Josué 13

₁Qaq co'ollaq mashe ỹa'axaiquiolec so Josué, nache Ñim Nataxala' 'enapega somaye, 'eeta': «'Am, mashe 'am ỹa'axaiquiolec, qalaxaye ñaq qalota na no'onañi 'alhuapi maye ñaq saxanaxa da qaiuotaxanec. ₂Ñaq no'onañi 'enauac yem na'alhua ye filisteopi, qataq ye guesureopi, ₃chegoqchiguiña so la'auaxac Sijor, maye pa'aỹa'ague da yo'oxoñi ye Egipto, nache ivitta'a so loga't ye Ecrón, maye pa'aỹa'ague da sheu', qaq yemaye qoỹeetegacnaxa na'alhua nam Canaán le'ecpi. Qaq yemaye nache netraña yeua cinco nataxala'ate Filistea lashe', qaq yeemaye nache lataxala'ate na lma' ye Gaza, Asdod, Ascalón, Gat qataq ye Ecrón. Nataqa'en ñaq no'onañi ye na'alhua ye aveopi, ₄yem pa'aỹa'ague da la'añaxa, qataq 'enauac yem na'alhua na Canaán le'ecpi, maye chegoqchiguiña ye huaqta'a't nỹecpi maye lalamaxat ye sidoniopi, nache ivitta'a ye Afec, maye loga't ye na'alhua ye amorreopi. ₅Nataqa'en ñaq no'onañi ye na'alhua ye guiblitapi, qataq 'enauac ye Líbano, yem pa'aỹa'ague da nala' lliguisheguem chegoqchiguiña ye Baal Gad, maye naña na pa'aguiñi loigue añi qasoxonaxa Hermón, nache ivitta'a so ñegueuo ye Jamat. ₆Qaq ỹauaachigui ñaqa'en qome na Israel le'ecpi da so'orauec 'enauac ye sidoniopi, qataq 'enauac yem nalec aye qasoxonaxapi, nache chegoqchiguiña ye Líbano, nache ivitta'a ye Misrefot Mayin. Qalaxaye 'am qouapegue' qome da 'aỹa'anem na Israel le'ecpi ne'ena 'alhua da yaqto' ỹauo'o lalamaxat, nache ipacchigui qome da 'am samaxalec. ₇Qaq nache 'aỹa'anem qome na 'alhua ne'enaua nueve maye maiche nalamaxat nhuo' le'ecpi, qataq nam laỹe maye chegoxoguet so Manasés.»

₈Qaq som nalamaxat nhuo' le'ecpi maye chegoxoguetpi so Rubén qataq so Gad, qataq so laỹe som chegoxoguetpi so Manasés, somayepi mashe huo'o so na'alhua cha'aye so Moisés mashe ỹanem co'ollaxa somayepi, maye pa'aỹa'ague da nala' lliguisheguem so Jordán. ₉Qaq se'eso qoỹanem 'alhua somayepi, nache chegoqchiguiña ye Aroer, maye naña so loigue so tala Arnón, qataq so huaqta'a't nỹecpi maye naña yem laiñi so ca'amapega't, qataq 'enauac som nalochiguiñi 'alhua ye Medeba, nache ivitta'a ye Dibón. ₁₀Nataqa'en ỹalectauo 'enauac som huaqta'a't nỹecpi maye ỹotta'a't naua nañalo maye ilotague' co'ollaxa so nta'a Sijón, som lta'a so amorreopi maye naña co'ollaxa ye Jesbón, nache ivitta'a so loga't ye na'alhua so amoniitapi. ₁₁Nataqa'en taalec da qoỹanem ye Galaad, qataq ye na'alhua so guesureopi qataq so maacateopi, qataq añi qasoxonaxa Hermón qataq 'enauac ye 'alhua ye Basán, nache ivitta'a ye Salca. ₁₂Nataqa'en yem 'alhuapi maye ilotague' co'ollaxa so Og, som nta'a ye Basán, maye ilotague' nataqa'en ye Astarot qataq ye Edrey. Qaq somaye nache pa'atec som chegoxoguetpi som refaiitapi, maye so Moisés loxonec co'ollaxa qataq ỹo'orauec. ₁₃Qaq som Gesur le'ecpi qataq so lma' ye Macá, saishet co'ollaxa da qaỹo'orauec, nacherata da nache ỹalectaigui qanqa'en so Israel le'ecpi, choche ivitta'a nagui.

₁₄Qaq so Moisés qaica co'ollaxa ca ỹanem 'alhua so maiche nhuo' le'ecpi maye chegoxoguet so Leví, cha'aye somayepi taỹot so laỹe aso nachetaqtaxanaqtepi maye qoỹanot Ñim Nataxala' maye Natamnaxala' so Israel le'ecpi. Cha'aye maiche la'aqtac co'ollaxa Ñimaye.

