So Josué ỹanec so no'onañi se'eso 'alhuapi
1Qaq so Israel le'ecpi, co'ollaq mashe 'enauac da deuotaxanec se'eso 'alhuapi, nache 'enauac somayepi da ỹo'ot so laponaxac lta'araic huaña ye huaqta'a't nỹecpi ye Silo, qataq nache huaña yemaye da ỹa'ayiñi so npe'l maye huañacnaxa da qanauane' Ñim Nataxala'. 2Qaq ñaq huo'oi co'ollaxa soua siete so maiche nhuo' le'ecpi maye chegoxoguetpi so Israel da ñaq saxanaxa da huo'o ca qoỹanem lalamaxat na'alhua.
3Huaña, nache so Josué 'enapego' se'eso Israel le'ecpi, 'eeta': «¿Negue't ca qauacheeta'a da yaqto' qauacoñiỹa da qoñiỹalec na 'alhuapi maye qami' ỹanema Ñim Nataxala' maye Natamnaxala' som hua'au qarta'ailpi? 4Qalca'aiua'alo qome caua tres shiỹaxau', qauachegoxochiỹaiguilo ñi 'oonolec naua siete na maiche nalamaxat nhuo' le'ecpi, da yaqto' sama'q da coleerelec 'enauac ne'ena 'alhua, qaq da ime, nache aỹem nareua'a da ndoreuo qome ca la'aqtaxanaxa'c da yaqto' saỹateeta ca lataxac da qaicolaxatapigui ne'ena 'alhua. 5Qataq que'ecaua shiỹaxau' siete qome caua icolaxara'ache 'alhua. Qaq nam chegoxoguetpi so Judá, nache qoỹanem na pa'aỹa'ague da la'añaxa, qaq na chegoxoguetpi so José, nache qoỹanem na pa'aỹa'ague da sheu'. 6Nache qom mashe ime da icolaxatapiguilo caua siete que'eca 'alhuapi nache aỹem ndoreua'a que'eca la'aqtaxanaxa'c, nache aỹem so'ot qome da qanallichigui que'eca 'alhuapi, ỹauaachigui ñaqa'en Ñim Nataxala' maye Qanatamnaxala'. 7Qaq na leviitapi qalaq qaica qome ca taỹot ne'ena 'alhuapi, cha'aye namayepi qoỹanagui da ntaxaỹaxanaxanecpi da qaitaxaỹapegue' Ñim Nataxala'. Qaq na maiche nhuo' le'ecpi maye chegoxoguetpi so Gad qataq so Rubén, qataq na laỹe nam maiche nhuo' le'ecpi maye chegoxoguetpi so Manasés, namayepi mashe lalamaxat qanqa'en ye 'alhuapi maye pa'aỹa'ague da yo'oxoñi so tala Jordán, maye ỹanem co'ollaxa so Moisés maye lamaxashec Ñim Nataxala'.»
8Nache se'esoua nca'agui'she maye qaỹama'q da yaqto' imete'n se'eso 'alhuapi, co'ollaq mashe naỹamaxa't da yaqto' je'c, nache so Josué 'enapegalo soomaye, 'eeta': «Qanqo'oñiỹa 'enauac qome ne'ena 'alhuapi, nache qaua'añi naua loga'te, qaq qom ime, nache qañi'iguelqai da yaqto' so'ot da qanallichigui, huaña na Silo, ỹauaachigui ñaqa'en Ñim Nataxala'.»
9Nache soomaye je'c, coleetrapeguelec 'enauac se'eso 'alhuapi, nache icolaxachigui so huaqta'a't nỹecpi, nache ỹauota'a siete soua iỹoracache, qataq ỹataqta ỹiyiñi 'enauac ye lcachiguiñi se'eso 'alhuapi. Qaq co'ollaq ime', nache ñe'eguelaxalo so nanataqa' ye Silo, maye netaña so Josué. 10Nache so Josué, icolaxatapigui se'eso 'alhuapi da yaqto' ỹanoigui so Israel le'ecpi huaña ye Silo, qataq ỹauaachigui naqa'en Ñim Nataxala' da qanallichigui somaye.
So na'alhuapi so chegoxoguetpi so Benjamín
11Qaq co'ollaq mashe ime da qanallichigui se'eso 'alhuapi, nache so llalaqpi so maiche nhuo' le'ecpi maye chegoxoguetpi so Benjamín, taỹot so 'alhuapi maye huaigui ye na'alhuapi som chegoxoguetpi so Judá qataq so José.
