauaipi.»

₂₆Huaña co'ollaxa nache so Josué ỹalaua't se'esoua nta'al, ime nache damaxasoxoolec da ñi 'oonolec soomaye, qaicoñerasheguemec añi 'oonole soua cinco qo'oipaq, nache ivitta'a so avit. ₂₇Qaq co'ollaq mashe yaqta'a da inoxooñi aso nala' nache qaltaq damaxasoxoolec da qanqaayiñi se'esoua leuaxaiqa. Ime, nache qaỹasaxaiguilo se'eso auac maye huetraigui co'ollaq nqañoxottrañi. Huaña nache qaỹapogui so ñegueuo se'eso auac qaỹauota'a soua ỹataqta lta'al coma', qaq choche ivitta'a nagui da nache hueta'a se'eso coma'pi.

₂₈Qataq nacheso se'eso na'a'q, da so Josué deuotaxanec so huaqta'a't nỹecpi ye Maceda, nache 'enauac da ilaxachigui, qataq damaxasoxoolec da imauec qaỹalauat so lma' yemaye, qairota'a so ỹeelonec, qataq ỹataqta qaica ca qano'onaxatañi da qanca'alaxattauec. Qaq so nta'a ye Maceda nache ỹe'enaxatchigui da 'eetec co'ollaq ỹalauat so nta'a ye Jericó.

₂₉Qaq nache chegoqchiguiña ye Maceda da so Josué qataq 'enauac so Israel le'ecpi da jec, nqo'ona so huaqta'a't nỹecpi ye Libna nache iloquiaxan. ₃₀Qaq Ñim Nataxala' ỹanem co'ollaxa somayepi da loxonec nataqa'en se'eso huaqta'a't nỹecpi qataq so nta'a. Nache ỹataqta qaica ca no'onañi da nca'altauec qanqa'en, qaq so nta'a ye Libna qalaq qaỹe'enaxatchigui da 'eetec co'ollaxa so nta'a ye Jericó.

₃₁Qaq co'ollaq ime, nache so Josué qataq so Israel le'ecpi ca'ai ye Libna da yaqto' nqo'ona ye Laquis, nache somayepi hua'a co'ollaxa ye sa qaỹapeque so huaqta'a't nỹecpi da yaqto' iloquiaxan. ₃₂Qaq so lỹa na'a'q, nache Ñim Nataxala' ỹanem so Israel le'ecpi da loxonec ye Laquis, qataq nache 'eeta'am naqa'en da 'eetec co'ollaxa ye Libna, da so Israel le'ecpi irolec so ỹeelonec da ỹalauat 'enauac so shiỹaxauapi qataq so shiguiỹacpi. ₃₃Qaq so Horán maye nta'a ye Guézer, lỹatec co'ollaxa so nalleppi da iueelec ye Laquis, qalaxaye so Josué nauec somayepi nache ỹataqta qaica ca no'onañi da nca'altauec naqa'en.

₃₄Qaq co'ollaq ime ye Laquis, nache so Josué qataq so Israel le'ecpi nqo'ona so huaqta'a't nỹecpi ye Eglón, nache hua'a co'ollaxa ye sa qaỹapeque yemaye da yaqto' iloquiaxan. ₃₅Qaq nacheso se'eso na'a'q da loxonec qataq irolec so ỹeelonec da ỹalauat 'enauac so lma' yemaye, nache ỹataqta imauec ilaxachigui 'eeta'am da 'eetec naqa'en co'ollaxa ye Laquis.

₃₆Ime nache ca'ai ye Eglón da yaqto' nqo'ona da iloquiaxan so huaqta'a't nỹecpi ye Hebrón. ₃₇Qaq co'ollaq loxonec yemaye nache ỹataqta imauec da ilaxachigui, qataq irolec so ỹeelonec da ỹalauat so nta'a qataq 'enauac so shiỹaxauapi, qataq so shiguiỹacpi nache ivira'a so lauoreuapi somayepi, nache 'eeta'am naqa'en da 'eetec co'ollaxa ye Eglón.

₃₈Qaq nache chegoqchiguiña yemaye da so Josué qataq 'enauac so Israel le'ecpi da nqo'ona so huaqta'a't nỹecpi ye Debir, nache iloquiaxan, ₃₉nache irolec so ỹeelonec da ỹalauat 'enauac somayepi qataq so nta'a yemaye, nache ivira'a 'enauac so lauoreuapi. Nache qaica naqa'en ca no'onañi da nca'altauec so lma' ye Debir, nache ỹataqta 'enauac da nmatchiguiñi, 'eeta'am da 'eetec naqa'en co'ollaxa ye Hebrón, qataq ye Libna qataq soua nta'al yeemaye.

₄₀Qaq 'era da 'eetec co'ollaxa so Josué da loxonec 'enauac se'eso 'alhuapi. Qataq nauec so nta'alpi maye nalec so 'alhuapi maye hualec aye qasoxonaxapi yem Néguev, som nalochiguiñi 'alhuapi qataq som nashecchiguiñi loiguepi. Nache ỹataqta 'enauac da ilaxachigui qataq ỹalauat 'enauac nache qaica ca no'onaxatañi da nca'altauec naqa'en, nache ipacchigui 'enauac nam ỹamaxalecpi Ñim Nataxala' maye Natamnaxala' na Israel le'ecpi. ₄₁Nache chegoqchiguiña ye Cadés Barnea, nache ivitta'a ye Gaza, qataq 'enauac ye 'alhua ye Gosén, nache ivitta'a ye Gabaón nache ỹalauat so nta'alpi se'eso 'alhuapi. ₄₂Nache ỹacona so na'alhuapi somayepi, cha'aye Ñim Nataxala' maye Natamnaxala' na Israel le'ecpi deloctapeguelec namayepi. ₄₃Qaq co'ollaq ime, nache so Josué qataq 'enauac so Israel le'ecpi ỹe'eguelaxa co'ollaxa so lanataqa' ye Gilgal.