So Josué loxonec so Jabín qataq so laỹepi
1Qaq so Jabín maye nta'a ye Jazor, co'ollaq ỹaỹaten 'enauac de'era, nache ỹamaxa da la'aqtac so Jobab, som nta'a ye Madón, da yaqto' naỹamaxate' nataqa'en soua nta'al ye Simerón qataq ye Acsaf. 2Qataq 'enauac so nta'alpi yem 'alhuapi maye nalec aye qasoxonaxapi maye pa'aỹa'ague da sheu', qataq ye ca'amegue ye Jordán maye pa'aỹa'ague da la'añaxa aso Lapel Quinéret, qataq ye nalochiguiñi 'alhua, qataq ye Dor yem pa'aỹa'ague da avit. 3Nataqa'en ỹamaxa da la'aqtac so Canaán le'ecpi maye naña yem pa'aỹa'ague da yo'oxoñi, qataq som naña yem pa'aỹa'ague da avit, qataq so amorreopi, hitiitapi, ferezeopi, qataq so Jebuseopi maye nalec ayem qasoxonaxapi, qataq so heveopi maye neto'ot añi qasoxonaxa Hermón, maye huaigui ye 'alhuapi ye Mispá. 4Nache 'enauac se'eso nta'alpi lỹatec co'ollaxa so nalleppi, qataq so ỹataqta qalota caipi, qataq aso nalaataxaquipi laigonapi. Qaq ye ỹataqta qalota se'eso alleppi, nache qaica ca ỹañoxot da naloqten, cha'aye 'eeta'am na coma' lsoche maye huaña na loigue aso auaxai. 5Se'eso nta'alpi huaxaỹa't co'ollaxa, nache hua'a ye sa qaỹapeque na npaxaatasheguem 'etaxat ye Merón, da yaqto' delogui' so Israel le'ecpi.
6Qalaxaye Ñim Nataxala' 'enapego' so Josué, 'eeta': «Saishet qome da 'añi'iỹa yemayepi, cha'aye qoyo'oxoñi qom ivita ye ñichiguiña nagui añi nala', nache 'enauac yemayepi qauauañiichigui da ileu. Qaq qami' qauchiquiiguilo qome naua lchel ye lalo caipi, qataq qauavigaxache qome aye nalaataxaquipi laigonapi.»
7Huaña nache so Josué qataq 'enauac so nalleppi maye ỹataqta alaataxaicpi, ique'elaxatta co'ollaxa da iloquiaxan somayepi, co'ollaq huaña so npaxaatasheguem 'etaxat ye Merón, 8qaq Ñim Nataxala' ỹanem so Israel le'ecpi da nauec somayepi, nache iloquiaxaatac qataq icaatalec co'ollaxa somayepi, iviraxata'a ye 'amaqtaqaic huaqta'a't nỹecpi ye Sidón qataq ye Misrefot Mayin maye pa'aỹa'ague da sheu', nache iviraxatta'a ye nalochiguiñi 'alhua ye Mispá, yem pa'aỹa'ague da yo'oxoñi. Nache ỹataqta qaica ca no'onaxatañi da nca'alaxattauec. 9Nache so Josué ipacchigui da ỹo'ot 'enauac nam damaxasoxoolecpi co'ollaxa Ñim Nataxala', cha'aye ichiiguilo naua lapia'ate so lalo caipi so mpa'aguenaxauapi, qataq ỹavigaxat aso nalaataxaquipi laigonapi somayepi.
10Qaq co'ollaq ỹe'eguelaq so Josué, nache iloquiaxan so huaqta'a't nỹecpi ye Jazor, qataq ỹalauat so nta'a yemaye cha'aye nacheso som qaỹatatalec co'ollaq naỹamaxara't so nta'alpi. 11Qataq ỹalauat nataqa'en 'enauac so lma' yemaye. Nache ỹataqta imauec da qailaxachigui co'ollaxa se'eso huaqta'a't nỹecpi, ime nache qaỹavigaxat. 12Qaq so Josué, nache 'eetec nataqa'en so laỹepi huaqta'a't nỹecpi da iloquiaxan qataq ỹalauat so lta'alpi, qataq imauec da ilaxachigui, nache ipacchigui da lamaxasoxonaxac co'ollaxa so Moisés, maye lamaxashec Ñim Nataxala'. 13Qalaxaye saishet co'ollaxa da ỹavigaxat se'eso huaqta'a't nỹecpi maye nalec aso lcomaraxalatepi, nachaqsota so huaqta'a't nỹecpi ye Jazor. 14Qalaxaye som Israel le'ecpi irolec so ỹeelonec da ỹalauat 'enauac som netaigui se'eso huaqta'a't nỹecpi, nache ỹataqta qaica ca no'onaxatañi da nca'altauec naqa'en, qataq ỹacona 'enauac so nogoxoshetpi maye huetaigui co'ollaxa somayepi, qataq som na'atetpi somayepi.
