So Israel le'ecpi deuotaxanec ye Ai
1Ñim Nataxala' 'enapego' co'ollaxa so Josué, 'eeta': «Saishet qome da 'añi'i, qataq da 'auqalvi. 'Alaỹona't qome na 'analleppi, nache qojec da 'auotaxanec ye huaqta'a't nỹecpi ye Ai, cha'aye aỹem 'am sanem da 'oxonec qome ñi lta'a na netaña ye Ai, nataqa'en 'enauac na nalleppi, qataq ye huaqta'a't nỹecpi qataq ye na'alhuapi, nache imauec qome da 'aralamaxat. 2Qaq 'am, 'auloquiaxan qome ye Ai qataq ñi lta'a yemaye, 'aue'enaxatchigui da qonetec co'ollaxa ye Jericó qataq so nta'a yemaye. Qalaxaye qami' nagui ishet qome da qauacoñiỹa 'enauac na nogoxoshetpi qataq na lalopi maye lalamaxat na qoroxoñiqui. Qaq nache 'anaỹamaxat qome da yaqto' 'auque'elaxatta da 'auloquiaxan yemaye, qoqueteuo'oguet qome na qoshiỹa'ague ye huaqta'a't nỹecpi.»
3Nache so Josué naỹamaxat qataq 'enauac so nalleppi da yaqto' jec da iloquiaxan ye Ai. Nache lca'aua'a so treinta mil som ỹoqta alaataxaicpi, da yaqto' ỹamaq se'eso pe. 4Nache ỹanem da la'aqtac, 'eeta': «Ñaq qana'axaỹaxañiichiguiñi. Qauesomiỹa, qoqui qalaxaye qoquiiteuo'oguet qome da qoshiỹa'ague ye huaqta'a't nỹecpi, qaq qom mashe saqaỹapeque yemaye nache qanqañoxochiiñi, qalaxaye nache qanaỹamaxaachiitai', yaqto' qami' lhuotte' da qauloqui. 5Qaq na laỹepi ne'ena nhuo' le'ecpi, ñenaicapegue' qome da ñequigaxaua'a qome ye huaqta'a't nỹecpi, qaq qom nnoxonec da qomi' ca'ategueta que'eca shiỹaxauapi maye netaña yi'iye huaqta'a't nỹecpi da qomi' iloquiaxa'n, nache qomi' sataxaueeguesop qome camayepi se'enaxataqchigui da shenaqtec soua na'axa'te lỹa't. 6Qaq qom qomi' icana'ape nache qomi' sataxauec, sachegoxosoqteua'a ye huaqta'a't nỹecpi, yaqto' ipi'itaxana qome da ỹoltaq sataxaueeguesop camayepi. 7Huaña qome nache qoquiỹa'aisalo naua qanqañoxotaqa'achilli' nache qauotaxañic ye huaqta'a't nỹecpi, cha'aye Ñim Nataxala' maye Qanatamnaxala'ai qami' ỹanema yemaye. 8Qaq qom mashe qauotaxañic yemaye nache qauavigaxache, qaupaquiichigui da 'enapec Ñim Nataxala'. Qaq 'era da ỹa'aqtac.»
9Huaña nache so Josué ỹamaq somayepi nache somayepi jec, qaq co'ollaq ivi' nache nqañoxotaqa' ye laiñi yeua Betel qataq ye Ai, ye pa'aỹa'ague da avit ye Ai, qaq so Josué nache ỹalectaigui so nalleppi se'eso pe. 10Qaq so lỹa na'a'q, nache so Josué no'ottasheguem, nache naloqchiiñi so nalleppi. Huaña nache somaye hua'autec da yaqto' qaỹatalec, nnaictague' so nqueroxonecpi lataxala'pi so Israel le'ecpi, nache nqo'ona ye Ai da iloquiaxan. 11Qaq 'enauac so nalleppi nquigueua'a so huaqta'a't nỹecpi, tateua'a ye dataỹaueegue yemaye, nache hua'a so lca'amaxa maye pa'aỹa'ague da sheu', ye nalotta ye huaqta'a't nỹecpi ye Ai. 12Nache so Josué nqañoxooñi naqa'en so cinco mil alleppi, ñichiguiña naqa'en na laiñi ye Betel qataq ye Ai, yem pa'aỹa'ague da avit so huaqta'a't nỹecpi. 13Nache se'eso alleppi dos qanqa'en naua lpa'axaco, so 'oonolec se'eso alleppi nqañoxottañi hueta'a da pa'aỹa'ague da avit so huaqta'a't nỹecpi. Qaq so Josué qataq so Israel le'ecpi qalaq pa'aỹa'ague da sheu'. Qaq se'eso pe, nache somayepi ỹa'axasoxoolec ye laiñi se'eso lca'amaxa yi'iye 'alhua.
