Soua Gabaón lashe' ỹatenache't so Josué
1Qaq so lta'alpi so hitiitapi, qataq so amorreopi, Canaán le'ecpi, ferezeopi, heveopi, Jebuseopi ỹaỹaten co'ollaxa de'era qanayeuaigui. Qaq se'eso nta'alpi netaña co'ollaxa so loigue maye pa'aỹa'ague da avit so tala Jordán, qataq aye qasoxonaxapi, qataq ye nalochiguiñi 'alhua qataq 'enauac so loigue aso Auaxai Mediterráneo, nache ivitta'a so 'alhuapi ye Líbano. 2Huaña nache 'enauac somayepi naỹamaxara't qataq huaxaỹa't da yaqto' qailogui' so Josué qataq so Israel le'ecpi. 3Qalaxaye so heveopi maye netaña ye Gabaón, co'ollaq ỹaỹaten de'era ỹo'ot so Josué, maye huaña ye Jericó qataq ye Ai, 4nache ỹauo'oi soua lamaxa'she da yaqto' datenataxa'n, nache co'ollaq je'c soomaye nache ỹauota'a ltoxoic so lachoxonaxaquipi maye ỹachalec so lalo 'ashenapi, qataq aso laỹe' na lataxa maye lo'oc itagoqtac qataq pannaxai. 5Nataqa'en ỹaayiñi soua alogo qataq lapela'ate ltoxoiqa qataq pannaxaiqa. Qataq ỹache aso mashe qaramta nauole 'ayiiña maye mashe decochigui. 6Qaq co'ollaq ivildeua'a so nanataqa' maye netaña so Josué maye naña ye Gilgal, nache soomaye da'aqtaxaarem so Josué qataq so Israel le'ecpi, 'eeta':
«Sachegoxosaqa'a ye 'alhua maye ỹataqta qaỹoqta. Qaq qomi' sauoqtaique da qomi' 'anaỹamaxateto.»
7Nache so Israel le'ecpi ỹasategueto' se'esoua heveo lashe', 'eeta':
«Yo'oqta da sa qaỹapeque ca qarmaye ne'ena souaqta'a. ¿Qaq taloxochiyectoxo' da qami' ñaỹamaxataxato?»
8Nache soomaye 'enapegalo' so Josué, 'eeta':
«Qomi' sauoqtaique da choche qomi' 'aramaxa'she.»
Qalaxaye so Josué ina't soomaye, 'eeta':
«¿Negue't qami'? Qataq ¿hua'ague ca qauachegoqoita'ague?»
9Nache soomaye 'ena'apo':
«Qomye sachegoxosaqa'a ye ỹataqta qaỹoqta 'alhua, qaq souaxat da sa'axasoqtega da llo'oxoyec da le'enaxat Ñim Nataxala' maye 'Anatamnaxala'. Qaq qomi' saỹatenaq 'enauac na ỹo'otpi Ñimaye co'ollaq huaña ye Egipto, 10qataq da ỹo'oteque co'ollaxa soua dos lta'al so amorreopi maye neraña da le'ego ye tala Jordán, so Sijón maye nta'a ye Jesbón, qataq so Og maye nta'a ye Basán maye netaña ye Astarot. 11Qaq ỹoqo'oye ye nqueroxonecpi maye qarataxala'pi qataq ye maiche qaraỹepi maye netaña yemaye, qomi' 'enapegalo, 'eeta': ‹Qanqo'oñiỹa qome ca netaña camayepi, qalaxaye qauache qome ca qo'oqoi, cha'aye qaỹoqoolec na nqa'aic, nache qom qaviyeeua'a ca netaña camayepi, nache qoñiỹapega da choche qomi' lamaxa'she, qataq sauoqtaique da qomi' naỹamaxateto camayepi.› 12Qaq so ñenoxonaxauec da sachegoxosoqteua'a ye qarma' da yaqto' qami' ñauanaxato, nache ana'ana nauole 'ayiiña qalaq ñaq dapaqtai', qaq nagui ña qaumichiñi anamaye mashe daqaqta qataq qaramta. 13Qataq ne'enaua qartal, ñaq dalaxaale se'eso seỹoxosoxoguilo naamaye na lataxa, qalaxaye nagui naamaye mashe ltoi'. Qaq nache 'ena'ama ne'enaua qorogo, qataq naua qarapela'ate, cha'aye ỹataqta qaỹoqoolec ne'ena nqa'aic.»