Da 'eetec da loxonaxanaxac so Josué
15Ñim Nataxala' ỹanem co'ollaxa de'era lamaxasoxonaxac so Moisés, qaq so Moisés nache ỹamaxalec co'ollaxa so Josué, qaq somaye nache ỹataqta ipacchigui da ỹo'ot 'enauac damaye. 16Huaña nache so Josué ỹacona 'enauac se'eso 'alhuapi, maye huaña aye qasoxonaxapi 'enauac yem Néguev, qataq 'enauac ye 'alhua Gosén, qataq yem nalochiguiñi 'alhua, qataq ye ca'amapega't ye Jordán, qataq 'enauac ayem qasoxonaxapi, qataq yem nalochiguiñi 'alhuapi ye Israel. 17Nache chegoqchiguiña añi qasoxonaxa Halac, «Qaica ca Ñaxaalec» maye pa'aỹa'ague da la'añaxa, saqaỹapeque añi lỹa qasoxonaxa ye Seír, nache ivitta'a ye Baal Gad, maye pa'aỹa'ague da sheu', ye lca'amaxa ye Líbano, na pa'aguiñi añi qasoxonaxa Hermón. Nache so Josué loxonec qataq ỹalauat 'enauac so nta'alpi maye netaña yi'iye 'alhuapi. 18Nache so Josué ỹataqta qaỹoqtec co'ollaxa so l-loquiaxac da deloctague' somayepi. 19Qalaxaye nachaqsota co'ollaxa so heveopi maye netaña ye Gabaón da naỹamaxate' so Israel le'ecpi. Qaq se'eso laỹe huaqta'a't nỹecpi imauec da deuotaxanec. 20Cha'aye Ñim Nataxala' ỹo'otec da ỹataqta qaramchigui da lquiyaqteỹaxac so mpa'aguenaxauapi so Israel le'ecpi da yaqto' somayepi dataỹa'aguet so Israel le'ecpi, yaqto' so Israel le'ecpi ỹataqta ilaxachigui 'enauac somayepi qataq saishet da ichoxoreetac da ỹo'orauec, qaq nache ipacchigui da lamaxasoxonaxac Ñim Nataxala' maye ỹamaxalec co'ollaxa so Moisés.
21Nataqa'en se'eso na'a'q so Josué deuotaxanec qataq ỹataqta nlaxatchiguiñi 'enauac so huaqta'a't nỹecpi maye lma' so anaquiitapi maye nalec aye qasoxonaxapi ye Hebrón, Debir, Anab, qataq 'enauac aye qasoxonaxapi maye ỹotta'a't nam naña ye Judá qataq ye Israel. 22Qaq ỹoqo'oye ỹataqta qaica ca no'onalec da netalec yem na'alhuapi so Israel le'ecpi som chegoxoguetpi so shiỹaxaua logoraic le'enaxat Anac. Qaq nacheyeta ye Gaza, qataq ye Gat, qataq ye Asdod da huo'o na no'onalec somayepi.
23Qaq 'era da 'eetec co'ollaxa so Josué da deuotaxanec 'enauac se'eso 'alhuapi, qaq nache ipacchigui 'enauac na la'aqtacpi Ñim Nataxala' maye ỹamaxalec co'ollaxa so Moisés. Huaña nache somaye ỹami' ñi 'oonolec na maiche nhuo' Israel le'ecpi, da yaqto' lalamaxat lma' se'eso 'alhua. Qaq co'ollaq ime nache huo'o da nlagaxayec yi'iye 'alhua.