14Qaq so lta'a so netaña ye Ai, co'ollaq mashe noma de'era huaigui. Nache somaye ỹataqta iỹalapigui' da nnoxonec, lỹatec so nalleppi qataq 'enauac so shiỹaxauapi da yaqto' delogui' so Israel le'ecpi, huaña ye ca'amegue ye Jordán. Qalaxaye somaye sa ỹaỹaten da huo'o so laỹepi Israel le'ecpi da nqañoxottañi, huetauga na qoshiỹa'ague so huaqta'a't nỹecpi. 15Nache so Josué qataq 'enauac so Israel le'ecpi ỹe'enaxat da ñe'eguelqot da datauec, tateuga so nqa'aic maye taỹauga so toolec 'alhua. 16Huaña co'ollaxa nache 'enauac so shiỹaxauapi ye Ai huaxaỹa't, nache icanapec somayepi, qaq co'ollaq qaicaatac so Josué, nache somayepi qaỹoqteueegue da ca'ai so huaqta'a't nỹecpi. 17Qataq nache ỹataqta qaica da huo'otaq 'oonolec shiỹaxaua ca no'onaña ye Ai qataq ye Betel, nache 'enauac somayepi nnoxonec da icanapec so Israel le'ecpi. Qaq souaxat da lcanaxanaxac nache no'onaxatchiguiñi so huaqta'a't nỹecpi nache qaica ca nauanalec. 18Huaña co'ollaxa, nache Ñim Nataxala' 'enapega so Josué, 'eeta': «'Auloxonaxaateua'a qome ana 'arataquiaxai ye Ai, cha'aye aỹem 'am sanem da 'oxonec yemaye.»
Nache so Josué nauaxaỹaxaasheguem na lhuaq, nache iloxonaxaateua'a aso lataquiaxai ye huaqta'a't nỹecpi. 19Huaña nache so nqañoxottañipi sa naỹaloxon da nnoxonec da ca'ai so nqañoxotaqa', nache ỹataqta naloxo da inoxoneua'a so huaqta'a't nỹecpi da yaqto' deuotaxanec, nache sa naỹaloxon da ỹavigaxat.
20Qaq se'eso Ai le'ecpi co'ollaq nqoilec da ỹamataua'a se'eso huaqta'a't nỹecpi, nache ila'a da nchisheguem na lmala'q, tasheguemec na piguem. Nache somayepi ỹataqta qaica ca ỹe'eguenegue, cha'aye so Israel le'ecpi maye datauec co'ollaxa da tauga so toolec 'alhua, qalaq ñe'eguelaxaguet nagui da iloquiaxan somayepi. 21Nache so Josué qataq 'enauac so Israel le'ecpi co'ollaq ila'a na lmala'q so norec nache ỹaỹaten da so laỹepi maye nqañoxottañi co'ollaxa, somayepi mashe deuotaxanec se'eso huaqta'a't nỹecpi. Ỹoqo'oye somayepi ỹe'eguelaxaguet da delogui' so alleppi maye decanaxaatacpi chegaqaua'a ye Ai. 22Qaq so alleppi maye mashe deuotaxanec se'eso huaqta'a't nỹecpi, nnoxonec da ca'ateguet somayepi nache qaipa'axanangui na laiñi so Ai le'ecpi, cha'aye so Israel le'ecpi dos naua lpa'axaco nache natachigui so lma' ye Ai, nache ivitta'a da 'enauac nmatchiguiñi da ỹalauat. 23Qaq nachesota so nta'a ye Ai da qanca'alaxattauec, nache qaỹaconeua'a da yaqto' qaỹauegueua'a so Josué.