₁₅Qaq so Moisés ỹanem co'ollaxa so na'alhua so maiche nhuo' le'ecpi maye chegoxoguetpi so Rubén, nache naloqchiichigui ye lcata so maiche lalamaxat llalaqpi somayepi. ₁₆Nache se'eso lalamaxat na'alhua somayepi, nache chegoqchiguiña ye Aroer maye naña so loigue so tala Arnón, qataq so huaqta'a't nỹecpi maye naña na laiñi so ca'amapega't, qataq 'enauac so nalochiguiñi 'alhua ye Medeba, ₁₇qataq ivira'a ye Jesbón qataq 'enauac so huaqta'a't nỹecpi maye naña ye nalochiguiñi 'alhua ye Dibón, Bamot Baal, qataq ye Bet Baal Megón, ₁₈Yahás, Cademot, Mefagat, ₁₉qataq ye Quiriatayin, Sibemá, Séret Sajar, maye nalec añi lcomaraxalate yem ca'amapega't, ₂₀nataqa'en ye Bet Pegor, Bet Yesimot qataq naua nashecrañi laỹel añi qasoxonaxa Pisga, ₂₁nache 'enauac som huaqta'a't nỹecpi maye huaigui so nalochiguiñi 'alhua, qataq 'enauac so lma'pi maye ilotague' co'ollaxa so Sijón, som lta'a so Amorreo maye netaña ye Jesbón. So Moisés loxonec co'ollaxa se'eso Sijón, qataq so nataxala' ye Madián. Qaq 'enaua naua le'enaqa'ate soomaye: Eví, Requén, Sur, Hur qataq so Reba. ₂₂Nataqa'en so Israel le'ecpi ỹalauat co'ollaxa so shiỹaxaua maye ilaviigui ca lỹa maye le'enaxat da Balaam, som llalec so Beor, qataq so qalota laỹepi. ₂₃Qaq se'eso na'alhuapi so maiche nhuo' le'ecpi maye chegoxoguetpi so Rubén, nache qanaloqchiichigui ye lcata so maiche lalamaxat llalaqpi somayepi, qataq 'enauac so huaqta'a't nỹecpi nache lỹaueegue' som lauoreuapi nma'piolec. Qaq 'eso so lalamaxat 'alhuapi somayepi, nache ivira'a so tala Jordán.

₂₄So Moisés nataqa'en ỹanem so na'alhua so maiche nhuo' le'ecpi maye chegoxoguetpi so Gad, nache naloqchiichigui ye lcata so maiche lalamaxat llalaqpi somayepi. ₂₅Nache somayepi taalec ye Jazer, qataq 'enauac so huaqta'a't nỹecpi maye ỹotta'a't naua nañalo ye Galaad, qataq so laỹe som na'alhua co'ollaxa so amoniitapi, nache ivitta'a so huaqta'a't nỹecpi ye Aroer, maye datatta ye Rabá, ₂₆qataq so 'alhuapi maye vichiguinguilo yeua Jesbón, qataq ye Ramat Mispá, qataq ye Betonín, qataq soua vichiguinguilo yeua Majanayin qataq ye loga't ye Debir. ₂₇Nataqa'en taỹot somayepi ye ca'amapega't ye Bet Aram, Bet Nimrá, Sucot qataq ye Safón, maye nachesouate' co'ollaxa da no'oirañi da lalamaqa'ate so Sijón maye nta'a ye Jesbón. Qaq se'eso na'alhua somayepi chegoqchiguiña ye pa'aỹa'ague da nala' lliguisheguem so tala Jordán, nache ivitta'a so pa'aỹa'ague da la'añaxa añi Lapel Quinéret. ₂₈Qaq 'eso som huaqta'a't nỹecpi maye ỹotta'a't naua nañalo, qataq som lauoreuapi nỹecpiolec maye taalec da taỹot so maiche nhuo' le'ecpi maye chegoxoguet so Gad, nache qanaloqchiichigui ye lcata so maiche lalamaxat llalaqpi somayepi.

₂₉So Moisés nataqa'en ỹanem so na'alhua som laỹe so maiche nhuo' le'ecpi maye chegoxoguetpi so Manasés, qataq naloqchiichigui ye lcata so maiche lalamaxat llalaqpi somayepi. ₃₀Qaq somayepi taalec da qoỹanem 'enauac ye 'alhua maye lalamaxat co'ollaxa so Og, maye nta'a ye Basán, nache 'enauac ye 'alhua Basán nache ivira'a ye Majanayin. Qataq ỹalegueuo so sesenta huaqta'a't nỹecpi maye ỹotta'a't naua nañalo ye Yaír. ₃₁Qataq ye laỹe ye 'alhua Galaad, qataq so huaqta'a't nỹecpi maye ỹotta'a't naua nañalo ye Astarot, qataq ye Edrey. Qaq 'enauac se'eso 'alhuapi taỹot som laỹe so maiche nhuo' le'ecpi maye chegoxoguetpi so Maquir, som llalec so Manasés, nache qanaloqchiichigui ye lcata so lalamaxat llalaqpi somayepi.

₃₂Qaq 'era da 'eetec co'ollaxa so Moisés da ỹanec da yaqto' nalamaxat yi'iye nalochiguiñi 'alhua ye Moab, maye pa'aỹa'ague da nala' lliguisheguem so tala Jordán, maye nalotta ye Jericó. ₃₃Qalaxaye so Moisés, qaica ca ỹanem 'alhua so maiche nalamaxat nhuo' le'ecpi maye chegoxoguetpi so Leví. Nacherata da 'enapega somayepi, 'eeta': «Ñim Nataxala' maye Natamnaxala' na Israel le'ecpi, Ñimaye nacheñi Ñim qaramaxache.»