1Qaq co'ollaq ime de'era, nache Ñim Nataxala' 'enapega so Josué, 'eeta': 2«Qonapega qome na Israel le'ecpi, da lca'aique ca huaqta'a't nỹecpi maye ỹotta'a't naua nañalo da yaqto' ñe'eguenaxaquipi, yaqto' qaipacchigui da ỹamaxasoxonaxac maye sanem co'ollaxa so Moisés. 3Cha'aye da huo'o ca ỹalauat ca lỹa shiỹaxaua da choche ilamaxata'a, qataq saishet da nache 'eetai' da ỹasauaxattac, nache ishet da datauec da ỹe'eguena ca 'oonolec que'eca huaqta'a't nỹecpi, da yaqto' dataueeguesop cam lauo' le'ec que'eca leuaxaic maye ỹauotaique ca lvi'. 4Qaq que'eca shiỹaxaua qom huo'otaq ỹe'eguena ca 'oonolec que'eca huaqta'a't nỹecpi maye ñe'eguenaxaquipi, nache camaye da ivireua'a ca lasom ca lpaqtaxat que'eca huaqta'a't nỹecpi, nache ỹa'axat ca huo'omshe naneltaxaatac, da'aqtaxaatem ca nqueroxonecpi maye nataxala'pi que'eca huaqta'a't nỹecpi. Huaña, nache que'eca nqueroxonecpi nasheeteguet qome camaye, nache inoxonaqcheteuo, nache ỹanem ca lanataqa' da yaqto' naña camaye. 5Qaq ca lauo' le'ec que'eca nalaatac, qom icanapec camaye da ipalaique lvi', nache da ivitta'a que'eca huaqta'a't nỹecpi maye netaña camaye, nache ca nqueroxonecpi saishet qome da ỹanec que'eca 'eltaxaic, cha'aye camaye choche ilamaxata'a da ỹalauat ca lỹa, qaq saishet da nache 'eetai' da ỹasauaxattac souaxat da nquiỹatapega. 6Qalaxaye que'eca 'eltaxaic, nache netaña qome que'eca huaqta'a't nỹecpi, ivitta'a qom nachaateua'a ca laponaxac 'enauac na nhuo' le'ecpi maye huaña da qanmit ca lasouaxashet camaye, qataq choche ivitta'a da ileu so lataxala' ca ntaxaỹaxanaxanecpi. Huaña nache ishet da qaltaq ỹe'eguelaxa ca lma' maye chegoqchiguiña co'ollaq datauec, cam huaqta'a't nỹecpi maye naña ca lma'.»
7Huaña co'ollaxa, nache so Israel le'ecpi lca'aua'a da yaqto' ñe'eguenaxaquipi so huaqta'a't nỹecpi ye: Cedes, Galilea, qataq ye huaña ana qasoxonaxapi ye Neftalí, qataq ye Siquén, maye huaña na qasoxonaxapi maye lalamaqte so Efraín, qataq ye Quiriat Arbá, maye nataqa'en le'enaxat da Hebrón, maye huaigui aye qasoxonaxapi ye Judá. 8Qaq da pa'aỹa'atague da le'ego so Jordán, yem nalochiguiñi ye toolec 'alhua maye pa'aỹa'ague da nala' lliguisheguem ye Jericó, nache lca'aua'a ye Beser, maye lalamaxat so chegoxoguetpi so Rubén, qaq yem huaigui ye 'alhua Galaad nache qalca'aua'a ye Ramot, maye lalamaxat som chegoxoguetpi so Gad, qaq yem huaigui ye Basán nache qalca'aua'a ye Golán, maye lalamaxat som chegoxoguetpi so Manasés. 9Qaq 'eso som huaqta'a't nỹecpi maye qalca'aua'a da lle'eguenaxaquipi qanqa'en 'enauac so Israel le'ecpi, qataq so chegaqauecpi maye netaiguipi somayepi. Qaq nache camachaqca shiỹaxaua da ilamaxata'a da ỹalauat ca lỹa, nache ishet da taua'a somayepi da naneltaxan, yaqto' cam lauo' le'ec que'eca leuaxaic, saishet da hua'aulec da ỹalauat camaye souaxat da ipaltaique ca lvi', qom ñaq saxanaxa da qaỹauegueua'a ca nhuo' le'ecpi da yaqto' qanmit camaye.
