Da lasouaxashet so Acán
1Qalaxaye huo'o so 'oonolec so nhuo' le'ecpi maye chegoxoguet so Judá, somaye le'enaxat Acán, qaq somaye llalec so Carmi, qaq so Carmi nache laual so Zabdi, qaq so Zabdi nache laual so Zeraj, qaq se'eso Acán qalota co'ollaxa so ỹacona som nogoxoshetpi maye qaỹamaxasoxoolec co'ollaxa da qailaxachigui. Qaq ỹoqo'oye ỹataqta 'eroigui da lalemataic Ñim Nataxala', nache nmatañi da dalemataỹa so Israel le'ecpi.
So Israel le'ecpi sa ỹañoxot da deuotaxanec ye Ai
2Qaq co'ollaq qaỹata'ague de'era, nache so Josué huo'oi soua ỹama'q shiỹaxau', chegoqchiyiña ye Jericó da nqo'oora naqa'en so huaqta'a't nỹecpi ye Ai, maye pa'aỹa'ague da nala' lliguisheguem ye Betel, qataq saqaỹapeque ye Bet Avén, nache 'enapegalo soomaye, 'eeta': «Qanqo'oñiỹa qome da qaumeenaxañiỹa yemaye.» Nache soomaye je'c da demeenaxara ye Ai. 3Qaq co'ollaq ñe'eguela'q soomaye nache 'enapegalo so Josué, 'eeta': «Sa iuen da 'auamaq 'enauac ne'ena nhuo' le'ecpi da jec da iloquiaxan ye Ai, cha'aye da 'auamaq ca dos huo'otaq tres mil alleppi nache nalota'ai' da iloquiaxan yi'iye huaqta'a't nỹecpi. Qaq nache saishet qome da imeta 'anqa'en da jec ne'ena nhuo' le'ecpi, cha'aye nam nauaatalec yi'iye huaqta'a't nỹecpi ỹataqta salamai'.»
4Huaña co'ollaxa, nache jec so tres mil ỹalleppi da iloquiaxan ye Ai. Qalaxaye so lma' ye Ai nauec co'ollaxa somayepi nache datauec naqa'en, 5nache so Ai le'ecpi ỹalauat co'ollaxa so treinta y seis Israel le'ecpi, qaq so laỹepi nache ỹachegoxotchiguiña so lasom so lpaqtaxat ye huaqta'a't nỹecpi da icaatac, nache iviraxatta'a so qaỹachegoxottapiguiña na no'oxonaxanaxat coma', qaq co'ollaq huaña ye lca'amaxa nache noxonecpi somayepi. Qaq ỹoqo'oye se'eso shiỹaxauapi nlleuchiguiñi da lquiyaqteỹaxac.
6Huaña nache so Josué qataq so nqueroxonecpi maye lataxala' so Israel le'ecpi ncolaxata'aisalo soua alogo, qataq imeeleguete naua lqaigo na 'alhua lsoche da la'anaxat naqa'en da nqui'ic, ime qaq ỹa'aroto naua l-llectel aso arca maye laỹe' da naỹamaxataxac Ñim Nataxala', qataq iviraxata'aguet naqa'en na latap na 'alhua, ivitta'a da inoxooñi aso nala'. 7Nache so Josué 'enapeco':
«¡Aicoue, 'Am Nataxala'! ¿Ta'ainco' co'ollaxa da ỹa'axasoxoolec 'anqa'en so tala Jordán ne'ena nhuo' le'ecpi? ¿Qalqo' 'anshetaique peta'a da qomi' 'aỹa'anegueta na Amorreopi da yaqto' qomi' ilaxachiguilo? ¡Qaico' co'ollaxa da nache sonaqta'ategue da le'ego ye Jordán! 8¡Aicoue, 'Am Nataxala'! Qaq ¿ca sheeteco' nagui ca ỹa'aqtac ye na Israel le'ecpi mashe dataueeguesop so mpa'aguenaxauapi? 9Cha'aye na Canaán le'ecpi qataq 'enauac nam netalec na 'alhuapi qom ỹaỹaten de'era maye huaña ne'ena, nache namayepi huaxaỹa't qome da qomi' iloquiaxa'n, huaña nache saishet da huo'o ca no'onañi da shenaqta. Huaña nache ¿ca 'eetec qome da la'amaqchec da 'are'enaxat?»
