Josué 4

₁Qaq so Israel le'ecpi co'ollaq mashe 'enauac da ỹa'axasoxoolec so tala Jordán, nache Ñim Nataxala' 'enapega so Josué, 'eeta': ₂«'Alca'aua'alo qome caua doce shiỹaxau', chegaqaiguilo 'anqa'en ñi 'oonolec na maiche nhuo' le'ecpi, ₃nache 'auamaxaleguete da nqattra caua doce coma'ye, ỹachegoxotchiyiña ye laiñi ye Jordán, yem nachattraña daua ntaxaỹaxanaxanaqa, nache ỹache' da yaqto' ỹacheraña qome ca huaña da qanmachiiuec ne'ena pe.»

₄Huaña nache so Josué iỹaxanalo soua doce shiỹaxau' maye lca'agui'she, ₅nache 'enapegalo, 'eeta': «Qanqo'oñiỹaxaama ye laiñi ye tala Jordán, yem hueta'a añi arca maye laỹe' da naỹamaxataxac Ñim Nataxala' maye Qanatamnaxala'ai, qaq ñi 'oonolec da qoñiita ỹacoosop qome ca 'oonolec coma' nache ỹachalec na lallac da nallaguishen, qaq que'ecaua doce coma'ye nache ipacchigui ye lcata na maiche nalamaxat nhuo' le'ecpi maye chegoxogueta naua llalqa so Israel. ₆Qaq que'ecaua coma'ye la'anaxat qome da qoñiita, cha'aye que'eca na'a'q da ivita da qami' ina't ca qaỹa'alquipi, da 'eeta': ‹¿Chaq negue't ca naigui ne'enaua coma'?›, ₇nache qami' qoñiỹapec qome da qara'aqtaqui: ‹Qomye co'ollaq ỹa'axasoxoolec qanqa'en so tala Jordán aso arca maye laỹe' da naỹamaxataxac Ñim Nataxala', nache na 'etaxat so tala colaxagui. Qaq ne'enaua coma'ye naamaye naigui da yaqto' na Israel le'ecpi nache 'eetai' da lhuennataxat de'era qaỹo'otec co'ollaxa maye huaña ne'ena.›»

₈Nache soomaye ỹo'o't 'enauac da lamaxasoxonaxac so Josué. Nache ñi 'oonolec soua chegaqaiguilo som maiche nhuo' Israel le'ecpi ỹacona ñi 'oonolec se'esoua doce coma'ye, ỹachegoxotangui ye laiñi so tala Jordán, da yaqto' iro'ota so huaña da nmatec somayepi, nache ipacchigui da la'aqtac Ñim Nataxala' co'ollaq 'enapega so Josué. ₉Qaq nataqa'en so Josué nauaxaỹaxaasheguem co'ollaxa soua doce lỹa't coma'ye, vichiguingui naqa'en ye laiñi so tala, yem nachattraña co'ollaxa soua ntaxaỹaxanaxanaqa maye ỹachetrac aso arca maye laỹe' da aỹamaxataxac. Qaq se'esoua coma'ye ñaq netraña nagui yemaye.

₁₀Qaq soua ntaxaỹaxanaxanaqa maye ỹachetrac aso laỹe' da aỹamaxataxac, qalaq nache nachattrañi, huetraña ye laiñi so tala Jordán, ivitta'a da so Israel le'ecpi ỹo'ot 'enauac na damaxasoxoolecpi Ñim Nataxala' maye ỹamaxalec co'ollaxa so Josué.