14Huaña co'ollaxa nache so Israel le'ecpi ỹasateguet da chec se'eso aloq maye nachetrac soua chegoqtra'a ye Gabaón, qalaxaye saishet da inat co'ollaxa Ñim Nataxala'. 15Huaña nache so Josué naỹamaxateto soua Gabaón lashe', nache ỹan so la'aqtac da saishet da huo'o ca 'ena'aque qataq da ichoxore'n da nachaalataxa'c. Nataqa'en se'eso lataxala'pi so Israel le'ecpi ỹaỹamaxareeta de'era aỹamaxataxac.
Da 'eetec co'ollaq qailalec da latenataxanaxa'c soua Gabaón lashe'
16Qaq co'ollaq mashe inoxoorec soua tres na'axa'te, nache so Israel le'ecpi la'axaỹaxac da so Gabaón le'ecpi ỹoqta maiche lauoreuapi, qataq sa qaỹapeque ca netaña. 17Huaña co'ollaxa nache so Israel le'ecpi jec da yaqto' nmitrapigui se'esoua Gabaón lashe'. Qaq co'ollaq mashe inoxoorec soua tres na'axa'te nache qaivireua'a ye Gabaón, Querifá, Berot qataq so Quiriat Yearin, huaqta'a't nỹecpi maye lalamaxat som gabaoniitapi. 18Qalaxaye so Israel le'ecpi saishet da ỹalauat somayepi, cha'aye som lataxala'pi ỹan co'ollaxa so la'aqtac, hua'aqchigui naqa'en Ñim Nataxala' maye Natamnaxala' na Israel le'ecpi da yaqto' qaichoxoren da nachaalataxac somayepi.
Qaq souaxat de'era nache 'enauac so Israel le'ecpi ỹataqta quetapeguelec de'era ỹo'ot se'eso nataxala'pi. 19Qalaxaye se'eso nataxala'pi 'enapeco' da la'aqtac:
«Qomi' sanaq co'ollaxa so qara'aqtac, hua'aqchigui ñaqa'enaq Ñim Nataxala' maye Natamnaxala' na Israel le'ecpi. Qaq ỹoqo'oye saishet da huo'o ca shenaqa'ac namayepi. 20Qaq ỹoqo'oye nache 'eetai' qome da ñeca'alaxataqtauec namayepi, cha'aye da sa sepagaxalec so sanaq qara'aqtac, nache Ñim Nataxala' ishet da qomi' dalemataỹalo qome.»
21Huaña co'ollaxa nache so nataxala'pi 'enapeco':
«Qauauaqaita'a qome namayepi da nca'altauec, qalaxaye chochaq qo'oipaq lo'opi qanqa'eñi, qataq da nỹoqtapegueua'a na 'etaxat 'enauac da qoñiita.»
Qaq 'era da 'eetec da so nataxala'pi ipacchigui so ỹan la'aqtac co'ollaxa.
22Qalaxaye so Josué iỹaxaneugalo co'ollaxa soua Gabaón lashe' nache ina't, 'eeta':
«¿Ta'ainco' da qomi' qauatenachichi', da qoñiitega qaỹoqtegue cam qauachegoqỹa'ague, qamaq ye ỹataqta qami' qareuoreu'? 23Qaq souaxat de'era, nache chegoqchiguiña nagui da qami' taleguete ca qauem, ỹoqo'oye nache 'eetai' qome da choche qami' nlataqa. Nache qauquesoqoitapigui qome na qo'oipaq qataq qanỹoqoitapegueua'a na 'etaxat ñi nma' maye lalamaxat Ñim Ñatamnaxala'.»
24Qaq soomaye ỹasategueto' so Josué, nache 'ena'apo':
«Qomi' qarlataqalli'. Qaq qomi' saỹatenaq da 'eetec co'ollaxa Ñim Nataxala' maye Qanatamnaxala'ai, da ỹamaxalec so lamaxashec Moisés, da qami' ỹanema 'enauac ne'ena 'alhuapi, qataq da qaulaxachiigui 'enauac na netaña namaye. Qomi' so'otaq de'era, souaxat da selaqa'a da mashe sa qaỹapeque na qoviita'a nache huo'o da lta'araic qarcolanaxa da qomi' qaualauache'. 25Qalaxaye mashe souaqto'oto naua qarhuaxayilli', qaq maicheye cam qomi' qoñiita'aque.»
26Qaq ỹoqo'oye so Josué sa ỹashenem so Israel le'ecpi da ỹalauat so Gabaón le'ecpi, 27qalaxaye ỹanem somayepi da choche qo'oipaq lo'opi, qataq da nỹoqtapegueua'a na 'etaxat so Israel le'ecpi qataq aso nca'atoxonaxalate maye lalamaqte Ñim Nataxala' maye netaña cam lca'aua'a Ñimaye. Qaq nache ivitta'a nagui da na Gabaón le'ecpi da choche nlatacpi.
