Josué 5

₁Qaq 'enauac co'ollaxa so lta'alpi so Amorreopi maye neta'atague da le'ego da pa'aỹa'ague da avit so tala Jordán, qataq so lta'alpi so Canaán le'ecpi maye netaña ye saqaỹapeque aso Auaxai Mediterráneo, co'ollaq ỹaỹaten somayepi da Ñim Nataxala' 'imñi naqa'en so 'etaxat so tala Jordán da yaqto' so Israel le'ecpi ỹa'axasoxoolec da taitague da le'ego, nache so nta'alpi ỹataqta sa ntoonaxanaxan da lli'iỹaxa souaxat da qaica ca ỹañoxot da dataỹa'aguet so Israel le'ecpi.

₂Huaña, co'ollaxa nache Ñim Nataxala' 'enapega so Josué, 'eeta': «'Auo'ot qome ca 'arpelegaxanaxat coma'pi, qataq ỹataqta ỹaxaraicpi 'anqa'en, nache 'auo'ot ca na'anaxat na lo'oc na Israel le'ecpi.»

₃Nache so Josué ỹo'ot so lpelegaxanaxatpi, nache ỹauo'o so na'anaxat na lo'oc so ỹalleppi Israel le'ecpi, huaña aso lcomaraxalate maye qoỹanagui da le'enaxa't Aralot. ₄Qaq de'era huo'omshe qaỹo'ot cha'aye 'enauac se'eso ỹalleppi Israel le'ecpi, qataq so alleppi maye alaataxaicpi maye mashe qaỹo'ot co'ollaxa nam la'anaxashet na lo'oc co'ollaq qaỹachegoqteua'a ye Egipto, somayepi mashe 'enauac da ileu huangui so nqa'aic ye toolec 'alhua. ₅Qaq nache 'enauac somayepi da mashe huo'o co'ollaxa so la'anaxat na lo'oc, qalaxaye som dalaxaicpi maye ñiguiñi co'ollaq huaña ye toolec 'alhua, huo'otaq som huangui so nqa'aic nache ñaq saxanaxa da qaỹo'ot ca la'anaxat na lo'oc. ₆Qaq cha'aye so Israel le'ecpi coleetapeguelec co'ollaxa ye toolec 'alhua soua cuarenta vi'iye, nache ivitta'a da ileu 'enauac so alleppi maye nalaataxaicpi maye chegoqtaua'a co'ollaxa ye Egipto, souaxat da sa ỹalaxaguet Ñim Nataxala'. Ỹoqo'oye Ñim Nataxala' ỹan co'ollaxa so la'aqtac da yaqto' somayepi saishet da ivira'a da imeten yi'iye 'alhua maye ỹachaxanapeguem co'ollaxa so hua'au lta'alpi, yem 'alhua maye huaña da sa qoue na nallec. ₇Qaq ỹoqo'oye so Josué ỹo'ot so la'anaxat na lo'oc so llalaqpi se'eso shiỹaxauapi, som dalaxaicpi maye ñaq saxanaxa da qaỹo'ot ca la'anaxat na lo'oc souaxat da ñaq queto'ot da lqueuoxoc. ₈Qaq co'ollaq 'enauac somayepi da mashe qaỹo'ot so la'anaxat na lo'oc, nache hua'a so lpe'lpi da nmatec ivitta'a da no'oitapi. ₉Huaña nache Ñim Nataxala' 'enapego' so Josué, 'eeta': «De'era la'anaxat na lo'oc ne'ena shiỹaxauapi, nache sachegoxotchigui da ñeqateeguesop da ncoxo maye qami' huetaleguete souaxat da 'enauac qami' l-latacpi co'ollaxa ye Egipto le'ecpi.»

Qaq ỹoqo'oye yi'iye 'alhua, nache qoỹanagui da le'enaxat Gilgal, nache ivitta'a nagui.

₁₀So Israel le'ecpi nmataqa' ye Gilgal, qaq huetoigui so avit se'eso na'a'q catorce se'eso ca'agoxoic da qaỹo'ot so Lapascua, huaña ye nalochiguiñi 'alhua ye Jericó. ₁₁Qaq nacheso se'eso na'a'q da huetoigui da qanallec ana nauole 'ayiiña maye qaica ca lalegue ỹasheeraxachigui, qataq na trigo maye qaitoota, qalaxaye so lỹa na'a'q nache huetoigui da qanallec na nañiguishec ala maye ñaxattalec yi'iye 'alhua. ₁₂Qataq nache vichigui co'ollaxa da vi'iiguet aso maná maye chegoqo'ot na piguem. Huaña nache se'eso vi'i, so Israel le'ecpi chegoqchiguiña da chectac na ala na nañiguishec maye nañaxattalec yi'iye 'alhua Canaán.

₁₃Huo'o so na'a'q, nache so Josué hueta'a ye sa qaỹapeque ye Jericó, nache co'ollaq namatasheguem, nache ila'a so ỹale nachattañi, nasoqta'a so lainec, nache so Josué nquicot somaye nache inat, 'eeta':

«¿Peta'a maiche 'am qarỹa, qalqo' 'am qampa'aguenaxaua?»

₁₄Nache somaye 'enapeco': «¡'A'i saishet! Qalaxaye aỹem ñanac, cha'aye aỹem Lataxala' na nalleppi Ñim Nataxala'.»

Huaña nache so Josué ỹa'alyiñi naua l-llecte iviraxata'aguet naqa'en na latap na 'alhua, nache 'eeta':

«¿Ca 'eetec ca 'aỹa'anem 'ara'aqtac ne'ena 'aramaxashec 'am ỹataxala'?»

₁₅Nache so Lataxala' na nalleppi Ñim Nataxala' ỹasategueto' somaye, 'eeta':

«'Anqa't naua 'arapela'ate, cha'aye ne'ena 'auapetaña, namaye ỹataqta sa qaishetapec.»

Nache so Josué ỹalaxaguet somaye.