24Qaq so Israel le'ecpi co'ollaq ime da ỹalauat 'enauac so alleppi Ai le'ecpi maye decanaxaatac co'ollaq huaña so no'onaxa qataq so toolec 'alhua, nache so Israel le'ecpi ỹe'eguelaxaua'a ye huaqta'a't nỹecpi ye Ai, nache ỹauota'a so ỹeelonec da nmatchiguiñi da ỹalauat so ñaq no'onañipi co'ollaxa. 25Qaq se'eso na'a'q, nache huetoigui da ileu so doce mil so Ai le'ecpi, ỹalleppi qataq 'alpi. 26Qaq so Josué saishet co'ollaxa da nauaxaỹaxaañi aso nasoqta'a lataquiaxai nache iloxonaxaataua'a so huaqta'a't nỹecpi, ivitta'a da ỹataqta qailaxachigui 'enauac somaye. 27Nache so Israel le'ecpi no'ona'aguet so nlopi, nataqa'en so nogoxoshetpi maye huetaigui se'eso huaqta'a't nỹecpi, ipacchigui qanqa'en da 'enapec Ñim Nataxala' co'ollaq 'enapega so Josué. 28Qaq so Josué damaxasoxoolec co'ollaxa da qaỹavigaxat so huaqta'a't nỹecpi ye Ai, iviraxata'a da ỹataqta nlachiguiñi qanqa'en choche ivitta'a nagui. 29Qaq so Josué icoñerasheguemec aso qo'oipaq so nta'a ye Ai, nache ivitta'a so avit da netasheguem naqa'en, qaq co'ollaq mashe yaqta'a da inoxooñi aso nala' nache damaxasoxoolec da qanqaañi se'eso leuaxaic, ime nache qairouga so ñegueuo so huaqta'a't nỹecpi, nache se'eso lo'ocỹaxac somaye qalaponalec so coma'. Qaq se'eso naponec coma'pi nache huetaña, choche ivitta'a nagui.
So Josué itaxaỹaxan aso lmalate so nqataxacpi huaña añi qasoxonaxa Ebal
30Qaq huaña nache so Josué, ỹo'ot aso nca'atoxonaxalate naña naqa'en añi qasoxonaxa Ebal da lalamaqte Ñim Nataxala' maye Natamnaxala' na Israel le'ecpi, 31nache ipacchigui naqa'en da la'aqtac so Moisés maye lamaxashec Ñim Nataxala', co'ollaq 'enapega so Israel le'ecpi da ipacchigui nam nanettalec aso nere maye huetalec na lqataxacpi so Moisés, 'eeta': «Qaỹo'ot aca nca'atoxonaxalate maye saishet da qaỹauota'a ca nchiiguishec coma'.» Huaña nache so Israel le'ecpi ỹachalec asa'aso nca'atoxonaxalate aso lachetaqtaxanaqtepi qaỹavigaxatta, qataq aso lachetaqtaxanaqtepi qanhuaachigui. 32Ime nache so Josué, ỹauaachigui naqa'en so Israel le'ecpi da ỹerelec aso nca'atoxonaxalate coma' so nqataxacpi maye so Moisés, ỹanem co'ollaxa somayepi. 33Huaña nache 'enauac so nhuo' le'ecpi, maye chegoxoguetpi so Israel qataq som chegaqauecpi, nqueroxonecpi, nataxala'pi, huataxanaq lta'alpi, qataq so aloico lo'opi, 'enauac somayepi nachattaña som pa'aỹa'aguelo soua laỹel aso arca maye laỹe' da naỹamaxataxac Ñim Nataxala', datateua'a so netaña so ntaxaỹaxanaxanecpi leviitapi maye ỹachetac aso arca maye laỹe' da aỹamaxataxac. Nache so 'oonolec laỹe somayepi netaña da pa'aỹa'ague aso qasoxonaxa Guerizín, qaq so laỹepi netaña da pa'aỹa'ague añi qasoxonaxa Ebal, qaq nache 'eeta'am co'ollaxa so hua'auchiguiñi da talec qanqa'en da no'on na'aqtac qaipacchigui da lamaxasoxonaxac so Moisés, maye lamaxashec Ñim Nataxala'.
34Huaña co'ollaxa, nache so Josué ỹataqta nlamaxaren da itaxaỹaxaatac soua ñiyigui'she na'aqtaqa maye nanettaleguete aso nere maye lmalate na nqataxacpi, qataq na nchoxonnataxanaxacpi qataq na qauem maye talec qanqa'en ca shiỹaxaua. 35Qaq saishet da huo'otaq 'oonolec ca na'aqtac naua damaxasoxooleguete co'ollaxa so Moisés da sa itaxaỹaxa'n so Josué, da yaqto' hua'aqchigui naqa'en 'enauac so lapoota'a't Israel le'ecpi, qataq so ỹalectauo 'alpi, qataq so ñaqpiolec, qataq so chegaqauec shiỹaxauapi maye ỹalectaigui somayepi.