10Nache Ñim Nataxala' ỹasategueto' somaye, 'eeta':
«¡Qoñisheguem! ¿Negue't ca 'auo'ottac da 'anqapaxaata'aguet na 'alhua? 11Na Israel le'ecpi huo'o da lasouaxashet, qataq sa ỹalaxalec da ñaỹamaxataxac maye samaxalec namayepi. Qataq ỹacona co'ollaxa na nogoxoshetpi maye samaxalec da ilaxachigui, nache ỹoxotoigui na maiche lalamaxat logoxoshet na lcachaxatpi. 12Ỹoqo'oye na Israel le'ecpi saishet qome da dataỹa'aguet na mpa'aguenaxauapi, nda'a't da dataueeguesop qome namayepi, cha'aye namayepi nachena na pa'aiguet da ỹataqta 'enauac qailaxachigui. Qaq ỹoqo'oye da sa qaulaxachiigui na nhuotaxanaxat maye qami' huetanguilo, nache Aỹem saishet da nache 'eetai' da qami' soota'agueta. 13Qaq ỹoqo'oye qoñisheguem nagui, nache qonapega na nhuo' le'ecpi da naỹamaxat, qataq ỹataqta nqui'itaxatta namayepi yaqto' Aỹem nachaateua'a qoyo'oxoñi. Cha'aye aỹem Nataxala' maye Natamnaxala' na Israel le'ecpi, 'era da ỹa'aqtac, 'eeta': ‹'Am Israel, 'auacona co'ollaxa nam iuen da ỹataqta 'enauac da qailaxachigui, qaq ỹoqo'oye qom saishet da 'aulaxachigui qataq da sa 'auasaxauec namayepi, nache sa 'aushet qome da 'auataỹa'aguet na 'ampa'aguenaxauapi.› 14Qaq qoyo'oxoñi 'enauac da qoñiita qanachaacheua'a ne'ena, qaq ñi 'oonolec na maiche nalamaxat nhuo' le'ecpi nache ỹataqtac naqa'en nam chegoxoguetpi, qaq cam shecteua'a, nacheca qome ca anac, lỹateuo na lalamaxat lauo' le'ecpi, qaq cam shecteua'a nam nalamaxat nhuo' le'ecpi nacheca qome ca anac, lỹateuo ca lalamaxat llalaqpi, qaq cam shecteua'a nam maiche nalamaxat ñalaqpi, nacheca qome ca anac, lỹateuo ñi 'oonolec nam ỹalleppi. 15Nache ca hueto'ot que'eca nhuotaxanaxat maye qoỹan da yaqto' qailaxachigui, camaye nacheca qome ca qaỹavigaxat, lỹaueegue' 'enauac ca llalaqpi qataq 'enauac ca lalamaxatpi, souaxat da ỹo'otec da la'aloxo na Israel le'ecpi, qataq souaxat da sa ỹalaxalec da naỹamaxataxac Ñim Nataxala'.»