Qaq 'enauac nam 'enapecpi co'ollaxa so Moisés, ỹo'ot so Josué. Qaq huaña, nache so Israel le'ecpi ỹataqta iỹalapigui' da taitague da le'ego so tala. ₁₁Qaq co'ollaq mashe 'enauac da taitague da le'ego somayepi, nache soua ntaxaỹaxanaxanaqa maye ỹachetrac aso arca maye laỹe' da naỹamaxataxac Ñim Nataxala', nataqa'en taitrague da le'ego. Ime, nache hua'autra'ague da taỹa'ague so Israel le'ecpi. ₁₂Nataqa'en taitague da le'ego so tala so alleppi maye maiche nalamaxat nhuo' le'ecpi maye chegoxoguetpi so Rubén, qataq so Gad, qataq so laỹe som maiche nhuo' le'ecpi maye chegoxoguetpi so Manasés. Qaq somayepi ỹataqta na'achigui na lo'ogoxonaxatpi. Ime, nache hua'auta'ague da taỹa'ague so laỹepi Israel le'ecpi, nache ipacchigui da lamaxasoxonaxac co'ollaxa so Moisés. ₁₃Qaq huac da ivi' cuarenta mil so alleppi maye ỹataqta na'atchiguiñi na lo'ogoxonaxatpi, qataq ỹataqta lhuotta da nalat somayepi, qataq ỹauaachigui Ñim Nataxala' da inoicchiguiñi somayepi da nqo'ona so nalochiguiñi 'alhua ye Jericó. ₁₄Qaq se'eso na'a'q nache Ñim Nataxala' ỹo'ot da so Israel le'ecpi ỹa'aalac, qataq huo'o naq 'enec naqa'en so Josué, ỹe'enaxattem da 'eetec co'ollaxa da hueta'aguet so Moisés, 'enauaque naua na'axa'tesa'ache da nachaalataxac.

₁₅Huaña, nache Ñim Nataxala' 'enapega so Josué, 'eeta': ₁₆«Qonapegalo qome daua ntaxaỹaxanaxanaqa maye ỹachetrac añi arca maye laỹe' da aỹamaxataxac, da quera'ai ye laiñi ye tala Jordán.»

₁₇Nache so Josué 'enapegalo soomaye da nnoxootra, ₁₈nache soua ntaxaỹaxanaxanaqa maye ỹachetrac aso arca maye laỹe' da naỹamaxataxac Ñim Nataxala' co'ollaq quera'aisalo ye laiñi so Jordán, nache co'ollaq mashe peleguete so daqaqtelec 'alhua, nache se'eso 'etaxat so tala qaltaq ipactegue da jec, nache ipaxaaleguete naua loiguiye so tala, qataq nache ipactegue da maiche lataxac co'ollaxa.

₁₉Nache so Israel le'ecpi chegoqchiguiña co'ollaxa ye tala Jordán da jec, huetoiguilo se'esoua diez na'axa'te so la'auaxanec ca'agoxoic. Ime, qaq nmataqa' ye Gilgal, ye pa'aỹa'ague da yo'oxoñi ye Jericó. ₂₀Qaq nache huaña yemaye da so Josué, ỹacheraña soua doce coma'ye maye ỹachegoxotrangui ye laiñi so Jordán. ₂₁Ime, qaq 'enapega so Israel le'ecpi, 'eeta': «Que'eca na'a'q, qom ivita da qami' ina't ca qaỹa'alquipi da, 'eeta': ‹¿Chaq negue't ca naigui ne'enaua coma'ye?›, ₂₂nache qami' qaua'aqtaxañim qome, qoñiita: ‹Na Israel le'ecpi co'ollaq naitague na le'ego so tala Jordán, qalaq daqaqattague so llegueta. ₂₃Cha'aye Ñim Nataxala' maye Qanatamnaxala'ai, 'imñi naqa'en so 'etaxat aso tala Jordán, da yaqto' ñanaxatague na le'ego qataq deqaqtegue naqa'en so qoyegueta, ỹe'enaxatchigui co'ollaq 'imñi naqa'en na 'etaxat so lche aso Auaxai Togaxarai da yaqto' qomi' ñanaxatague na le'ego asomaye. ₂₄Qaq ỹoqo'oye 'enauac na shiỹaxauapi ana 'alhua, ỹaỹateeta da Ñim Nataxala' ỹataqta 'añaxaic, qaq ỹoqo'oye qami' ỹataqta nache 'eetai' qome da huo'o naq 'enec qanqa'eñi Ñim Nataxala' maye Qanatamnaxala'ai.›»