12Qaq so loga't se'eso 'alhua nache chegoqchiguiña ye pa'aỹa'ague da sheu' ye tala Jordán, nache ivitta'a ye pa'aỹa'ague da sheu' ye Jericó, qataq jec, nache ivitta'a aye qasoxonaxapi maye pa'aỹa'ague da avit, nache nateuga ye toolec 'alhua ye Bet Avén. 13Qaq queta, ivitta'a ye Luz maye da lỹa le'enaxat Betel, yem pa'aỹa'ague da la'añaxa, nache naỹaña ye Atarot Adar, maye naña añi qasoxonaxa maye pa'aỹa'ague da la'añaxa ye pa'aguiñi ye Bet Jorón.
14Huaña nache se'eso loga't taỹauga aso auaxai Mediterráneo yem loigue maye pa'aỹa'ague da la'añaxa añi qasoxonaxa maye nalotta ye Bet Jorón, nache ivitta'a ye Quiriat Baal, maye nataqa'en le'enaxat Quiriat Yearin, maye lalamaxat so chegoxoguetpi so Judá. Qaq 'eso so loga't maye pa'aỹa'ague da avit.
15Qaq so loga't maye pa'aỹa'ague da la'añaxa nache taỹauga ye pa'auec ye Quiriat Yearin, nache taỹa'ague da pa'aỹa'ague da avit, nache ivitta'a yem huaña na npaxaatasheguem 'etaxat ye Neftoa, 16nache naỹaña ye ỹataqta pa'aguiñi añi qasoxonaxa maye nalotta so ca'amapega't ye Ben Jinón, yem pa'aỹa'ague da sheu' ye ca'amapega't ye Refayin. Huaña nache naỹaña ye ca'amapega't ye Hinom, nache nlectot so ñiguisheguem maye pa'aỹa'ague da la'añaxa ye Jebús, nache queta, ivitta'a ye npaxaatasheguem 'etaxat ye Roguel. 17Huaña, nache se'eso loga't qaltaq connegue da pa'aỹa'ague da sheu' ye Ensemes, nache huaña yemaye da qaltaq jec, nache ivitta'a ye Guelilot, maye nalotta ye ñiguisheguem ye Adumín, nache qaltaq naỹaña añi coma' maye qaỹamata'ac Boán Ben Rubén, 18huaña nache qaltaq taigue da pa'aỹa'ague da sheu' ye ñiguisheguem maye nalotta so ca'amapega't ye Jordán, ime nache nvittaña ye Jordán. 19Qataq nache queta, tateuga da pa'aỹa'ague da sheu' ye Bet Joglá, nache loga't ye iuaxana't maye pa'aỹa'ague da sheu' aso Auaxai Leuaxai, yem taỹauga so tala Jordán. Qaq 'eso som loga't so 'alhuapi maye pa'aỹa'ague da la'añaxa.
20Nache se'eso tala Jordán nacheso so loga't so 'alhuapi maye pa'aỹa'ague da yo'oxoñi.
Qaq 'ena nam loga'tpi so 'alhuapi maye qoỹanem da lalamaxat co'ollaxa so llalaqpi na maiche nhuo' le'ecpi maye chegoxoguetpi so Benjamín.
21Qaq 'ena nam huaqta'a't nỹecpi maye taỹot da lalamaxat qanqa'en so llalaqpi so maiche nhuo' le'ecpi maye chegoxoguetpi so Benjamín: Jericó, Bet Joglá, Émec Quesís, 22Bet Arabá, Semarayin, Betel, 23Avim, Pará, Ofrá, 24Quefar Hamoní, Ofní qataq ye Geba. Nache da ima'a't se'eso huaqta'a't nỹecpi maye ỹotta'a't naua nañalo, nache ivi' doce, qataq lỹaueegue' so lauoreuapi nma'piolec. 25Nataqa'en ye Gabaón, Ramá, Berot, 26Mispá, Quefirá, Mosá, 27Requén, Irpel, Tarala, 28Selá, Elef, Jebús, maye da lỹa le'enaxat Jerusalén, Gabaa qataq ye Quiriat. Nache da ima'a't se'eso huaqta'a't nỹecpi maye ỹotta'a't naua nañalo, nache ivi' catorce, qataq lỹaueegue' so lauoreuapi nma'piolec. Qaq 'eso som 'alhuapi maye taỹot co'ollaxa da lalamaxat qanqa'en so llalaqpi so maiche nhuo' le'ecpi maye chegoxoguetpi so Benjamín.