Da nhuaxanaguec so Acán
16Qaq so lỹa na'a'q, nache so Josué no'ottasheguem nache iỹaxaneuga ñi 'oonolec soua doce som maiche nalamaxat nhuo' Israel le'ecpi. Nache Ñim Nataxala' taalec da ỹecteua'a so maiche nhuo' le'ecpi maye chegoxoguet so Judá. 17Huaña, nache so Josué nachaateuo naqa'en so maiche nhuo' le'ecpi maye chegoxoguet so Judá lỹateuo naqa'en so maiche lalamaxat lauo' le'ecpi. Huaña, nache taalec da qoỹecteua'a so lalamaxat llalaqpi so Zeraj. Qaq se'eso lalamaxat lauo' le'ecpi so Zeraj, nache qoỹecteua'a so lalamaxat llalaqpi so Zabdi. 18Qaq co'ollaq nquigueuo qanqa'en ñi 'oonolec so ỹalleppi maye lalamaxat llalaqpi so Zabdi, nache qoỹecteua'a so Acán, som llalec so Carmi. Qaq so Carmi nache laual so Zabdi, qaq so Zabdi nache laual so Zeraj maye nataqa'en chegoxoguet so Judá.
19Huaña, nache so Josué 'enapega so Acán, 'eeta':
«'Am ỹalcolec, ñaq huo'o naq 'enec 'anqa'en qataq 'aỹa'anot da 'ayo'oxonnataxanaxac Ñim Nataxala' maye Natamnaxala' na Israel le'ecpi, nache aỹem 'aua'aqtaxanem de'era 'auo'ot. ¡Saishet da aỹem 'oxocheesop!»
20Nache so Acán ỹasategueto' somaye, 'eeta':
«Ỹoqta 'eesa da huo'o da ỹasouaxashet hueto'ot Ñim Nataxala' maye Natamnaxala' na Israel le'ecpi. Qaq 'era da so'ot caillaye: 21Can sela'a so ỹataqta 'onaxaic npo' maye qaỹachegoxota'ague da Babilonia, qataq aso doscientos aso lcatpiole plata qataq so 'oonolec laỹe' so oro maye ivi' medio kilos, ỹalectaigui som qaiuotaxanec nogoxoshetpi. Nache soqopita'alo yi'iyiua nogoxoshe'ete, ỹoqo'oye aỹem saconalo yeemaye qataq soxottrañi, selaroigui na 'alhua nam pa'auo ñi ipe'l, qaq aye lcatpi plata, nache sepa'axaachiguiñi.»
22Nache so Josué sa naỹaloxon da ỹauo'oi soua ỹama'q shiỹaxau' da nqalgoqtrauga so npe'l maye lanataqa' so Acán, qaq soomaye ỹoqta 'eesa da iloralec 'enauac som ỹoxottañi somaye huetaigui so lpe'l, qaq aso lcatpiole plata nache pa'achiguiñi. 23Qaq huaña co'ollaxa nache qanqatsheguem se'eso nogoxoshetpi, nache qanda'alo so Josué qataq 'enauac so Israel le'ecpi, nache qaỹachaxanot Ñim Nataxala' se'eso nogoxoshetpi. 24Huaña nache so Acán qaỹauegueuga so ca'amegue le'enaxat Acor, lỹatec qanqa'en aso lcatpiole plata, npo', qataq so 'oonolec laỹe so oro, qataq soua llalqa ỹale't, qataq soua llalel 'alo, qataq so lauegaxanaxala' huacapi, 'ashenapi, qaguetapi, lpe'l qataq 'enauac so lalamaxatpi somayepi.
25Huaña, nache so Josué 'enapego' somaye, 'eeta':
«¿Ta'ainco' da qomi' taleguete 'anqa'en de'era qauem? Qaq nagui, Ñim Nataxala' 'am talec naqa'en de'era qauem maye qomi' 'auo'oteque.»
Qaq co'ollaq choche ime da nasaxauec de'era so Josué, nache 'enauac so Israel le'ecpi irota'a na coma' da ỹalauat so Acán qataq so lalamaxat llalaqpi, ime nache qaỹavigaxat somayepi. 26Qaq co'ollaq ime nache qalaponalec so logosheguem coma'pi somayepi, qaq nache ivitta'a nagui. Qaq ỹoqo'oye qoỹanagui da le'enaxat da ca'amegue Acor. Qaq huaña co'ollaxa, nache vi'iiguet da lalemataic Ñim Nataxala'.
